നൗഷാദിന്റെ ഭാര്യ സഫ്രീനക്ക് സര്‍ക്കാര്‍ ജോലി
കോഴിക്കോട് മാന്‍ഹോള്‍ ദുരന്തത്തിനിരയായവരെ രക്ഷിക്കാന്‍ ശ്രമിക്കുന്നതിനിടെ മരിച്ച നൗഷാദിന്റെ ഭാര്യ സഫ്രീന സര്‍ക്കാര്‍ ജോലിയില്‍ പ്രവേശിച്ചു. 2015 നവംബര്‍ 26നാണ് രണ്ട് മനുഷ്യരുടെ ജീവന്‍ രക്ഷിക്കാനായി മാന്‍ഹോളിലേക്ക് ഇറങ്ങിയ ഓട്ടോ ഡ്രൈവര്‍ മാളിക്കടവ് മേപ്പക്കുടി നൗഷാദ് മരണപ്പെടുന്നത്.
കോഴിക്കോട് സിവില്‍സ്‌റ്റേഷനിലാണ് സഫ്രീനയുടെ ആദ്യ നിയമനം. നൗഷാദിന്റെ മാതാവ് അസ്മാബി, സഫ്രീനയുടെ പിതാവ് ഹംസക്കോയ, മാതാവ് സുഹറ, അമ്മാവന്‍ എന്നിവര്‍ക്കൊപ്പമെത്തിയാണ് സഫ്രീന ജോലിയില്‍ പ്രവേശിച്ചത്. സഫ്രീനയെ സ്വീകരിക്കാന്‍ സിവില്‍സ്‌റ്റേഷനിലെ ജീവനക്കാരും ഒത്തുകൂടി. റവന്യൂ വകുപ്പില്‍ എല്‍.ഡി ക്ലര്‍ക്കായാണ് സഫ്രീനയുടെ നിയനം. മുഖ്യമന്ത്രിയുടെ ദുരിതാശ്വാസ പദ്ധതിയിലേക്കുള്ള ചില വിവരങ്ങള്‍ ചേര്‍ക്കുകയാണ് ആദ്യ ദിവസം ചെയ്ത്.
വെള്ളിയാഴ്ചയാണ് തപാലില്‍ നിയമന ഉത്തരവ് ലഭിച്ചത്. ഒരാഴ്ച മുമ്പ് എന്‍.ജി.ഒ യൂനിയന്‍ പ്രതിനിധികള്‍ ജോലി യാഥാര്‍ഥ്യമാകുമെന്ന പ്രതീക്ഷ നല്‍കിയിരുന്നു. കോഴിക്കോട് നഗരത്തിലെ കണ്ടംകുളം റോഡില്‍ കെ.എസ്.യു.ഡി.പിയുടെ മാന്‍ഹോള്‍ വൃത്തിയാക്കുന്നതിനിടെ പിടഞ്ഞുമരിച്ച ആന്ധ്ര സ്വദേശികളെ രക്ഷിക്കാനുള്ള ശ്രമത്തിനിടെയാണ് നൗഷാദും മരണമടഞ്ഞത്. പിറ്റേന്നുതന്നെ വീട്ടിലെത്തിയ അന്നത്തെ മുഖ്യമന്ത്രി ഉമ്മന്‍ ചാണ്ടി, നൗഷാദിന്റെ ഭാര്യക്ക് ജോലി നല്‍കുമെന്ന് ഉറപ്പുനല്‍കിയിരുന്നു. നഷ്ടപരിഹാരമായി ഭാര്യക്കും മാതാവ് അസ്മാബിക്കും അഞ്ച് ലക്ഷം രൂപ വീതവും പ്രഖ്യാപിച്ചു. തുക നല്‍കിയെങ്കിലും ജോലിയുടെ കാര്യം ഒന്നുമായിരുന്നില്ല.
പുതിയ മുഖ്യമന്ത്രി പിണറായി വിജയന്‍, എം.കെ. രാഘവന്‍ എം.പി, എം.എല്‍.എമാരായ എ.കെ. ശശീന്ദ്രന്‍, എ. പ്രദീപ് കുമാര്‍, ഡോ. എം.കെ. മുനീര്‍ എന്നിവരോടെല്ലാം പലതവണയായി കുടുംബം ഇക്കാര്യം ശ്രദ്ധയില്‍പെടുത്തിയിരുന്നു. ഇവരുടെയെല്ലാം ശ്രമഫലമായാണ് നൗഷാദിനുള്ള നാടിന്റെ സ്മരണാഞ്ജലിയായി ജോലി യാഥാര്‍ഥ്യമായത്.
https://www.facebook.com/Malayalivartha
