ബിജെപി സംസ്ഥാന പ്രസിഡന്റ് കുമ്മനം രാജശേഖരന്‍ തെറിക്കുമെന്നുറപ്പായി. മുന്‍ പ്രസിഡന്റ് വി.മുരളീധരന്‍ പക്ഷത്തിന്റെ കനത്ത എതിര്‍പ്പ് മറികടക്കാന്‍ കുമ്മനത്തിന് കഴിയില്ല. പകരം പ്രസിഡന്റ് ആരെന്ന കാര്യത്തില്‍ തീരുമാനമുണ്ടാകാന്‍ സമയമെടുക്കാനാണ് സാധ്യത.

വി.മുരളീധരനൊപ്പമാണ് കേന്ദ്ര നേതൃത്വം. വി.മുരളീധരന് അമിത് ഷായും നരേന്ദ്ര മോദിയുമായി അടുത്ത ബന്ധമുണ്ട്. ഒരു എം. എല്‍ എ മാത്രമുള്ള പാര്‍ട്ടിക്കെതിരെ കോടി കണക്കിന് രൂപയുടെ അഴിമതി ആരോപണമാണ് ഉയരുന്നത്. കുമ്മനം അഴിമതിക്കാരനാണെന്ന് ആരും പറയുന്നില്ല. എന്നാല്‍ കുമ്മനം അഴിമതിക്കാരെ സഹായിക്കുന്നു എന്ന ആരോപണത്തിന് പൊതു സ്വീകാര്യതയുണ്ട്.

വി.മുരളീധരന്‍ പക്ഷവും കുമ്മനം പക്ഷവും തമ്മിലുള്ള അടി രൂക്ഷമായ പശ്ചാത്തലത്തിലാണ് കുമ്മനത്തിന്റെ പദയാത്ര മാറ്റിവയ്ക്കാന്‍ തീരുമാനിച്ചത്. പദയാത്ര മാറ്റി വച്ചില്ലെങ്കില്‍ അതുമായി സഹകരിക്കുകയില്ലെന്ന് മുരളീധരന്‍ പക്ഷം യോഗത്തില്‍ തുറന്നടിച്ചു. ഒരു ഘട്ടത്തില്‍ കുമ്മനം സ്ഥാനം ഒഴിയുന്നതാണ് നല്ലതെന്ന അഭിപ്രായവുമുണ്ടായി. എന്നാല്‍ കുമ്മനം അതിനു തയ്യാറായില്ല.

മുരളീധരന്‍ പക്ഷമാണ് കേരളത്തില്‍ പാര്‍ട്ടിയുടെ കുഴി തോണ്ടുന്നത് എന്ന അഭിപ്രായമാണ് കുമ്മനം പക്ഷത്തിനുള്ളത്. നല്ല രീതിയില്‍ പ്രവര്‍ത്തിച്ചു വന്ന മുരളിയെ പെട്ടെന്നാണ് കേന്ദ്ര നേതൃത്വം മാറ്റി കുമ്മനത്തെ പ്രതിഷ്ഠിച്ചത്. അന്നു മുതല്‍ തുടങ്ങിയതാണ് കുമ്മനത്തോടുള്ള മുരളിയുടെ പക. പലവട്ടം ദേശീയ നേതാക്കള്‍ പിണക്കം തീര്‍ക്കാന്‍ ഇടപെട്ടെങ്കിലും ഫലവത്തായില്ല. മുരളി പാര്‍ട്ടി പ്രസിഡന്റ് അല്ലെങ്കിലും പല ജില്ലാ പ്രസിഡന്റുമാരും മുരളിക്കൊപ്പമാണുള്ളത്. ആര്‍ എസ് എസിന്റെ പിന്തുണയുളളതു കൊണ്ടാണ് കുമ്മനം ഇത്രനാളും പിടിച്ചു നിന്നത്.

കുമ്മനത്തെയും മുരളിയെയും ഒഴിവാക്കി കൊണ്ടൊരു ഫോര്‍മുല യാണ് കേന്ദ്ര നേതൃത്വത്തിനുള്ളത്. ഇങ്ങനെയാണ് പോകുന്നതെങ്കില്‍ ബിജെപി കേരളത്തിന്റെ ചിത്രത്തില്‍ നിന്നും ഇല്ലാതാകും എന്ന് ഉറപ്പായി. ഓ രാജഗോപാല്‍ ഉള്‍പ്പെടെയുള്ള നേതാക്കള്‍ വിവാദങ്ങളില്‍ നിന്നും ഒഴിഞ്ഞു നില്‍ക്കുന്നു. കേരളത്തിലെ ബി ജെ പിയില്‍ നടക്കുന്നത് അശാസ്യമല്ലാത്ത കാര്യങ്ങളാണെന്നാണ് രാജഗോപാലിന്റെ വിശ്വാസം.

കുമ്മനം മാറിയാല്‍ കെ. സുരേന്ദ്രന്‍ സംസ്ഥാന പ്രസിഡന്റാകാന്‍ ചരടുവലി നടത്തിയേക്കും. എന്നാല്‍ സുരേന്ദ്രനെ പ്രസിഡന്റാക്കാന്‍ അനുവദിക്കുമെന്ന് കരുതുക വയ്യ