ക്രോണിന്‍ ഉപദ്രവിച്ചതായി മിഷേല്‍ ഷാജി പറഞ്ഞിട്ടുണ്ടെന്ന് മിഷേലിന്റെ അടുത്ത സുഹൃത്ത്. മുന്‍പ് ഇതിലുമേറെ മാനസിക സമ്മര്‍ദങ്ങളിലൂടെ മിഷേല്‍ കടന്നുപോയിട്ടുണ്ട്. അതുകൊണ്ട് ആത്മഹത്യചെയ്യുമെന്നു കരുതുന്നില്ലെന്നും കേരളത്തിനു പുറത്തു പഠിക്കുന്ന സുഹൃത്ത് മനോരമ ന്യൂസിനോടു പറഞ്ഞു. കാണാതായ ദിവസം രാവിലെ വിളിച്ചിരുന്നുവെന്നും സന്തോഷത്തോടെയാണു സംസാരിച്ചതെന്നും സുഹൃത്ത് ഓര്‍മ്മിക്കുന്നു.

മിഷേലിന്റെ സുഹൃത്ത് മിഷേലിനെ കാണാതായ അഞ്ചിനു രാവിലെ ഈ സുഹൃത്തിനെ മിഷേല്‍ വിളിച്ചിരുന്നു. എന്നാല്‍ എല്ലാം തുറന്നു സംസാരിക്കാറുള്ള മിഷേല്‍, ക്രോണിനുമായി വഴക്കുണ്ടായെന്ന കാര്യം പറഞ്ഞില്ല. ക്രോണിന്‍ മിഷേലിനെ ഉപദ്രവിച്ചിട്ടുണ്ടെന്ന് ഈ പെണ്‍കുട്ടി പറയുന്നു. പക്ഷേ, മിഷേലിനെ ക്രോണിന്‍ ഇതിലും വലിയ മാനസിക സമ്മര്‍ദത്തിലാക്കിയിട്ടുണ്ട്. സ്വയം ജീവനൊടുക്കണമെങ്കില്‍ അന്നാകാമായിരുന്നുവെന്നും സുഹൃത്ത് പറഞ്ഞു. മിഷേല്‍ ആത്മഹത്യ ചെയ്യില്ലെന്നു തറപ്പിച്ചു പറയുന്ന സുഹൃത്തിന്റെ മൊഴി പൊലീസ് ഫോണില്‍ കേട്ടിരുന്നു. ക്രോണിന്റെ മാതാവും മിഷേലിനെ വിളിച്ചിരുന്നു. 

സുഹൃത്തിന്റെ മൊഴി 

''എന്നെ അഞ്ചാം തീയതി മോണിങ് വിളച്ചപ്പോള്‍ പ്രശ്‌നമൊന്നുമുണ്ടായിരുന്നില്ല. ഭയങ്കര ഹാപ്പിയായിട്ടാണ് സംസാരിച്ചത്. അപ്പോ അങ്ങനെയെന്തെങ്കിലും പ്രശ്‌നമുണ്ടെങ്കില്‍ പറയാതിരിക്കുമോ? ചിലപ്പോള്‍ അവള്‍ മറന്നു പോയതായിരിക്കും മേസേജിന്റെ കാര്യമൊക്കെ പറയാന്‍. പക്ഷേ എന്നാലും ടെന്‍ഷന്‍ ആയിട്ടൊന്നുമല്ല സംസാരിച്ചത്. ഭയങ്കര കൂളായിട്ടാ സംസാരിച്ചത്.

'അവള്‍ക്ക് ചെയ്യുവാണെങ്കില്‍ നേരത്തേ ചെയ്യാമായിരുന്നു. കാരണം ഇതിനു മുമ്പ് ഒരുപാടു പ്രശ്‌നം നേരത്തേ ഉണ്ടായിട്ടുണ്ട്. കാരണം എന്താന്നുവച്ചാല്‍ ഇവര് തമ്മില്‍ ഇതുപോലെ ഞങ്ങള്‍ പഠിച്ച സമയത്ത് ഒരു ദിവസം കാണാന്‍ വന്നിട്ടുണ്ടായിരുന്നു. അവര്‍ തമ്മില്‍ എന്തോ വഴക്കിട്ട ശേഷമാണ് അവന്‍ കാണാന്‍ വന്നത്. ഇവള്‍ ഫോണ്‍വിളിച്ചിട്ട് എടുത്തില്ല. ആ ദേഷ്യത്തിലാണ് ഇവളെ കാണാന്‍ വന്നത്. ആ സമയത്ത് ഇവരു തമ്മില്‍ സംസാരിക്കുമ്പോള്‍ ഇവളെ അടിച്ചിട്ടൊക്കെയുള്ളതാ. അപ്പോ അത്രേം വലിയ പ്രശ്‌നത്തിനിടയ്ക്ക് ഇവള് ഒന്നും ചെയ്യാതെ പിടിച്ചു നില്‍ക്കാമെങ്കില്‍ പിന്നെ ഇപ്പോഴാണോ പ്രശ്‌നം വരുന്നെ.

'അവള്‍ ആത്മഹത്യചെയ്യാനാണു പോകുന്നതെങ്കില്‍ ബാഗും കൊണ്ടെന്തിനാ പോകുന്നെ. പള്ളിയില്‍ പോയപ്പോള്‍ ബാഗ് കൊണ്ടല്ലേ പോയത്. അങ്ങനെ ആത്മഹത്യചെയ്യാന്‍ പോയ ആള് എന്തിനാ ബാഗ് കൊണ്ടുപോകുന്നെ. സാധാരണ ഇപ്പോ അവള്‍ പള്ളിയില്‍ പോയി കഴിയുവാണെങ്കില്‍ പ്രര്‍ഥിച്ച് കഴിയുമ്പോ പുറത്തിറങ്ങി കരയാറുള്ളതാ. ഞാനും അവളോടൊപ്പം ഇടയ്ക്കിടെ പള്ളി പോകാറുള്ളതാ. അവിടെ നിന്ന് പ്രാര്‍ഥിച്ച് കരഞ്ഞിട്ടൊക്കെ ഇറങ്ങുമായിരുന്നു. ഇപ്പോ യുഷ്വലി നോര്‍മലി ഒക്കെയായിട്ടാണ് ഇറങ്ങിയത്. ഒരു കുഴപ്പവുമുണ്ടായിരുന്നില്ല. ഞാന്‍ 27 ാം തീയതി വരുമ്പോള്‍ കാണാമെന്നൊക്കെ പറഞ്ഞിരുന്നതാ. മരിക്കാന്‍ പോകുന്ന ഒരാള്‍ അങ്ങനൊക്കെ പറയുമോ'