കോടതി ഉത്തരവില്‍ സന്തോഷം മാത്രം.എന്നാല്‍ ദേശീയഗാനം തീയറ്ററുകളില്‍ ചൊല്ലിക്കണമെന്നുള്ള കോടതി ഉത്തരവിനെക്കുറിച്ചോര്‍ത്ത് അഭിമാനിക്കുന്ന ഒരാളുണ്ട് നമ്മുടെ നാട്ടില്‍. മുന്‍ സിനിമാ സാംസ്‌കാരിക മന്ത്രിയും ഇപ്പോഴത്തെ പത്തനാപുരം എംഎല്‍എയുമായ ശ്രീ കെബി ഗണേഷ്‌കുമാര്‍. കാരണം മറ്റൊന്നുമല്ല 2012 മുതല്‍ തന്നെ അദ്ദേഹം കേരള സര്‍ക്കാരിനു കീഴിലുള്ള കൈരളി ശ്രീ തീയറ്ററുകളില്‍ ദേശീയ ഗാനം കേള്‍പ്പിച്ചിരുന്നു. ആ തീരുമാനത്തെക്കുറിച്ചും ഇപ്പോള്‍ നടക്കുന്ന വിവാദങ്ങളെക്കുറിച്ചുമെല്ലാം ഗണേഷ്‌കുമാര്‍ പറയുന്നു.
സത്യം പറഞ്ഞാല്‍ സുപ്രീംകോടതി വിധിയില്‍ എനിക്ക് വലിയ അഭിമാനം തോന്നി. ഞാന്‍ ഇക്കാര്യം വര്‍ഷങ്ങള്‍ക്കു മുമ്പേ നമ്മുടെ നാട്ടില്‍ നടപ്പാക്കിയല്ലോ എന്നോര്‍ത്ത്. 2012ല്‍ ഞാന്‍ മന്ത്രിയായിരിക്കുന്ന കാലത്താണ് ഇത് ദേശീയഗാനം സിനിമയ്ക്കു മുമ്പ് കേള്‍പ്പിക്കുന്ന കാര്യം ആലോചിച്ച് നടപ്പാക്കുന്നത്. അതിനുമുമ്പ് സിനിമയ്ക്ക് ശേഷം ദേശീയഗാനം കേള്‍പ്പിക്കുമായിരുന്നു. പക്ഷേ, ആ സമയത്ത് തീയറ്ററില്‍ നിന്നും കാണികളെല്ലാം എഴുന്നേറ്റുപോകും. ആരും ദേശീയഗാനം തീരുന്നതുവരെ നില്‍ക്കാനുള്ള മനസുകാണിക്കാറില്ല. ആ കാഴ്ച വളരെ വേദന ഉണ്ടാക്കുമായിരുന്നു. അങ്ങനെയാണ് സിനിമയ്ക്കു മുമ്പ് കേള്‍പ്പിക്കാന്‍ ഉത്തരവിടുന്നത്. അന്ന് പല സ്വകാര്യ തീയറ്ററുടമകളോടും ഞാന്‍ അഭ്യാര്‍ഥിച്ചതാണ് ഈ പദ്ധതി നടപ്പാക്കണമെന്ന്. എന്നാല്‍ അവരത് നിഷേധിച്ചു.
എന്‍ജയചന്ദ്രനെക്കൊണ്ടാണ് ഇന്ന് തീയറ്ററുകളില്‍ കേള്‍ക്കുന്ന ഗാനം ഹൈ ക്വാളിറ്റിയില്‍ റെക്കോ!ഡ് ചെയ്യിച്ചത്. അത് തന്നെയാണ് ഇപ്പോഴും കേള്‍പ്പിക്കുന്നത്. സിനിമയുടെ ദൈര്‍ഘ്യത്തെ ഇത് ബാധിക്കുമെന്നൊക്കെ പറയുന്നത് വെറുതെയാണ്. സ്‌കൂളിലെത്തുന്ന കുട്ടികള്‍ക്ക് മെഡിറ്റേഷന്‍ കൊടുത്തശേഷം ക്ലാസെടുക്കുന്ന പോലെയാണ് ദേശീയഗാനം കേട്ടശേഷം സിനിമകാണുന്നത്. എല്ലാവരുടേയും മനസ് ഒരുപോലെയാക്കാന്‍ ഇത് സഹായിക്കും.
