പൊരിവെയിലത്ത് മണിക്കൂറുകള്‍ ക്യൂ നില്‍ക്കുന്ന മദ്യപരുടെ ആത്മരോഷം അണ പൊട്ടുകയാണ്. ഇനിയുമീ മനുഷ്യത്വമില്ലായ്മ തുടര്‍ന്നാല്‍ ചോദ്യം ചെയ്യാനാണ് തീരുമാനം. വ്യാഴാഴ്ച കണ്ണൂര്‍ പയ്യന്നൂരില്‍ ചേരുന്ന വിശദീകരണ യോഗത്തില്‍ ഭരണകൂടവും നീതിപീഠവും പൊതുസമൂഹവും പുലര്‍ത്തുന്ന മനുഷ്യത്വരഹിത നിലപാടുകള്‍ മദ്യഉപഭോക്തൃ സംരക്ഷണ സമിതി(എം.യു.എസ്.എസ്) തുറന്നുകാട്ടും. കേരളത്തിലെ ജനസംഖ്യയുടെ നിര്‍ണ്ണായക ശതമാനം മദ്യ ഉപയോക്താക്കളാണെന്ന് സമിതി കണ്‍വീനര്‍ ദാമോദരന്‍ പറയുന്നു.

80 ലക്ഷത്തിലധികം വരുന്ന ഈ വിഭാഗത്തിന്റെ അടിസ്ഥാന ആവശ്യങ്ങള്‍ പരിഗണിക്കാതെ കരിഞ്ചന്ത വില്‍പ്പന നടത്തുകയാണ് സര്‍ക്കാര്‍. നല്ല മദ്യം ലഭ്യമാക്കുന്നില്ല. പേരില്‍ മാത്രമാണ് ഇവിടെ വിദേശമദ്യം. നാടന്‍ ഡിസ്റ്റിലറികളില്‍ നിര്‍മ്മിച്ച് ബിവറേജസ് കോര്‍പ്പറേഷന് നല്‍കുമ്‌ബോള്‍ ഇവയുടെ ഗുണനിലവാര പരിശോധന വേണ്ടുംവിധം നടത്താറില്ല. നല്ല മദ്യം ഉപയോക്താവിന്റെ അവകാശമാണ്. ലോകത്തില്ലാത്ത നികുതിയാണ് ഈടാക്കുന്നത്. 145 ശതമാനം വരെ നികുതിയുള്ള ഈ വില്‍പ്പന കരിഞ്ചന്ത തന്നെ. അതായത് 80 രൂപ അടിസ്ഥാനവിലയുള്ളത് വില്‍ക്കുന്നത് 300ലധികം രൂപയ്ക്ക്. ഇതൊന്നും കൂടാതെ യാചകരോ സൊമാലിയയിലെ പട്ടിണിപ്പാവങ്ങളോ ഭക്ഷണത്തിന് ക്യൂ നില്‍ക്കുന്ന പോലെ പൊരിവെയിലത്ത് മൂന്നും നാലും മണിക്കൂര്‍ ക്യൂ നില്‍ക്കുകയും വേണം. ഇത് ക്രൂരതയാണ്. ജീവനക്കാര്‍ക്കുള്ള ശമ്ബളവും പെന്‍ഷനും നല്‍കുന്നത് ഇവര്‍ വഴിയായിട്ടും യാതൊരു മാനുഷിക പരിഗണനയുമില്ലാതെയാണ് സര്‍ക്കാരിന്റെ പെരുമാറ്റമെന്നും ദാമോദരന്‍ പറയുന്നു.

മദ്യനിരോധനം ലോകത്തെങ്ങും നടന്നിട്ടില്ലാത്ത അപ്രായോഗിക ആശയമാണ്. മദ്യവര്‍ജ്ജനം പിന്നെയും നടപ്പാക്കാനായേക്കും. പാതയോരത്ത് മദ്യവില്‍പ്പന നനിരോധിച്ച കോടതി വിധി അസംബന്ധമാണ്. മദ്യപിക്കുന്നവര്‍ക്ക് യഥേഷ്ടം സൗകര്യമൊരുക്കുകയാണ് തങ്ങളുടെ മുഖ്യആവശ്യമെന്നും ഇതിനായി നിരവധി നിവേദനങ്ങള്‍ കൊടുത്തുകഴിഞ്ഞെന്നും അദ്ദേഹം പറയുന്നു. നിവേദനത്തിലെ ആവശ്യങ്ങളിങ്ങനെ: എല്ലാ ഷോപ്പിങ് മാളുകളിലെയും രണ്ടാമത്തെയോ മൂന്നാമത്തെയോ നിലയില്‍ ഔട്ട്‌ലെറ്റ് തുറക്കുക, വിതരണം സുതാര്യമാക്കുക, ഔട്ട്‌ലെറ്റിലെ കൗണ്ടറുകളുടെ എണ്ണം കൂട്ടുക, കൂടുതല്‍ ഔട്ട്‌ലെറ്റുകള്‍ തുറക്കുക, പ്രധാനപാതകളില്‍ കഴിയില്ലെങ്കില്‍ കഴിയുന്നിടത്ത് ഔട്ട്‌ലെറ്റുകള്‍ തുറക്കുക.ഈ ആവശ്യങ്ങള്‍ പൊതുജനത്തെയും സമൂഹത്തെയും ബോദ്ധ്യപ്പെടുത്താനാണ് കണ്ണൂര്‍ പയ്യന്നൂര്‍ ഷേണായീസ് സ്‌ക്വയറില്‍ വ്യാഴാഴ്ച വൈകിട്ട് നാലിന് യോഗം ചേരുന്നത്. സാംസ്‌കാരിക പ്രവര്‍ത്തകര്‍ ഭാഗമാകുമെന്നാണ് സമിതി പറയുന്നത്.