ശാസ്തമംഗലത്തെ കോര്‍പ്പറേഷന്‍ കെട്ടിടത്തിലെ കൗണ്‍സിലറുടെ ഓഫിസിലെ മാലിന്യങ്ങള്‍ നീക്കം ചെയ്തുവെന്ന് ആര്‍ ശ്രീലേഖ. കോര്‍പ്പറേഷന്‍ അതിവേഗം വൃത്തിയാക്കിയെന്ന് ഫേസ് ബുക്കില്‍ വീഡിയോ പങ്കുവച്ച് ശ്രീലേഖ പറഞ്ഞു.'രണ്ട് ദിവസം മുന്‍പ് ഞാന്‍ ചവറിന്റെ പ്രശ്‌നം പറഞ്ഞിരുന്നില്ലേ? എല്ലാം മാറി.

ഞാനത് കാണിച്ചുതരാം. എല്ലാം കെട്ടിപ്പെറുക്കി വച്ചിട്ടുണ്ട്. ഈ കുപ്പികളൊക്കെ ഇന്നലെ ആളുകള്‍ കുടിച്ചിട്ട് കൊണ്ടുവന്നിട്ടതാ. അതെല്ലാം പെറുക്കി ഒരു മൂലയില്‍ വച്ചിട്ടുണ്ട്. എടുത്തുകളയാനുള്ള ചവറുകള്‍ വണ്ടിയില്‍ കേറ്റിയിട്ടുണ്ട്. ഒരു കോര്‍പ്പറേഷനാകുമ്പോള്‍ ഇങ്ങനെ വേണം പ്രവര്‍ത്തിക്കാന്‍. വളരെ നന്നായി വൃത്തിയാക്കിയിട്ടുണ്ട്' എന്നാണ് വീഡിയോയില്‍ ശ്രീലേഖ പറയുന്നത്.

ശാസ്തമംഗലത്തെ കോര്‍പ്പറേഷന്‍ കെട്ടിടത്തില്‍ കൗണ്‍സിലര്‍ ഓഫീസും വി കെ പ്രശാന്ത് എംഎല്‍എയുടെ ഓഫീസും ഒരു കെട്ടിടത്തിലാണ് പ്രവര്‍ത്തിക്കുന്നത്. ശാസ്തമംഗലം വാര്‍ഡ് കൗണ്‍സിലറുടെ ഓഫീസിന്റെ പ്രവര്‍ത്തനം ആരംഭിക്കുന്നതിന്റെ ചിത്രങ്ങള്‍ ആര്‍ ശ്രീലേഖ കഴിഞ്ഞ ദിവസം പങ്കുവെച്ചിരുന്നു.

കഷ്ടിച്ച് 7075 സ്‌ക്വയര്‍ ഫീറ്റ് മാത്രമുള്ള തന്റെ ഇത്തിരിപ്പോന്ന കുഞ്ഞ് ഓഫീസ് മുറിയാണിതെന്നും കെട്ടിടത്തിന് ചുറ്റും ടണ്‍ കണക്കിന് മാലിന്യമാണെന്നും ശ്രീലേഖ പോസ്റ്റില്‍ വിമര്‍ശിച്ചിരുന്നു. സേവനം തുടങ്ങിയെന്നും മുറിയെന്ന് പറയാന്‍ കഴിയാത്ത ചെറിയ ഒരിടമാണെന്നും ആത്മാര്‍ത്ഥതയുള്ള ഒരു ജനസേവികക്ക് ഇവിടെയും പ്രവര്‍ത്തിക്കാമെന്നും ശ്രീലേഖ പറഞ്ഞു. കഴിഞ്ഞ ദിവസം ഉച്ച വരെ ഇവിടെ 18 പേര്‍ വന്നുവെന്നും അവരെ സഹായിച്ചതില്‍ തൃപ്തിയുണ്ടെന്നും അത് മതിയെന്നും ശ്രീലേഖ കുറിച്ചിരുന്നു. ഓഫീസിന് ചുറ്റും കുട്ടിയിട്ടിരുന്ന മാലിന്യത്തിന്റെ വീഡിയോയും ശ്രീലേഖ പങ്കുവെച്ചിരുന്നു.