നടിയെ ആക്രമിച്ച കേസിലെ മുഖ്യപ്രതി പള്‍സര്‍ സുനിയുമായി അടുത്ത ബന്ധം പുലര്‍ത്തുന്ന സ്ത്രീയാണ് ഷൈനി തോമസെന്നു പോലീസ്. കടവന്ത്രയില്‍ വസ്ത്രവില്‍പന സ്ഥാപനം നടത്തിവരികയായിരുന്നു ഷൈനി. ചേര്‍ത്തല സ്വദേശിനിയായ ഇവര്‍ വര്‍ഷങ്ങളായി ഇവിടെ താമസിച്ചാണ് സ്ഥാപനം നടത്തിവരുന്നത്. ഇവരുടെ സ്ഥാപനത്തിലെ സ്ഥിരം സന്ദര്‍ശകനായിരുന്നു പള്‍സര്‍ സുനി. ഇവരുമായി അടുത്ത ബന്ധമായിരുന്നു സുനിക്കുണ്ടായിരുന്നത്. സുനിയും ഷൈനിയുമായി റിയല്‍ എസ്റ്റേറ്റ് ബിസിനിസുകളുമുണ്ടായിരുന്നു.

പള്‍സര്‍ സുനിയുടെ എല്ലാ ഇടപാടുകളെക്കുറിച്ചും ഷൈനിക്കറിയാമായിരുന്നു എന്നാണ് പോലീസ് പറയുന്നത്. സുനി മുമ്പും നടിമാരെ ഭീഷണിപ്പെടുത്തി പണം തട്ടിയ സംഭവങ്ങള്‍ ഷൈനിക്കറിയാമായിരുന്നു. ഇത്തരത്തില്‍ കൈക്കലാക്കിയ പണത്തില്‍ നിന്ന് ലക്ഷക്കണക്കിനു രൂപ ഷൈനിക്ക് സുനി നല്‍കിയതായും വിവരങ്ങളുണ്ടായിരുന്നു. ഒറ്റത്തവണ 10 ലക്ഷം രൂപ വരെ ഇവര്‍ക്കു നല്‍കിയതായി സുനി വെളിപ്പെടുത്തിയിരുന്നു. ഇതേത്തുടര്‍ന്നാണ് നടിയെ ആക്രമിച്ച സംഭവത്തില്‍ ഷൈനിക്കു പങ്കുണ്ടെന്നു പോലീസ് സംശയിച്ചത്. 

നടിയെ ആക്രമിച്ച കേസില്‍ സുനി പിടിയിലായപ്പോള്‍ ഇവരുടെ പേര് പുറത്തുവരാതിരിക്കാന്‍ പരമാവധി ശ്രമിച്ചിരുന്നു. സുനിയുടെ കാമുകിയുമായും ഷൈനിക്കു അടുത്ത ബന്ധമുണ്ടായിരുന്നു. ഇവരും സുനിയുടെ കാമുകിയും തമ്മിലുള്ളതെന്ന് കരുതുന്ന ഫോണ്‍ സംഭാഷണവും പുറത്തായിരുന്നു. നടിയെ ആക്രമിച്ച കേസില്‍ ഷൈനി തോമസിനു പങ്കുണ്ടെന്ന സംശയത്തിന്റെ പേരില്‍ പോലീസ് ഇവരെ ചോദ്യം ചെയ്തിരുന്നു. എന്നാല്‍ സുനി ഇവരുടെ മുന്‍ ഡ്രൈവറാണെന്നും പണമിടപാടുകളുമായി ബന്ധപ്പെട്ട ബന്ധം മാത്രമെ തങ്ങള്‍ തമ്മിലുള്ളുവെന്നും അവര്‍ മൊഴിനല്‍കിയിരുന്നു. ഇവരില്‍ നിന്നു കേസിനെ സഹായിക്കുന്ന വിവരങ്ങള്‍ ലഭിക്കാത്തതിനാല്‍ വിട്ടയക്കുകയായിരുന്നു.

നടിയെ ആക്രമിക്കുന്ന വിവരം ഷൈനിക്ക് നേരത്തെ അറിയാമായിരുന്നുവെന്നാണ് പോലീസ് കണക്കുകൂട്ടുന്നത്. സംഭവ ദിവസം രാത്രി സുനി ഷൈനിയെ സന്ദര്‍ശിച്ചതായും റിപ്പോര്‍ട്ടുകളുണ്ട്. എന്നാല്‍ ഇക്കാര്യത്തില്‍ സ്ഥിരീകരണമില്ല.