പിപി തങ്കച്ചനെതിരെ ആരോപണമുന്നയിച്ച ജോമോന് പുത്തന്പുരയ്ക്കല് ഒളിവില്; അറസ്റ്റ് ചെയ്യാനുറച്ച് പോലീസ്
വാദി പ്രതിയാകുന്നു. പ്രതിയെ കിട്ടാത്ത പോലീസ് ജോമോനെ പിടിക്കാന് നെട്ടോട്ടത്തില്. ഉള്വലിഞ്ഞ് ജോമോനും. ദലിത് വിദ്യാര്ത്ഥിനിയുടെ കൊലപാതകത്തില് ഉന്നത കോണ്ഗ്രസ് നേതാവിന് പങ്കുണ്ടെന്ന് ആരോപണം ഉന്നയിച്ച പൊതുപ്രവര്ത്തകന് ജോമോന് പുത്തന്പുരയ്ക്കല് ഒളിവിലെന്ന് സൂചന. ജിഷയുടെ പിതാവ് നല്കിയ പരാതിയില് ജോമോന് പുത്തന്പുരയ്ക്കലിനെ അറസ്റ്റ് ചെയ്യാന് നീക്കം നടത്തുന്നതിനിടയിലാണ് ജോമോന് മുങ്ങിയത്.
കഴിഞ്ഞ ദിവസം വരെ നാട്ടിലുണ്ടായിരുന്ന ജോമോന് ഇന്നലെ മുതല് ഒളിവിലാണെന്നാണ് പ്രചാരണം ശക്തിപ്പെട്ടിട്ടുള്ളത്. പൊലീസ് കേന്ദ്രങ്ങളില്നിന്നു ലഭിക്കുന്ന വിവരങ്ങളും ഏറെക്കുറെ ഇതിന് സമാനമാണ്.
ജോമോന് മുന്കൂര് ജാമ്യത്തിനു നീക്കം നടത്തുന്നുണ്ടെന്നാണ് പൊലീസിനു ലഭിച്ച സൂചന. ഇത്തരത്തില് നീക്കമുണ്ടെന്നു വ്യക്തമായാല് കോടതി നിലപാടറിയിക്കും വരെ കാത്തിരിക്കാനാണ് അന്വേഷകസംഘത്തിന്റെ തീരുമാനം. പിതൃത്വത്തെ അപമാനിച്ചതായി ജിഷയുടെ പിതാവ് പാപ്പു നല്കിയ പരാതിയിലാണ് പൊലീസ് വിവരവകാശ പ്രവര്ത്തകന് ജോമോന് പുത്തന്പുരയ്ക്കലിനെതിരെ കേസെടുത്തിട്ടുള്ളത്.
മുന് ഐ ജി മഹിപാല് യാദവിനാണ് പാപ്പു ഇതുസംബന്ധിച്ച് പരാതി നല്കിയത്. ഐ ജിയുടെ നിര്ദ്ദേശാനുസരണം കുറുപ്പംപടി പൊലീസാണ് ജോമോനെതിരെ കേസ് രജിസ്റ്റര് ചെയ്തത്. എസ്.സി/എസ്.ടി. പീഡനനിരോധന നിയമപ്രകാരമുള്ള ഈ കേസ്സില് അറസ്റ്റിലായാല് ജോമോന് ഇരുമ്പഴിക്കുള്ളിലാവുമെന്ന കാര്യം ഉറപ്പാണ്. ജാമ്യമില്ലാ വകുപ്പുകള് ഉള്പ്പെടുത്തി ചാര്ജ്ജ് ചെയ്തിട്ടുള്ള കേസില് ഏഴുവര്ഷം വരെ ശിക്ഷ ലഭിച്ചേക്കാമെന്നാണ് നിയമവൃത്തങ്ങള് നല്കുന്ന സൂചന.
എന്നാല് ജോമോനെതിരെ പരാതി നല്കിയത് ജിഷയുടെ പിതാവ് ബാപ്പുവിനെ കബളിപ്പിച്ചാണെന്നാണ് പുതിയ വെളിപ്പെടുത്തല്. വാര്ഡ് മെമ്പര് തന്നെ കബളിപ്പിക്കുകയായിരുന്നെന്നാണ് പാപ്പു ഇപ്പോള് പറയുന്നത്. പോലീസ് ത്ങ്ങളെ പീഡിപ്പിക്കുകയാണെന്ന വാദവുമായി ജിഷയുടെ സുഹൃത്തുക്കളും ഇപ്പോള് രംഗത്തെത്തിയിട്ടുണ്ട്. പോലീസിനെതിരെ ആരോപണം ഉന്നയിച്ചതിന്റെ പേരില് തങ്ങളെ വീട്ടില് കിടക്കാന് സമ്മതിക്കന്നില്ലെന്നാണ് അവരുടെ ആരോപണം. ഏതായാലും കേസ് കുഴഞ്ഞു മറിയുകയാണ് ഒരുവശത്ത്.
അപ്പപ്പോഴുള്ള വാര്ത്തയറിയാന് ഞങ്ങളുടെഫേസ് ബുക്ക്Likeചെയ്യുക
https://www.facebook.com/Malayalivartha
