വി.എസ്. അച്യുതാനന്ദന്റെ പദവി സംബന്ധിച്ച പൊളിറ്റ് ബ്യൂറോ തീരുമാനം സിപിഎം ജനറല്‍ സെക്രട്ടറി സീതാറാം യച്ചൂരി അറിയിക്കുമെന്ന് മുഖ്യമന്ത്രി പിണറായി വിജയന്‍. സര്‍ക്കാര്‍ എന്തെങ്കിലും തീരുമാനമെടുത്താല്‍ അപ്പോള്‍ അറിയിക്കാമെന്നും ചര്‍ച്ചകള്‍ ക്രിയാത്മകമായിരുന്നെന്നും പിണറായി പറഞ്ഞു. ഡല്‍ഹിയില്‍നിന്നും തിരുവനന്തപുരത്തു മടങ്ങിയെത്തിയ മുഖ്യമന്ത്രി മാധ്യമങ്ങളോട് സംസാരിക്കുകയായിരുന്നു.

വിഎസിനു എന്തു പദവി നല്‍കണമെന്ന് കേരള സര്‍ക്കാര്‍ തീരുമാനിക്കുമെന്നായിരുന്നു സിപിഎം ജനറല്‍ സെക്രട്ടറി സീതാറാം യച്ചൂരി പറഞ്ഞത്. ഇക്കാര്യം പൊളിറ്റ് ബ്യൂറോയല്ല തീരുമാനിക്കേണ്ടത്. സംസ്ഥാന സര്‍ക്കാര്‍ വൈകാതെ തന്നെ ഇക്കാര്യത്തില്‍ തീരുമാനമെടുക്കുമെന്നും പൊളിറ്റ് ബ്യൂറോ യോഗത്തിനുശേഷം മാധ്യമപ്രവര്‍ത്തകരോട് യച്ചൂരി പറഞ്ഞിരുന്നു. ഇതിനു വിപരീതമായിട്ടാണ് ഇപ്പോള്‍ മുഖ്യമന്ത്രി പറഞ്ഞിരിക്കുന്നത്.

അതേസമയം, എല്‍ഡിഎഫ് സര്‍ക്കാരില്‍ വി.എസ്. അച്യുതാനന്ദന് കാബിനറ്റ് റാങ്കുള്ള പദവി നല്‍കാന്‍ തീരുമാനമായെന്നാണ് സൂചന. സ്വതന്ത്ര അധികാരമുള്ള പദവിയാകുമിത്. ഇരട്ടപ്പദവി നിയമ വ്യവസ്ഥകള്‍ പരിഗണിച്ചായിരിക്കും നിയമനം. മുഖ്യമന്ത്രിക്ക് റിപ്പോര്‍ട്ട് ചെയ്യാത്ത രീതിയിലായിരിക്കും പദവി. വിഎസിന് ഉചിതമായ പദവി നല്‍കണമെന്ന കാര്യത്തില്‍ നേരത്തെ തന്നെ തീരുമാനമായിരുന്നു. ഇക്കാര്യത്തില്‍ സംസ്ഥാന ഘടകത്തിനും എതിര്‍പ്പുണ്ടായിരുന്നില്ല. പക്ഷേ, രണ്ട് അധികാര കേന്ദ്രങ്ങളുണ്ടാകാന്‍ അനുവദിക്കില്ല. അങ്ങനെ വന്നാല്‍ സര്‍ക്കാരിന്റെ പ്രവര്‍ത്തനങ്ങളെ ബാധിക്കുമെന്നായിരുന്നു സംസ്ഥാന നേതാക്കളുടെ നിലപാട്.

അതേസമയം, കാബിനറ്റ് റാങ്കുള്ള പദവി നല്‍കുന്നത് സംബന്ധിച്ച് തനിക്ക് അറിവൊന്നുമില്ലെന്ന് നേരത്തെ വി.എസ്. അച്യുതാനന്ദന്‍ മാധ്യമങ്ങളോട് പറഞ്ഞിരുന്നു. ഇതേക്കുറിച്ച് ആരും തന്നോടൊന്നും പറഞ്ഞിട്ടില്ലെന്നും വിഎസ് പറഞ്ഞു. കാബിനറ്റ് റാങ്കോടെ സര്‍ക്കാരിന്റെ ഉപദേശകന്‍, എല്‍ഡിഎഫ് ചെയര്‍മാന്‍ സ്ഥാനം, സംസ്ഥാന സെക്രട്ടറിയേറ്റിലേക്ക് തിരിച്ചെടുക്കുക തുടങ്ങിയവ വിഎസിന് നല്‍കുന്നത് സംബന്ധിച്ചാണ് ചര്‍ച്ചകള്‍ നടന്നത്. ഇതുമായി ബന്ധപ്പെട്ട് വിഎസ് പാര്‍ട്ടി സെക്രട്ടറി സീതാറം യച്ചൂരിക്ക് നല്‍കിയ കുറിപ്പു സംബന്ധിച്ച് വിവാദവും നിലനില്‍ക്കുന്നുണ്ട്.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha