ഹരീഷ് സാല്വയെ ഇറക്കിയിട്ടും രക്ഷയില്ലാതെ പിണറായി
ടിപി സെന്കുമാറിനെ ക്രമസമാധാന ചുമതലയുള്ള ഡിജിപിയായി നിയമിക്കാന് സുപ്രിം കോടതി ഉത്തരവിട്ടു. സംസ്ഥാനത്തെ ക്രമസമാധാന ചുമതലയുള്ള ഡിജിപി സ്ഥാനത്തുനിന്ന് നീക്കിയ സര്ക്കാര് തീരുമാനം ശരിവെച്ച കേരള ഹൈക്കോടതി ഉത്തരവ് സുപ്രിം കോടതി റദ്ദാക്കി. ഈ കേസില് വാദത്തിന് മുതിര്ന്ന അഭിഭാഷകന് ഹരീഷ് സാല്വെയാണു സര്ക്കാരിനു വേണ്ടി സുപ്രീംകോടതിയില് ഹാജരായത്.
തന്നെ ഡിജിപി സ്ഥാനത്തുനിന്ന് നീക്കിയ സര്ക്കാര് നടപടി ചോദ്യം ചെയ്ത് സെന്കുമാര് സമര്പ്പിച്ച ഹര്ജി കേരള ഹൈക്കോടതി നേരത്തെ തള്ളിയിരുന്നു. ഇത് ചോദ്യം ചെയ്താണ് സെന്കുമാര് സുപ്രിം കോടതിയെ സമീപിച്ചത്. സെന്കുമാറിന് പദവി തിരികെ നല്കണമെന്നാണ് രണ്ടംഗ ബെഞ്ച് വിധിച്ചിരിക്കുന്നത്. ജസ്റ്റിസുമാരായ മദന് ബി ലോക്കൂര്, ദീപക് ഗുപ്ത എന്നിവരടങ്ങിയ ബെഞ്ചാണ് കേസില് വിധി പറഞ്ഞത്. അധ്യക്ഷനായ മദന് ബി ലോക്കൂര് ആണ് വിധി പ്രസ്താവം നടത്തിയത്. കേസില് കഴിഞ്ഞയാഴ്ച വാദം പൂര്ത്തിയായിരുന്നു.
പിണറായി സര്ക്കാര് അധികാരമേറ്റ് രണ്ടുദിവസത്തിനകം തന്നെ, ക്രമസമാധാന ചുമതലയുള്ള ഡിജിപി സ്ഥാനത്തുനിന്ന് മാറ്റാന് കാരണം സിപിഐഎമ്മിന് തന്നോടുള്ള രാഷ്ട്രീയ വൈരാഗ്യമാണെന്നാണ് സെന്കുമാര് ഹര്ജിയില് ആരോപിച്ചിരുന്നത്. എന്നാല് ജിഷ വധക്കേസ്, പുറ്റിങ്ങല് വെടിക്കെട്ടപകടം എന്നീ കേസുകളിലെ വീഴ്ചയാണ് മാറ്റാന് കാരണമെന്നാണ് സര്ക്കാര് വാദം. ഇതേത്തുടര്ന്ന് ഈ കേസുകളുമായി ബന്ധപ്പെട്ടുള്ള ഫയലുകള് ഹാജരാക്കാന് കോടതി സര്ക്കാരിന് നിര്ദേശം നല്കുകയും ചെയ്തിരുന്നു.
സുപ്രിം കോടതി വിധി സെന്കുമാറിന് അനുകൂലമായാല് സര്ക്കാരിനുള്ള വന് തിരിച്ചടിയാകും. കേസിന്റെ വിചാരണ വേളയില് സര്ക്കാരിനെതിരെ നിരവധി വിമര്ശനങ്ങള് കോടതി ഉന്നയിച്ചിരുന്നു. പൊലീസിന്റെ വീഴ്ച പരിഗണിച്ചാണ് സെന്കുമാറിനെ മാറ്റിയതെങ്കില്, ജിഷ്ണുവിന്റെ അമ്മ മഹിജ നടത്തിയ സമരത്തെ തുടര്ന്ന് ഡിജിപിയെ മാറ്റിയോ എന്ന് കോടതി പരിഹസിച്ചിരുന്നു.
പുറ്റിങ്ങല് കേസ് അന്വേഷണത്തില് ഡിജിപിയായിരുന്ന സെന്കുമാറിന് വീഴ്ചയുണ്ടായതായി ആഭ്യന്തര വകുപ്പ് സെക്രട്ടറിയായിരുന്ന ഇപ്പോഴത്തെ ചീഫ് സെക്രട്ടറി നളിനി നെറ്റോ സര്ക്കാരിന് റിപ്പോര്ട്ട് നല്കിയിരുന്നു. അതിനാല് കേസിലെ വിധി നളിനി നെറ്റോയ്ക്കും നിര്ണായകമാണ്. ഡിജിപിയായി നിയമിക്കപ്പെടുന്നവര്ക്ക് രണ്ടുകൊല്ലം തുടര്ച്ചയായി കാലാവധി ലഭിക്കുമെന്ന് ഉറപ്പു വരുത്തണമെന്ന് 2006 ല് പ്രകാശ്സിങ് കേസില് സുപ്രിം കോടതി ഉത്തരവിട്ടിരുന്നു. ഇതനുസരിച്ച് തനിക്ക് കാലാവധി നീട്ടിനല്കണമെന്ന് സെന്കുമാര് കോടതിയില് ആവശ്യപ്പെട്ടിരുന്നു. ഇക്കാര്യത്തിലും കോടതി നിലപാട് വ്യക്തമാക്കും. ഡിജിപി സ്ഥാനത്ത് നിന്നും മാറ്റിയതിനെതിരെ സെന്കുമാര് സമര്പ്പിച്ച ഹര്ജികള് നേരത്തെ കേന്ദ്ര അഡ്മിനിസ്ട്രേറ്റീവ് ട്രിബ്യൂണലും കേരള ഹൈക്കോടതിയും തള്ളിയിരുന്നു. ഇതേത്തുടര്ന്നാണ് സെന്കുമാര് സുപ്രിം കോടതിയെ സമീപിച്ചത്. സെന്കുമാര് ജൂണില് സര്വീസില് നിന്ന് വിരമിക്കുകയാണ്.
https://www.facebook.com/Malayalivartha
