സംസ്ഥാനത്തെ മുഴുവന്‍ ഭവനരഹിതര്‍ക്കും 2021 ഓടെ വീട് നിര്‍മ്മിച്ചു നല്‍കുമെന്ന് മന്ത്രി കെ.ടി. ജലീലിനുവേണ്ടി മന്ത്രി സി. രവീന്ദ്രനാഥ് നിയമസഭയില്‍ അറിയിച്ചു. കേന്ദ്ര സംസ്ഥാന സര്‍ക്കാരുകളുടെ വിവിധ ഭവനപദ്ധതികളുടെ ഫണ്ടുകള്‍ ക്രോഡീകരിച്ച് വീടുകള്‍ നിര്‍മ്മിച്ച നല്‍കാനാണ് ലക്ഷ്യമിടുന്നത്.

ലൈഫ് പാര്‍പ്പിട പദ്ധതിയുടെ ഗുണഭോക്താക്കളെ കണ്ടെത്തുന്നതിനുള്ള സര്‍വേ പൂര്‍ത്തിയായി. പരാതി പരിഹരിച്ച് അന്തിമ പട്ടിക സെപ്തംബര്‍ 25ന് പ്രസിദ്ധീകരിക്കുമെന്നും മന്ത്രി അറിയിച്ചു.

സംസ്ഥാനത്ത് 90,000 ഹെക്ടര്‍ തരിശ് ഭൂമി കൃഷി ചെയ്യുന്നതിന് അനുയോജ്യമാണെന്ന് കാര്‍ഷിക സര്‍വകലാശാല കണ്ടെത്തിയതായി മന്ത്രി വി.എസ്. സുനില്‍കുമാര്‍ അറിയിച്ചു. ഇവ ഏറ്റെടുത്ത് കൃഷി ചെയ്യുന്നതിന് ജില്ലാ കളക്ടര്‍ക്ക് അധികാരമുണ്ട്. ഇത്തരം ഭൂമി പിടിച്ചെടുത്ത് കൃഷി ചെയ്യുന്നതിന് പകരം ഭൂമിയുടെ ഉടമസ്ഥാവകാശം നിലനിര്‍ത്തി അവടുടെ അനുമതിയോടെ കൃഷിചെയ്യുന്നതിന് ആവശ്യമായ നിയമഭേദഗതി സര്‍ക്കാര്‍ ആലോചിക്കുകയാണ്.
സംസ്ഥാനത്തെ 63 വിത്ത് ഉദ്പാദനകേന്ദ്രങ്ങള്‍ നവീകരിക്കുന്നതിന് ഒരു ഏജന്‍സിയെ ചുമതലപ്പെടുത്തിയിട്ടുണ്ട്. ആദ്യഘട്ടത്തില്‍ 5 ഫാമുകള്‍ നവീകരിക്കും. മികച്ച നിലവാരമുള്ള വിത്തും നടീല്‍ വസ്തുക്കളും ഉദ്പാദിപ്പിക്കുകയാണ് ലക്ഷ്യം. ഉപ്പുവെള്ളം കയറിയാലും നശിക്കാത്ത നാലിനം പുതിയ നെല്‍വിത്തുകള്‍കൂടി കാര്‍ഷിക സര്‍വകലാശാല പുറത്തിറക്കിയിട്ടുണ്ട്.

വിഴിഞ്ഞം തുറമുഖ നിര്‍മ്മാണത്തിനും അനുബന്ധ ആവശ്യങ്ങള്‍ക്കുമായി 12.06 ഹെക്ടര്‍ ഭൂമികൂടി ഏറ്റെടുത്ത് കൈമാറാനുണ്ടെന്ന് മന്ത്രി രാമചന്ദ്രന്‍ കടന്നപ്പള്ളി അറിയിച്ചു. ഇതിനുള്ള നടപടികള്‍ പുരോഗമിക്കുകയാണ്. ഭൂമി ഏറ്റെടുക്കുന്നതിനായി 609 കോടി രൂപ ചെലവഴിച്ചിട്ടുണ്ട്. നിര്‍മ്മാണ പ്രവര്‍ത്തനങ്ങള്‍ വിലയിരുത്തിയതിന്റെ അടിസ്ഥാനത്തില്‍ കരാറില്‍ നിഷ്‌കര്‍ഷിച്ചിട്ടുള്ള കാലയളവില്‍തന്നെ തുറമുഖ നിര്‍മ്മാണം പൂര്‍ത്തിയാക്കാന്‍ കഴിയും.

2016 ഏപ്രില്‍ ഒന്നുമുതല്‍ ഇക്കഴിഞ്ഞ മാര്‍ച്ച് 31 വരെ ഗതാഗതനിയമം തെറ്റിച്ചവരില്‍ നിന്ന് കോമ്പൗണ്ടിങ് ഫീസിനത്തില്‍ 84കോടി രൂപ പിരിച്ചെടുത്തിട്ടുണ്ടെന്ന് മന്ത്രി തോമസ് ചാണ്ടി അറിയിച്ചു. ജനുവരി ഒന്നിനുശേഷം ചെക്ക്‌പോസ്റ്റുകളിള്‍ കൈക്കൂലി വാങ്ങിയെന്ന പരാതിയിന്‍മേല്‍ 8 മോട്ടോര്‍ വാഹന വകുപ്പ് ഉദ്യോഗസ്ഥര്‍ക്കെതിരെ നടപടി സ്വീകരിച്ചു.

മുഖ്യമന്ത്രിയുടെ ആറ് ഉപദേഷ്ടാക്കളില്‍ രണ്ട് പേരൊഴികെ എല്ലാവരും പ്രതിഫലം കൂടാതെയാണ് സേവനം അനുഷ്ടിക്കുന്നത്. നിയമോപദേഷ്ടാവായ ഡോ.എന്‍. കെ ജയകുമാര്‍ 14,17,643 രൂപയും പ്രസ് ഉപദേഷ്ടാവായ പ്രഭാവര്‍മ്മയ്ക്ക് 14,91,430 രൂപയും ശമ്പള ഇനത്തില്‍ നല്‍കി. ആഭ്യന്തരവകുപ്പ് ഉപദേഷ്ടാവ് രമണ്‍ ശ്രീവാസ്തവയ്ക്ക് അനുവദിച്ച രണ്ട് പൊലീസ് െ്രെഡവര്‍മാര്‍ക്ക് പ്രതിമാസം 93,032 രൂപ ശമ്പളമായി നല്‍കുന്നുവെന്നും മുഖ്യമന്ത്രി അറിയിച്ചു.

കുടുംബശ്രീ ഉല്‍പ്പന്നങ്ങള്‍ വില്‍ക്കുന്നതിനായി ജില്ലാ കേന്ദ്രങ്ങളില്‍ കുടുംബശ്രീ ബസാറുകള്‍ ഈ വര്‍ഷം ആരംഭിക്കുമെന്ന് മന്ത്രി കെ. ടി. ജലീല്‍ അറിയിച്ചു. ഭക്ഷ്യ സുരക്ഷക്ക് എന്റെ കൃഷി എന്ന ആശയം എല്ലാ അയല്‍ക്കൂട്ടങ്ങളിലേക്കും എത്തിക്കുന്നതിനും പച്ചക്കറികള്‍ സ്വയം ഉദ്പാദിപ്പിക്കുന്നതിനും ഭക്ഷ്യ സുരക്ഷ ഭവനം ക്യാമ്പയിന്‍ സംഘടിപ്പിക്കും.ചിങ്ങം ഒന്നിന് എല്ലാ സി.ഡി. എസിലും പദ്ധതിക്ക് തുടക്കം കുറിക്കും.