കോടതി നിര്‍ദേശം നടപ്പാക്കുന്നതിനു പിന്നില്‍ രാഷ്ട്രീയമുണ്ട്, ബിജെപിയുടെ അജന്‍ഡയാണെന്ന് പറയുന്നതൊക്കെ വെറുതെയാണ്. രാജ്യത്തിന്റെ ദേശീയപതാകയെ മാനിക്കുന്നതും ദേശീയഗാനം ആലപിക്കുമ്പോള്‍ എഴുന്നേല്‍ക്കുന്നതുമെല്ലാം ബിജെപിക്കുവേണ്ടിയാകുന്നതെങ്ങനെയാണ്? ബിജെപിയുടെ പതാകയെ ആദരിക്കാനൊന്നുമല്ലല്ലോ അവര്‍ പറയുന്നത്.
ഇന്ത്യന്‍ പൗരനാണെങ്കില്‍ ഇവിടുത്തെ നിയമം അനുസരിക്കണം. ചലച്ചിത്രമേളയ്‌ക്കെത്തിയവര്‍ എന്തൊക്കെയാണ് കാട്ടിക്കൂട്ടിയത്. ഫിലിംഫെസ്റ്റിവല്ലില്‍ വരുന്നവര്‍ നിയമം പാലിക്കാന്‍ ബാധ്യസ്ഥരാണ്. ഞാന്‍ ചലച്ചിത്രമേളകളൊക്കെ നടത്തിയിട്ടുണ്ട്. ഇനി ഗോവയില്‍ നടക്കുന്ന ചലച്ചിത്രമേളയിലും ദേശീയഗാനം കേള്‍പ്പിക്കും. എല്ലാവരും എഴുന്നേറ്റു നിന്നേ പറ്റൂ., പ്രശ്‌നമുണ്ടാക്കുന്നവര്‍ സിനിമകാണാന്‍ വരുന്നവരല്ല. വെറുതെ ആളുകളുടെ ശ്രദ്ധ പിടിച്ചുപറ്റാന്‍ വേണ്ടി വരുന്നവരാണ്,. അവര്‍ കൂകി വിളിക്കാനും ഉല്ലാസയാത്രയ്ക്കുമായി വരുന്നതാണ്, മീഡിയയുടെ ശ്രദ്ധ പിടിച്ചു പറ്റാന്‍ വേണ്ടി ചെയ്യുന്ന അഭ്യാസങ്ങളാണെല്ലാം. ചലച്ചിത്രമേളയ്ക്ക് ഓരോ സിനിമയ്ക്കു മുമ്പും എഴുന്നേല്‍ക്കണമെന്നായിരുന്നല്ലോ പരാതി. അങ്ങനെയുള്ളവര്‍ സിനിമ കാണണ്ട. ഒരുദിവസം ഒരു സിനിമ കണ്ടാല്‍ മതി.
ഞാന്‍ മന്ത്രിയായിരുന്ന സമയത്ത് തീയറ്ററുകളില്‍ സിസിടിവി കാമറ സ്ഥാപിച്ചു. അത് സ്ത്രീ സുരക്ഷയ്ക്ക് ഏറ്റവും സഹായകമായിരുന്നു. എന്നാല്‍ ഇതിനെതിരെ കുറേപ്പേര്‍ രംഗത്തുവന്നു, കാമറ തല്ലിപ്പൊട്ടിക്കുമെന്ന് പറഞ്ഞു, ഞാന്‍ പറ!ഞ്ഞു, ധൈര്യമുണ്ടെങ്കില്‍ പൊട്ടിച്ചോളൂ, പക്ഷേ പൊതുമുതല്‍ നശിപ്പിച്ചതിന് കേസെടുക്കുമെന്ന്. അങ്ങനെ ആ പ്രതിഷേധം നിന്നു. എന്റെ ഒരു സുഹൃത്ത് പറഞ്ഞത് സ്‌കൂളില്‍ നിന്ന് പിരിഞ്ഞതിന് ശേഷം ദേശീയഗാനം കേട്ടപ്പോള്‍ അഭിമാനത്തോടെ എഴുന്നേറ്റ് നില്‍ക്കാന്‍ കഴിഞ്ഞത് ഇത്തവണ തീയറ്ററില്‍ ദേശീയ ഗാനം കേട്ടപ്പോഴാണെന്നാണ്. എന്തിനെയും എതിര്‍ത്ത് ആളാവുകയെന്നതാണ് ഇപ്പോഴത്തെ ട്രെന്‍ഡ്.