നടിയെ ആക്രമിച്ച കേസില് പ്രതീഷ് ചാക്കോയെ ഇന്നു ചോദ്യം ചെയ്യും; കുറ്റകൃത്യങ്ങള് ബോധ്യപ്പെട്ടാല് അറസ്റ്റ്
നടിയെ ആക്രമിച്ച കേസില് ഒന്നാംപ്രതി സുനില്കുമാറിന്റെ (പള്സര് സുനി) മുന് അഭിഭാഷകനായ പ്രതീഷ് ചാക്കോ ഇന്ന് അന്വേഷണ ഉദ്യോഗസ്ഥന് മുന്പാകെ ഹാജരാകും. മുന്കൂര് ജാമ്യഹര്ജി പരിഗണിക്കവെ പ്രതീഷ് ചാക്കോയുടെ അഭിഭാഷകന് ഇക്കാര്യം അറിയിച്ചതു രേഖപ്പെടുത്തിയ കോടതി, ഹര്ജി നടപടി തീര്പ്പാക്കി.
നടിയുടെ ദൃശ്യങ്ങള് പകര്ത്താന് ഉപയോഗിച്ച മൊബൈല് ഫോണ് അഭിഭാഷകനായ പ്രതീഷ് ചാക്കോയുടെ ഓഫിസിലെത്തി കൈമാറിയെന്നു സുനില് പൊലീസിനു മൊഴി നല്കിയിരുന്നു. തുടര്ന്ന്, ക്രിമിനല് നടപടി ചട്ടം 41 (എ) പ്രകാരം ചോദ്യം ചെയ്യലിനു ഹാജരാകാന് അന്വേഷണ സംഘം നോട്ടിസ് നല്കിയ സാഹചര്യത്തിലാണു ഹര്ജി.
നിലവില് പ്രോസിക്യൂഷന് നല്കിയിട്ടുള്ള രേഖകള് പ്രകാരം ഹര്ജിക്കാരനെതിരെ ജാമ്യം ലഭിക്കാവുന്ന വകുപ്പുകളാണുള്ളതെന്നു കോടതി വിലയിരുത്തി. അതിനാല് മുന്കൂര് ജാമ്യഹര്ജിക്കു പ്രസക്തിയില്ലെന്നും ചൂണ്ടിക്കാട്ടി.
എന്നാല് ക്രിമിനല് നടപടി ചട്ടം 41 എ (2) അനുസരിച്ച്, ചോദ്യം ചെയ്യലിനിടെ ജാമ്യമില്ലാ വകുപ്പുകള് പ്രകാരമുള്ള കുറ്റകൃത്യങ്ങള് ബോധ്യപ്പെട്ടാല് കാരണം രേഖപ്പെടുത്തി അറസ്റ്റ് സാധ്യമാണെന്നു പ്രോസിക്യൂഷന് ബോധിപ്പിച്ചതു കോടതി രേഖപ്പെടുത്തി.
https://www.facebook.com/Malayalivartha
