സോളാര്‍ ജ്യുഡീഷ്യല്‍ അന്വേഷണ കമ്മീഷനെ ആര്‍ക്കും വേണ്ട. പ്രതിപക്ഷത്തിനും, ഭരണപക്ഷത്തിനും. എന്തിന്‌ പരാതിക്കാര്‍ക്കു പോലും വേണ്ട..! അങ്ങനെ സോളാര്‍ തട്ടിപ്പുകേസിലെ ജുഡീഷ്യല്‍ അന്വേഷണം പ്രതിസന്ധിയില്‍ . കമ്മിഷന്റെ കാലാവധി ഈ മാസം 28ന് അവസാനിക്കും. വോട്ടെടുപ്പിനു ശേഷം വിഷു, ഈസ്റ്റര്‍ എന്നിവ പ്രമാണിച്ചുള്ള പൊതു അവധികള്‍ വരുന്നതിനാല്‍ 21നു ശേഷം മാത്രമേ പരിഗണനാവിഷയങ്ങള്‍ ഉള്‍പ്പെടുന്ന വിജ്ഞാപനം പ്രസിദ്ധീകരിക്കാന്‍ സാധ്യതയുള്ളു എന്നതാണ് കമ്മിഷനെ വെട്ടിലാക്കിയിരിക്കുന്നത്.

21ന് വിജ്ഞാപനം ഇറക്കിയാല്‍ പോലും ഏഴു ദിവസം മാത്രമാണ് അന്വേഷണപൂര്‍ത്തീകരണത്തിന് കമ്മിഷനു ലഭിക്കുന്ന സമയം. തെരഞ്ഞെടുപ്പു കഴിയുന്നതുവരെ കമ്മിഷന്റെ പരിഗണനാവിഷയങ്ങള്‍ ഉള്‍പ്പെടുന്ന വിജ്ഞാപനം പുറത്തുവിടരുതെന്നു സര്‍ക്കാരിന്റെ നിര്‍ദേശമുണ്ട്.

കമ്മിഷനെ നിയോഗിച്ചുകൊണ്ടുള്ള വിജ്ഞാപനം മാത്രമാണ് ഇതുവരെ പുറത്തിറങ്ങിയത്. പരിഗണനാവിഷയങ്ങള്‍ ഉള്‍പ്പെടുത്തിയുള്ള വിജ്ഞാപനം ദിനപ്പത്രങ്ങളിലും ഗസറ്റിലും പരസ്യം നല്‍കണം. ഇക്കാര്യം ജസ്റ്റിസ് ശിവരാജന്‍ നിരവധി തവണ സര്‍ക്കാരിനോട് ആവശ്യപ്പെട്ടിരുന്നു.

കമ്മിഷനെ നിയോഗിച്ചിട്ട് ആറുമാസം കഴിഞ്ഞു. ഇതുവരെ ലഭിച്ചത് ഒരു പരാതി മാത്രം. സര്‍ക്കാര്‍ വിജ്ഞാപനം ചെയ്ത വിഷയങ്ങളിലാണ് കമ്മിഷന്‍ അന്വേഷണം പൂര്‍ത്തിയാക്കേണ്ടത്. സിവില്‍ കോടതിയുടെ അധികാരങ്ങളാണ് കമ്മിഷന് നല്‍കിയിട്ടുള്ളത്.

സോളാര്‍ കേസിലെ ആരോപണങ്ങളില്‍ ഉള്‍പ്പെട്ട ഇടപാടുകളുമായി ബന്ധപ്പെട്ട് സര്‍ക്കാരിന് നഷ്ടം സംഭവിച്ചിട്ടുണ്ടോ, പരാതികള്‍ കൈകാര്യം ചെയ്യുന്നതില്‍ വീഴ്ച സംഭവിച്ചിട്ടുണ്ടോ എന്നുള്ള കാര്യങ്ങളാണ് അന്വേഷിക്കുക. സിറ്റിംഗ് ജഡ്ജി കമ്മിഷനായി പ്രവര്‍ത്തിക്കാത്തതിനാല്‍ അതുമായി സഹകരിക്കേണ്ടെന്നാണ് സി.പി.എം. നിലപാട്. മുഖ്യമന്ത്രിയും ഓഫീസും അന്വേഷണ പരിധിയില്‍ ഉള്‍പ്പെടുമെന്ന് അറിയിച്ചിരുന്നു. 2005 മുതലുള്ള സോളാര്‍ തട്ടിപ്പുകള്‍ കമ്മിഷന്റെ പരിഗണനയിലുണ്ട്.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha