ഒരു വയസുള്ള കുട്ടിയുടെ മൃതദേഹം മറവു ചെയ്തു; ബിഹാറിത്തൊഴിലാളി ഒരു വര്ഷമായി ജയിലില്; രക്ഷിക്കാന് വഴി കാണാതെ ഭാര്യയും മക്കളും
വിശ്വാസമനുസരിച്ച് ഒരു വയസ്സുള്ള കുട്ടിയുടെ മൃതദേഹം മറവു ചെയ്യാന് കൂട്ടുപോയ ബിഹാര് സ്വദേശിയായ യുവാവിനെ പോലീസ് ജയിലില് അടച്ചു. ഇയാളെ രക്ഷിക്കാന് കഴിയാതെ ഭാര്യയും അഞ്ച് മക്കളും ബുദ്ധിമുട്ടുന്നു. ബിഹാര് ഈസ്റ്റ് ചമ്പാരന് ജില്ലയില് സേമ്രഹാസ് വില്ലേജില് ആശ(31)യാണ് ഭര്ത്താവ് തനോജ്പ്രമോദി(36)നെ രക്ഷിക്കാന് വഴിയില്ലാതെ ചെറിയനാട്ട് മക്കളുമൊത്ത് സഹോദരനോടൊപ്പം ചെറിയ വാടകമുറിയില് കഴിയുന്നത്.
തനോജ്പ്രമോദ് മുമ്പ് കായംകുളത്ത് ലോഡിങ് തൊഴിലാളിയായിരുന്നു. അവിടെ സ്വകാര്യ ലോഡ്ജിലായിരുന്നു താമസം. ലോഡ്ജിലെ മറ്റു മുറികളില് ഉത്തര്പ്രദേശ്, അസം, ബംഗാള് എന്നിവിടങ്ങളില് നിന്നുള്ള തൊഴിലാളികള് താമസിച്ചിരുന്നു. ഇതില് ഉത്തര്പ്രദേശ് സ്വദേശികളായ ബസുദേവ്പ്രതിഭാദേവി ദമ്പതികളുടെ ഒരു വയസുള്ള കുട്ടി കഴിഞ്ഞ വര്ഷം ഒക്ടോബറില് മരിച്ചു.
ഇവരുടെ വിശ്വാസം അനുസരിച്ച് കുട്ടികള് മരിച്ചാല് കടല്ക്കരയിലോ ജലാശയത്തിനു സമീപമോ മൃതദേഹം മറവു ചെയ്യുന്ന രീതിയുണ്ട്. വാടകയ്ക്ക് താമസിച്ചിരുന്ന കെട്ടിടത്തിന് സമീപം കായംകുളം കായലിന്റെ തീരത്ത് മൃതദേഹം മറവുചെയ്തു. കെട്ടിടത്തിന്റെ ഉടമ കുട്ടിയുടെ മാതാപിതാക്കളുടെ സഹായത്തിനായി തൊട്ടടുത്ത മുറിയിലെ താമസക്കാരനായ തനോജ്പ്രമോദിനെ ഇവര്ക്കൊപ്പം അയച്ചു.
പകല് വെളിച്ചത്തില് നാട്ടുകാരുടെ സാന്നിധ്യത്തില് മാതാപിതാക്കള് മൃതദേഹം മറവുചെയ്തു. എന്നാല് നാലു ദിവസം കഴിഞ്ഞ് കുട്ടിയുടെ മരണത്തില് സംശയം ഉണ്ടെന്ന് ആരോ ഫോണില് പരാതിപ്പെട്ടു. ഇതേത്തുടര്ന്ന് മാതാപിതാക്കളായ ബസുദേവിനെയും പ്രതിഭാദേവിയെയും പോലീസ് കസ്റ്റഡിയിലെടുത്തു. ഇരുവരെയും കോടതിയില് ഹാജരാക്കി റിമാന്ഡ് ചെയ്തു. ഒരാഴ്ച കഴിഞ്ഞ് കൂട്ടുപോയ തനോജ്പ്രമോദിനെ പോലീസ് കസ്റ്റഡിയില് എടുത്തു. കുട്ടിയുടെ മരണത്തെക്കുറിച്ചുള്ള വിവരങ്ങള് ശേഖരിക്കാന് എന്നു പറഞ്ഞാണ് കൂട്ടിക്കൊണ്ട് പോയതെങ്കിലും പോലീസ് ഇയാളെയും കോടതിയില് ഹാജരാക്കി. ഒരു വര്ഷം കഴിഞ്ഞിട്ടും കോടതിയില് നിന്ന് ജാമ്യം എടുക്കാന് കഴിഞ്ഞിട്ടില്ല.
തനോജ്പ്രമോദിന്റെ മേല് ചുമത്തപ്പെട്ട കുറ്റം എന്താണെന്ന് പോലീസ് ഭാര്യയോടോ ബന്ധുക്കളോടോ വെളിപ്പെടുത്തുകയും ചെയ്തിട്ടില്ല. ഭാര്യ ആശ, മക്കളായ അഭയകുമാര്(10), കുശ്ബുകുമാരി (അഞ്ച്) എന്നിവരോടൊപ്പം ചെറിയനാട്ട് താമസിച്ച് ഭര്ത്താവിന്റെ മോചനം കാത്തുകഴിയുകയാണ്.
മറ്റു മക്കളായ രാജനന്ദിനി(12), ഗോള്ഡികുമാരി(എട്ട്), റോന്ഷന്കുമാരി(എട്ട്) എന്നിവര് ഭര്ത്താവിന്റെ ബന്ധുക്കള്ക്കൊപ്പം ബീഹാറിലാണ്. സാമ്പത്തിക പ്രയാസവും ഭാഷാപ്രശ്നവും മൂലം തങ്ങളുടെ ദുരവസ്ഥ മറ്റുള്ളവരെ ബോധ്യപ്പെടുത്താന് പോലും ഇവര്ക്ക് ആവുന്നില്ല.
https://www.facebook.com/Malayalivartha
