മന്ത്രിക്കാണോ കേള്‍ക്കുന്ന തങ്ങള്‍ക്കാണോ കുഴപ്പം കുറച്ചുനേരം എല്ലാവരും കുഴങ്ങി.
റവന്യു ജില്ലാ സ്‌കൂള്‍ കലോത്സവം ഉദ്ഘാടനം ചെയ്യാനെത്തിയ മന്ത്രി എം.എം മണിയുടെ പ്രസംഗം കായികരംഗത്ത് ഇന്ത്യ വട്ടപ്പൂജ്യമാണെന്ന് വിശദമാക്കി കൊണ്ട്. കലാമേളയില്‍ വന്നിട്ട് കായികരംഗത്തെക്കുറിച്ചുളള മന്ത്രിയുടെ പ്രസംഗം കത്തിപ്പടരവെ സദസും വേദിയും ആശയക്കുഴപ്പത്തിലുമായി. സദസ്യരുടെ അന്താളിപ്പ് മനസിലാക്കിയെന്നവണ്ണം മണി സ്വതസിദ്ധശൈലിയില്‍ പ്രസംഗത്തിന്റെ റൂട്ട് തിരിച്ചുവിടുകയും അവസാനം കലാമേളയില്‍ കൊണ്ടെത്തിക്കുകയും ചെയ്തു.
തൊടുപുഴയില്‍ ഇടുക്കി റവന്യു ജില്ലാ സ്‌കൂള്‍ കലോത്സവത്തിന്റെ ഉദ്ഘാടനവേദിയിലാണ് ഇന്നലെ മന്ത്രിയുടെ പ്രസംഗം മാറിപ്പോയി എന്നവിധം കാര്യങ്ങള്‍ അരങ്ങേറിയത്. കലാമേള നടക്കുമ്പോള്‍ കായികമാമാങ്കത്തിന് ആശംസകള്‍ അര്‍പ്പിച്ചാണ് മന്ത്രിയുടെ ഉദ്ഘാടന പ്രസംഗം അരങ്ങേറിയത്. ''പി.ടി.ഉഷ, ഷൈനി ഏബ്രഹാം, പ്രീജ ശ്രീധരന്‍ തുടങ്ങിയ അപൂര്‍വം ചിലരുണ്ടായതൊഴിച്ചാല്‍ കായിക രംഗത്ത് ഇന്ത്യ വട്ടപ്പൂജ്യമാണ്. ആഫ്രിക്കന്‍ രാജ്യങ്ങള്‍ പോലും കായികരംഗത്ത് സ്വര്‍ണം വാരിക്കൂട്ടുമ്പോള്‍ ഇന്ത്യയ്ക്ക് വല്ല ഓടോ, വെങ്കലമോ കിട്ടിയാല്‍ കിട്ടിയെന്നു പറയാം. അമേരിക്ക, ചൈന, റഷ്യ ഉള്‍പ്പെടെയുള്ള രാജ്യങ്ങള്‍ കായികരംഗത്ത് ലോകത്ത് അഭിമാനമായി ഉയര്‍ന്നു നില്‍ക്കുമ്പോള്‍ ഇന്ത്യയുടെ സംഭാവന ഏറെ പിന്നിലാണ്. ഇങ്ങനെയായിരുന്നു മണിയുടെ പ്രസംഗത്തിന്റെ തുടക്കം.
മന്ത്രി എന്താണ് പറയുന്നതെന്ന് കേട്ട് സദസ് അന്തംവിട്ടിരിക്കെയാണ് കാര്യം മനസിലായെന്നവണ്ണം കലോത്സവത്തെപ്പറ്റി മണി സംസാരിച്ച് തുടങ്ങിയത്. എന്നാല്‍ ഇത് അധികം നീണ്ടുനിന്നതുമില്ല. വീണ്ടും മന്ത്രി കായികമേഖലയിലേക്ക് തന്നെ കടന്നു. കായികോല്‍സവങ്ങള്‍ക്കായി സംസ്ഥാന സര്‍ക്കാര്‍ 10,45,000 രൂപ മാറ്റിവച്ചിട്ടുണ്ടെന്നു പറഞ്ഞ മന്ത്രി വീണ്ടും കലാരംഗത്തെക്കുറിച്ച് സംസാരിച്ച് തുടങ്ങി. ഇത്തരം കലാമാമാങ്കത്തിലൂടെയാണ് എല്ലാവരും അറിയുന്ന വലിയ താരങ്ങളായിരിക്കുന്നതെന്നും അതിനാല്‍ കലാമാമാങ്കത്തിലൂടെ വലിയ പ്രതിഭകള്‍ ഉയര്‍ന്നു വരട്ടയെന്നും ആശംസിച്ചാണ് സദസിനെയും വേദിയെയും ഒരെപോലെ ആശയക്കുഴപ്പത്തിലാക്കിയ മന്ത്രി മണിയുടെ പ്രസംഗം അവസാനിച്ചത്.