കേന്ദ്ര നേതൃത്വത്തിന്റെ രൂക്ഷ വിമര്‍ശനത്തിന് ഇടയായതോടെ കേരള ഘടകം പ്രതിസന്ധിയില്‍. പാര്‍ട്ടിയില്‍ ശുദ്ധികലശമാണ് കേന്ദ്രത്തിന്റെ ലക്ഷ്യം. ബിജെപി നേതാക്കള്‍ക്കെതിരെ ഉയര്‍ന്ന മെഡിക്കല്‍ കോഴ ആരോപണം സംസ്ഥാന ബിജെപി നേതൃത്വത്തിലെ ചേരിപ്പോര് രൂക്ഷമാക്കുന്നു. കേന്ദ്രനേതൃത്വത്തിന്റെ കര്‍ശന നടപടികളെ തുടര്‍ന്ന് കെട്ടടങ്ങിയ വിഭാഗീയത വീണ്ടും ആളിക്കത്തിച്ചാണ് പുതിയ വിവാദങ്ങള്‍ ഉണ്ടായിരിക്കുന്നത്.
വിവാദങ്ങളുടെ പശ്ചാത്തലത്തില്‍ സംസ്ഥാന അധ്യക്ഷന്‍ കുമ്മനം രാജശേഖരനെ ഡല്‍ഹിക്ക് വിളിപ്പിച്ചേക്കും എന്നാണ് വിവരം. ആരോപണവിധേയനായ സംസ്ഥാന ജനറല്‍ സെക്രട്ടറി എം.ടി.രമേശ് അമിത് ഷായെ നേരില്‍ കണ്ട് കാര്യങ്ങള്‍ വിശദീകരിക്കാന്‍ തീരുമാനിച്ചിട്ടുണ്ട്. തന്റെ നിരപരാധിത്വം കേന്ദ്ര നേതൃത്വത്തെ ബോധ്യപ്പെടുത്താന്‍ സാധിക്കും എന്ന പ്രതീക്ഷയാണ് അടുപ്പമുള്ളവരോട് എംടി രമേശ് പങ്കുവയ്ക്കുന്നത്. സംസ്ഥാന നേതൃത്വം കാര്യക്ഷമമായല്ല പ്രവര്‍ത്തിക്കുന്നത് എന്ന് വരുത്തി തീര്‍ക്കാന്‍ ഒരു വിഭാഗം ശ്രമിക്കുന്നുണ്ടെന്നും പുതിയ വിവാദങ്ങള്‍ക്ക് പിന്നില്‍ ഇവരാണെന്നുമുള്ള കാര്യമായിരിക്കും എംടി രമേശ് അമിത് ഷായോട് വിശദീകരിക്കുക.
അതേസമയം മെഡിക്കല്‍ കോഴ അന്വേഷണത്തില്‍ പുറത്തായത് ബിജെപിയുടെ ഔദ്യോഗിക അന്വേഷണ കമ്മീഷന്‍ റിപ്പോര്‍ട്ടെന്ന് കേന്ദ്ര നേതൃത്വം സ്ഥിരീകരിച്ചു. പാര്‍ട്ടിക്ക് ദേശീയ തലത്തില്‍ അവമതിപ്പുണ്ടാക്കിയ രേഖാ ചോര്‍ച്ചയില്‍ കേന്ദ്ര നേതൃത്വം അന്വേഷണം നടത്തും. ബിജെപിയുടെ രാജ്യസഭാ അംഗവും ഏഷ്യാനെറ്റ് ചെയര്‍മാനുമായ രാജീവ് ചന്ദ്രശേഖറില്‍ നിന്ന് വിശദീകരണം തേടാനും ബിജെപി ദേശീയ അധ്യക്ഷന്‍ അമിത് ഷാ തീരുമാനിച്ചു. ഒരു കാലത്ത് ഏഷ്യാനെറ്റ് ന്യൂസ് ബിജെപിയെ കടന്നാക്രമിച്ചു. അന്ന് ഇത്തരം ഇടപെടലുകളില്‍ നിന്ന് പിന്മാറാണമെന്ന് രാജീവിനോട് അമിത് ഷാ ആവശ്യപ്പെട്ടു. അതിന് ശേഷമാണ് എ്ന്‍ഡിഎയുടെ വൈസ് ചെയര്‍മാനായി രാജീവ് ചന്ദ്രശേഖറിനെ ഉയര്‍ത്തിയത്.ഈ ബന്ധത്തിനാണ് വിള്ളല്‍ വരുന്നത്. രാജീവിനെ കേന്ദ്രമന്ത്രിയാക്കാനും നീക്കമുണ്ടായിരുന്നു. തിരുവനന്തപുരം ലോക്‌സഭാ മണ്ഡലത്തില്‍ സ്ഥാനാര്‍ത്ഥിയാക്കാനും പരിഗണിച്ചു. എന്നാല്‍ ബിജെപി സംസ്ഥാന അധ്യക്ഷന്‍ കുമ്മനം രാജശേഖരനെ കളിയാക്കുന്ന തരത്തില്‍ ഏഷ്യാനെറ്റ് വാര്‍ത്ത നല്‍കിയത് അമിത് ഷായെ പ്രകോപിപ്പിച്ചു. അഴിമതിക്കെതിരെ ശക്തമായ നിലപാട് എടുത്ത കുമ്മനത്തെ മോശക്കാരനാക്കിയതിന്റെ രാഷ്ട്രീയം രാജീവിനെ തിരിഞ്ഞു കുത്തും. ഇതോടെ ബിജെപി ദേശീയ നേതൃത്വവുമായി രാജീവിന് അകലം കൂടും. അതിനിടെ ഏഷ്യാനെറ്റിന് റിപ്പോര്‍ട്ട് എങ്ങനെ കിട്ടിയെന്ന് രാജീവ് ചന്ദ്രശേഖറിനോട് അമിത് ഷാ നേരിട്ട് വിശദീകരണം തേടും. ഇതും രാജീവിന്റെ രാഷ്ട്രീയ മോഹങ്ങള്‍ക്ക് തിരിച്ചടിയാകും. റിപ്പോര്‍ട്ട് ചോര്‍ച്ചയെ അതീവ ഗൗരവത്തോടെയാണ് അമിത് ഷാ കാണുന്നത്. ഉടന്‍ കേന്ദ്രതീരുമാനമെന്നാണ് റിപ്പോര്‍ട്ട്.