ബധിരയും മൂകയുമായ മുപ്പത്തിയെട്ടുകാരിയെ വീട്ടില്‍ അതിക്രമിച്ചു കടന്നു ക്രൂരമായി പീഡിപ്പിച്ചു. രക്തം വാര്‍ന്നു ഗുരുതരാവസ്ഥയിലെത്തിയ യുവതിയെ മെഡിക്കല്‍ കോളജ് ആശുപത്രിയില്‍ പ്രവേശിപ്പിച്ചു. അപകടനില തരണം ചെയ്തിട്ടുണ്ട്. പ്രതിയെക്കുറിച്ചു സൂചന ലഭിച്ചു.
നാട്ടികയില്‍ അമ്മയോടൊപ്പം താമസിക്കുന്ന യുവതിയാണു പീഡനത്തിനിരയായത്. വെള്ളിയാഴ്ച വൈകിട്ടായിരുന്നു സംഭവം. പുറത്തുപോയ അമ്മ അഞ്ചോടെ തിരിച്ചെത്തിയപ്പോള്‍ യുവതിയെ വീടിനടുത്തുള്ള ഷെഡില്‍ രക്തം വാര്‍ന്ന് അവശ നിലയില്‍ കണ്ടെത്തുകയായിരുന്നു. പാമ്പുകടിയേറ്റതാണെന്ന സംശയത്തില്‍ മെഡിക്കല്‍ കോളജ് ആശുപത്രിയില്‍ പ്രവേശിപ്പിച്ചു. പരിശോധനയ്ക്കിടയിലാണു പീഡനമാണെന്നു കണ്ടെത്തിയത്. 3.15 വരെ യുവതി വീടിനടുത്തെ അങ്കണവാടിയിലുണ്ടായിരുന്നു. ഇതിനുശേഷം വീട്ടിലേക്കു പോയി. വീടിനു സമീപത്തെ ഷെഡില്‍ ബലപ്രയോഗം നടന്നതിന്റെ ലക്ഷണങ്ങളുണ്ട്. യുവതി ധരിച്ചിരുന്ന വസ്ത്രം വലിച്ചുകീറിയ നിലയില്‍ പുറത്തു കണ്ടെത്തി. അവിടെ കിടന്നിരുന്ന കയറില്‍ രക്തത്തിന്റെ അംശങ്ങളും പൊലീസ് നടത്തിയ പരിശോധനയില്‍ കണ്ടു.
യുവതിയെ ക്രൂരമായി പീഡിപ്പിച്ച് ഒറ്റമുറി വീടിന് പുറത്തെ ഷെഡില്‍ തള്ളുകയായിരുന്നുവെന്നാണ് പൊലീസ് നല്‍കുന്ന പ്രാഥമിക വിവരം. രഹസ്യഭാഗങ്ങളില്‍ ആഴത്തില്‍ മുറിവേറ്റ യുവതിയെ തൃശൂര്‍ മെഡിക്കല്‍ കോളേജ് ആശുപത്രിയില്‍ അടിയന്തര ശസ്ത്രക്രിയയ്ക്ക് വിധേയയാക്കി. അമ്മ ഉടന്‍ തിരിച്ചെത്തില്ല എന്നറിഞ്ഞുകൊണ്ടു തന്നെയാകണം അക്രമത്തിനു മുതിര്‍ന്നതെന്നാണു സൂചന. മര്‍ദിച്ചതിന്റെ പാടുകളും ഉണ്ടെന്നു പൊലീസ് കണ്ടെത്തി. യുവതി അത്യാഹിത വിഭാഗത്തിലായതിനാല്‍ കൂടുതല്‍ തെളിവെടുപ്പു നടത്തിയിട്ടില്ല. രക്തം വാര്‍ന്നൊലിച്ച് അടിവസ്ത്രം മാത്രം ധരിച്ച നിലയില്‍ ഷെഡില്‍ കിടന്നിരുന്ന യുവതിയെ വെള്ളിയാഴ്ച വൈകിട്ട് അഞ്ചുമണിയോടെ അമ്മയാണ് ആദ്യം കണ്ടത്. ആംഗ്യഭാഷയിലുള്ള ആശയവിനിമയത്തില്‍ നിന്ന് പാമ്പ് കടിച്ചതാണെന്ന നിഗമനത്തില്‍ അമ്മയും നാട്ടുകാരും ചേര്‍ന്ന് യുവതിയെ മെഡിക്കല്‍ കോളേജ് ആശുപത്രിയില്‍ പ്രവേശിപ്പിച്ചു. ഇന്നലെ രാവിലെ ഡോക്ടര്‍മാര്‍ നടത്തിയ വിദഗ്ദ്ധ പരിശോധനയിലാണ് യുവതി ക്രൂരമായ പീഡനത്തിന് വിധേയമായതായി തെളിഞ്ഞത്.
രഹസ്യഭാഗത്തേറ്റ ആഴത്തിലുള്ള മുറിവില്‍ നിന്നാണ് രക്തസ്രാവമുണ്ടാകുന്നതെന്ന് കണ്ടെത്തിയതോടെ ശസ്ത്രക്രിയ നടത്തി. സാധാരണനിലയില്‍ ഇത്തരമൊരു മുറിവുണ്ടാകാന്‍ സാദ്ധ്യതയില്ലെന്ന് ഡോക്ടര്‍മാര്‍ പറഞ്ഞു. അതേസമയം ഏതെങ്കിലും ആയുധം കൊണ്ടാണ് മുറിവേല്‍പ്പിച്ചതെന്ന് പറയാനാകില്ലെന്നും മെഡിക്കല്‍ കോളേജ് സൂപ്രണ്ട് വ്യക്തമാക്കി. റൂറല്‍ എസ്പി നിശാന്തിനിയുടെ നേതൃത്വത്തിലുള്ള പൊലീസ് സംഘം യുവതിയില്‍ നിന്ന് മൊഴിയെടുത്തു. ആംഗ്യഭാഷയായതിനാല്‍ സംഭവത്തെക്കുറിച്ച് കൂടുതല്‍ മനസിലാക്കാന്‍ കഴിഞ്ഞില്ല. ഓര്‍മ്മക്കുറവുള്ളതിനാല്‍ യുവതിയുടെ അമ്മയില്‍ നിന്ന് കൂടുതല്‍ വിവരങ്ങള്‍ ശേഖരിക്കാനും കഴിഞ്ഞില്ല. അന്യസംസ്ഥാന തൊഴിലാളികളുടെ സാന്നിദ്ധ്യം ഈ ഭാഗത്തില്ലെന്നും പോലീസ് പറഞ്ഞു.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha