കെഎസ്ആര്ടിസി എം പാനല് ജീവനക്കാരെ കൂട്ടത്തോടെ പിരിച്ചുവിട്ടു
സാമ്പത്തിക പ്രതിസന്ധിയെ തുടര്ന്ന് കെഎസ്ആര്ടിസി ഡിപ്പോകളില്നിന്നും എം പാനല് (താല്ക്കാലിക ജീവനക്കാര്) ജീവനക്കാരെ കൂട്ടത്തോടെ പിരിച്ചുവിട്ടു. മാവേലിക്കര, ആലുവ, കോഴിക്കോട്, എടപ്പാള് തുടങ്ങിയ റീജനല് വര്ക് ഷോപ്പുകളിലെ ജീവനക്കാരോട് ശനിയാഴ്ച മുതല് ജോലിക്ക് വരേണ്ടെന്നാണ് ഉത്തരവ് നല്കിയത്. പത്തുവര്ഷം പൂര്ത്തിയാക്കിയ താല്ക്കാലിക ജീവനക്കാര്ക്കെതിരെയാണ് നടപടിഎടുത്തത്.
ജീവനക്കാര്ക്ക് ലഭിച്ച നിര്ദേശത്തില് കൊടുത്തിരിക്കുന്നത് ഇങ്ങനെയാണ്. 'കെഎസ്ആര്ടിസിയില് നിലവില് ഷാസികളുടെ ലഭ്യത കുറവിനാലും കാര്യാലയത്തിലെ ബസ്ബോഡി നിര്മാണം നിര്ത്തി വച്ചിരിക്കുന്ന സാഹചര്യത്തില് ഇതുമായി ബന്ധപ്പെട്ട നിലവിലുള്ള എംപാനല് ജീവനക്കാരെ മാറ്റുന്നു. 06-06-2017ന് കേന്ദ്രകാര്യാലയത്തില് വച്ച് നടത്തിയ അവലോകന യോഗത്തില് നിന്നും ലഭിച്ച നിര്ദേശത്തിന്റെ അടിസ്ഥാനത്തിലാണ് നടപടി. ഒഴിയുന്ന ജീവനക്കാര് തങ്ങളുടെ ഡ്യൂട്ടി പാസ്, ബയോമെട്രിക് ഐഡി കാര്ഡ് എന്നിവ പാസ് സെക്ഷനില് ഏല്പ്പിക്കേണ്ടതാണ്'.
മാവേലിക്കര റീജിനല് വര്ക്ഷോപ്പിലെ എം പാനല് ജീവനക്കാരായ 65 പേരെയാണ് കൂട്ടത്തോടെ പിരിച്ചുവിട്ടത്. സാമ്പത്തിക പ്രതിസന്ധിയാണെന്നും ചൂണ്ടിക്കാട്ടിയാണു നടപടി. ആലുവയില് 55 പേരെയും പിരിച്ചുവിട്ടു. കോഴിക്കോട്, എടപ്പാള് എന്നിവിടങ്ങളിലും ജീവനക്കാര്ക്കെതിരെ നടപടിയുണ്ടായി.
https://www.facebook.com/Malayalivartha