സര്‍ക്കാര്‍ മദ്യനയം പ്രഖ്യാപിച്ചതിന് മാസങ്ങള്‍ക്കുമുമ്പ് കെ പി സി സി അധ്യക്ഷ സ്ഥാനത്ത് നിന്നും വി എം സുധീരനോട് മാറി നില്‍ക്കാന്‍ ഹൈക്കമാന്റ് ആവശ്യപ്പെട്ടത് സോണിയാ ഗാന്ധിയും സീതാറാം യച്ചൂരിയും തമ്മിലുണ്ടായ രഹസ്യധാരണയുടെ ഫലമാണെന്ന് സൂചന.
കേരളത്തിലെ മദ്യനയം പ്രഖ്യാപിക്കുന്നതിനു മുമ്പ് സീതാറാം യച്ചൂരിയും സോണിയയും തമ്മില്‍ ധാരണയിലെത്തിയിരുന്നു. മദ്യനയം സംബന്ധിച്ച് ഒരു പ്രകടനം പോലും കോണ്‍ഗ്രസ് നടത്തരുത് എന്ന ആവശ്യമാണ് യച്ചൂരി സോണിയക്ക് മുമ്പില്‍ വച്ചത്. മകനെ ഒരു കരയിലെത്തിക്കാന്‍ പെടാപാടുപെടുന്ന അമ്മക്ക് ഇപ്പോള്‍ യച്ചൂരിയുടെ സഹായം കുടിയേ തീരൂ. സുധീരനെ മാറ്റണമെന്നായിരുന്നു യച്ചൂരിയുടെ പ്രധാന ആവശ്യം. ഇല്ലെങ്കില്‍ സര്‍ക്കാര്‍ നയം സുധീരന്‍ അനുസരിക്കണം. മദ്യ നയത്തെ പിന്‍താങ്ങി ഷിബു ആദ്യ വെടി പൊട്ടിച്ചതോടെ കോണ്‍ഗ്രസ് നേതാക്കളും പ്രതിരോധത്തിലായി.
സോണിയയും രാഹുലും സുധീരനെ ഡല്‍ഹിക്ക് വിളിപ്പിച്ച് കോണ്‍ഗ്രസ് നേരിടുന്ന പ്രതിസന്ധികളെ കുറിച്ച് വാചാലമായി. ഒടുവിലാണ് സി പി എം സഹകരണത്തിന്റെ കാര്യം പറഞ്ഞത്. പുര നിറഞ്ഞു നില്‍ക്കുന്ന രാഹുലിന് ഇന്ത്യാമഹാരാജ്യത്തെ കെട്ടിച്ചു കൊടുക്കണമെങ്കില്‍ ഇടതുപാര്‍ട്ടികളുടെ പിന്തുണക കൂടിയേ തീരൂ. അതിന് കേരളത്തില്‍ ബാറുകള്‍ തുറക്കാനുള്ള തീരുമാനത്തിനെതിരെ ശക്തമായി രംഗത്തിറങ്ങരുത്. എന്നാല്‍ സുധീരന്‍ സമ്മതിച്ചില്ല. ആന്റണി സംസാരിച്ചപ്പോള്‍ സുധീരന്‍ പൊട്ടിത്തെറിക്കുകയാണ് ചെയ്തത്. എങ്കില്‍ കെ പി സി സി അധ്യക്ഷ സ്ഥാനം ഒഴിയാന്‍ ആന്റണി ഉപദേശിച്ചു.
റബര്‍ സ്റ്റാമ്പ് ആയ ഹസനെ പ്രസിഡന്റാക്കിയതും ബാറുകള്‍ തുറക്കുന്നതിനു വേണ്ടിയാണ്. ഉമ്മന്‍ ചാണ്ടി പ്രസിഡന്റാകാതിരുന്നതും ബാര്‍ തുറക്കല്‍ കര്‍മ്മത്തിന് തടസം വരാതിരിക്കാന്‍ വേണ്ടിയാണ്.
മദ്യനയം പ്രഖ്യാപിച്ച ദിവസം കോണ്‍ഗ്രസ് ഒരു പന്തം കൊളുത്തി പ്രകടനം പോലും നടത്താത്തത് ഇതുകൊണ്ടാണ്. കോണ്‍ഗ്രസ് നേതാക്കള്‍ ഒരു പ്രസ്താവന പോലും ഇറക്കിയത് വളരെ പ്രയാസപ്പെട്ടാണ്.
സി പി എമ്മിനും കോണ്‍ഗ്രസിനും ഇപ്പോള്‍ ഒരു പൊതു ശത്രു മാത്രമാണ് ഉള്ളത്. അത് സാക്ഷാല്‍ നരേന്ദ്ര മോദിയാണ്. അദ്ദേഹത്തെയും ബി ജെ പിയെയും തകര്‍ക്കാനാണ് സഖാക്കളും ഖദറുകാരും രംഗത്തുള്ളത്.
കെ.എം.മാണിക്കെതിരെ കേരളത്തില്‍ ഘോര ഘോരം പ്രസംഗിക്കുന്ന കോണ്‍ഗ്രസ് നേതാക്കന്‍മാര്‍ ജോസ് കെ മാണി എം.പി സോണിയാ ഗാന്ധിയുടെ വലത്തേയറ്റത്തിരുന്ന് പെപ്‌സി കുടിക്കുന്ന പടം ടിവി യില്‍ കണ്ട് വെള്ളമിറക്കി. കെ.എം.മാണി ഇടതു പാളയത്തിലെത്തിയാലും ഖദറിട്ട സഖാക്കള്‍ക്ക് ഇപ്രകാരം വെള്ളം ഇറക്കാനേ കഴിയുകയുള്ളു. എങ്ങനായാലും ബാറുകള്‍ തുറന്നല്ലോ അതുമതി എല്ലാപാര്‍ട്ടിക്കാര്‍ക്കും. കാരണം പിരിവ് നല്‍കുന്നത് അവരാണല്ലോ എല്ലാവര്‍ക്കും.
ഇന്ത്യയില്‍ സംഭവിക്കുന്നത് മതേതര സഖ്യങ്ങള്‍ കല്യാണം കഴിക്കുന്ന കാഴ്ചയാണ്. എല്ലാം എന്റെ പ്രിയ മകന്‍ രാഹുലന് വേണ്ടി. യു സി എഫ് യോഗം കഴിഞ്ഞ് ഹസന്‍ പറയുന്ന കേട്ട് ആരും ഭയക്കരുത്. അതെല്ലാം ഉണ്ടയില്ലാ വെടികളായിരിക്കും. അതായത് കോണ്‍ഗ്രസും കമ്മ്യൂണിസ്റ്റും ഒരേ മുന്നണിയില്‍ മത്സരിക്കുന്ന കാലം വിദൂരത്തിലല്ലെന്ന് ചുരുക്കം.