ഡി.സി.സി പുനസംഘടനയില്‍ എ ഗ്രൂപ്പിനെയും ഉമ്മന്‍ചാണ്ടിയെയും അവഗണിച്ചത് ഹൈക്കമാന്‍ഡ് തുടരുന്നതിനാല്‍ പാര്‍ട്ടി പരിപാടികളില്‍നിന്ന് വിട്ടുനില്‍ക്കുന്നതിന് പുറമേ മുന്‍ മുഖ്യമന്ത്രി ഉമ്മന്‍ ചാണ്ടി രാഷ്ട്രീയകാര്യ സമിതി അംഗത്വം രാജിവയ്ക്കണമെന്ന ആവശ്യം എ ഗ്രൂപ്പില്‍നിന്നുയരുന്നു. നിലവിലെ സാഹചര്യത്തില്‍ രാഷ്ട്രീയകാര്യസമിതി അംഗത്വം രാജിവച്ച് നേതൃത്വത്തിനുമേല്‍ ശക്തമായ സമ്മര്‍ദ്ദം ചെലുത്തണമെന്ന നിര്‍ദ്ദേശമാണ് എ ഗ്രൂപ്പ് നേതാക്കള്‍ ഉമ്മന്‍ ചാണ്ടിയോട് ആവശ്യപ്പെട്ടത്. എന്നാല്‍ ഗ്രൂപ്പ് നേതാക്കളുടെ ഈ നിര്‍ദ്ദേശത്തോട് ഉമ്മന്‍ ചാണ്ടി ഇതുവരെ അനുകൂലമായി പ്രതികരിച്ചിട്ടില്ല.

ഇതിനിടെ ഉമ്മന്‍ ചാണ്ടിയുടെ സൗകര്യവും സമയവും പരിഗണിച്ച് മാത്രമെ രാഷ്ട്രീയകാര്യ സമിതി യോഗം ചേരുകയുള്ളെന്ന് സുധീരന്‍ അറിയിച്ചിരുന്നു. എന്നാല്‍ തന്റെ സൗകര്യം ആരും പരിഗണിക്കേണ്ടതില്ലെന്നും യോഗം വിളിച്ചാല്‍ സൗകര്യമുണ്ടെങ്കില്‍ പങ്കെടുക്കുമെന്നുമുള്ള നിലപാടാണ് ഉമ്മന്‍ ചാണ്ടി സ്വീകരിച്ചത്. 14ന് യോഗം വിളിച്ചെങ്കിലും അതില്‍ ഉമ്മന്‍ചാണ്ടി പങ്കെടുത്തേക്കില്ല. നയരൂപവത്കരണത്തിനും പാര്‍ട്ടി പുനസംഘടനക്കുമായി ഹൈക്കമാഡിന്റെ നിര്‍ദ്ദേശപ്രകാരമാണ് കെ.പി.സി.സി രാഷ്ട്രീയകാര്യസമിതി രൂപീകരിച്ചത്. ഇതില്‍ ഉമ്മന്‍ ചാണ്ടി, സുധീരന്‍, രമേശ് ചെന്നിത്തല എന്നിവര്‍ ഉള്‍പ്പെടെ 21 അംഗങ്ങളാണുള്ളത്.

കേന്ദ്ര സംസ്ഥാന നേതൃത്വങ്ങള്‍ തന്നോട് കാട്ടിയ അവഗണനയ്‌ക്കെതിരായ പ്രതിഷേധത്തില്‍ അയവ് വരുത്താന്‍ ഉമ്മന്‍ ചാണ്ടിയോ ഗ്രൂപ്പ് നേതാക്കളോ ഇതുവരെ തയാറായിട്ടില്ല. എ.കെ ആന്റണി നേരിട്ടെത്തി അനുനയിപ്പിക്കാന്‍ ശ്രമിച്ചെങ്കിലും കടുത്ത നിലപാടുമായി മുന്നോട്ടു പോകുമെന്ന സൂചനയാണ് അദ്ദേഹം നല്‍കിയത്.

സുധീരനെ കെ.പി.സി.സി അധ്യക്ഷ സ്ഥാനത്ത് നിന്ന് നീക്കം ചെയ്ത് സംഘടനാ തെരഞ്ഞെടുപ്പ് അടിയന്തിരമായി നടത്തണമെന്നതാണ് എ ഗ്രൂപ്പിന്റെ നിലപാട്. ഇതില്‍ കുറഞ്ഞ ഒരു വിട്ടുവീഴ്ചയ്ക്കും തയാറാകേണ്ടതില്ലെന്നും ഗ്രൂപ്പ് നേതാക്കള്‍ തീരുമാനിച്ചിട്ടുണ്ട്.