പി വി.അന്‍വര്‍ എം എല്‍ എ യുടെ വാട്ടര്‍ തീം പാര്‍ക്കിന്റെ അനുമതി റദ്ദാക്കിയ സര്‍ക്കാര്‍ മന്ത്രി തോമസ് ചാണ്ടിക്കെതിരെ നടപടി സ്വീകരിക്കാന്‍ ഒരുങ്ങുന്നു. തോമസ് ചാണ്ടിയെ മന്ത്രി സ്ഥാനത്ത് തുടരാന്‍ മുഖ്യമന്ത്രി അനുവദിക്കുമോ എന്ന കാര്യവും സംശയത്തിലാണ്.
അന്‍വറിന്റെയും തോമസ് ചാണ്ടിയുടെയും കാര്യത്തില്‍ വിട്ടുവീഴ്ച വേണ്ടെന്ന നിലപാടാണ് മുഖ്യമന്ത്രി സ്വീകരിക്കുന്നത്. ചാണ്ടിയും അന്‍വറും ചേര്‍ന്ന് സര്‍ക്കാരിന്റെ സല്‍പേര് കളങ്കപ്പെടുത്തി എന്ന വിശ്വാസത്തിലാണ് മുഖ്യമന്ത്രി.
എന്നാല്‍ മന്ത്രിയെയും എം എല്‍ എയെയും പരസ്യമായി തള്ളി പറയാന്‍ മുഖ്യമന്ത്രി തയാറായില്ല. അത്തരത്തില്‍ തള്ളി പറയുന്നത് ശരിയല്ലെന്ന വികാരമാണ് മുഖ്യമന്ത്രിക്കും പാര്‍ട്ടിക്കുമുള്ളത്. എന്നാല്‍ ആരോപണം തെളിയിക്കപ്പെടുകയാണെങ്കില്‍ അവര്‍ സ്ഥാനങ്ങളില്‍ തുടരരുത് എന്ന അഭിപ്രായമാണ് മുഖ്യമന്ത്രിക്കുള്ളത്. ഇവര്‍ക്കെതിരെ ഉദ്യോഗസ്ഥ തലത്തില്‍ നടക്കുന്ന ഏത് അന്വേഷണവും സ്വാഗതാര്‍ഹമാണെന്ന് മുഖ്യമന്ത്രി ചീഫ് സെക്രട്ടറിക്ക് നിര്‍ദ്ദേശം നല്‍കിയതായി അറിയുന്നു.
നിയമസഭയില്‍ പ്രതിപക്ഷം കത്തികയറുമെന്ന് മുഖ്യമന്ത്രി പ്രതീക്ഷിച്ചില്ല. രമേശ് ചെന്നിത്തല തോമസ് ചാണ്ടിയുടെ കാര്യത്തില്‍ അയഞ്ഞ നിലപാടാണ് സ്വീകരിച്ചിരുന്നത്. ഇതിനു കാരണം ചാണ്ടിയും രമേശും തമ്മിലുള്ള ബന്ധമാണ്. ഹരിപ്പാടും കുട്ടനാടും തമ്മില്‍ ദൂരം അധികമില്ല. തന്നെ ഉപദ്രവിക്കരുതെന്ന് ആവശ്യപ്പെട്ട് ചാണ്ടി ചെന്നിത്തലയെ സമീപിച്ചു എന്നാണ് വിവരം. എന്നാല്‍ പൊതു വികാരം എതിരായ പശ്ചാത്തലത്തില്‍ ചെന്നിത്തലക്ക് ചാണ്ടിയെ പരസ്യമായി സഹായിക്കാന്‍ സാധിക്കുകയില്ല.
മുഖ്യമന്ത്രി താന്‍ നേരിടുന്ന പ്രതിസന്ധി എങ്ങനെ മറികടക്കാമെന്ന ചിന്തയിലാണ്. സര്‍ക്കാരിനെ ഒന്നാകെ പ്രതിക്കൂട്ടിലാക്കുന്ന ആരോപണങ്ങളാണ് ഉണ്ടായികൊണ്ടിരിക്കുന്നത്. നിയമസഭയില്‍ പ്രതിപക്ഷം പ്രകോപനം തുടര്‍ന്നാല്‍ സര്‍ക്കാരിന് പിടിച്ചു നില്‍ക്കാനാവില്ല. ഉമ്മന്‍ ചാണ്ടിയും തോമസ് ചാണ്ടിയെ സഹായിക്കുന്ന നിലപാടാണ് സ്വീകരിക്കുന്നത്. അതേ സമയം പി ടി തോമസും വി.ഡി സതീശനും തോമസ് ചാണ്ടിക്കെതിരാണ്. അത് മാത്രമാണ് കോണ്‍ഗ്രസ് നേരിടുന്ന ഏക വെല്ലുവിളി.
അഴിമതികള്‍ അടിസ്ഥാന രഹിതമെന്ന് മുഖ്യമന്ത്രി നിയമസഭയില്‍ ആവര്‍ത്തിക്കുമ്പോഴും അദ്ദേഹത്തിന് അക്കാര്യത്തില്‍ ഉറപ്പില്ല. അതു കൊണ്ടു തന്നെ അന്വേഷണത്തെ കുറിച്ചാണ് മുഖ്യമന്ത്രി ആലോചിക്കുന്നത്. അന്വേഷണത്തിനു മുമ്പ് തന്നെ നടപടി വേണമെന്ന ആശയവും ചിലര്‍ മുന്നോട്ടു വയ്ക്കുന്നുണ്ട്. മുഖ്യമന്ത്രിയുടെ ഓഫീസിനും ഇതേ അഭിപ്രായമാണുള്ളത്. പാര്‍ട്ടിയില്‍ നിന്നുള്ള അഭിപ്രായ സമന്വയത്തിനു വേണ്ടിയാണ് മുഖ്യമന്ത്രി കാത്തിരിക്കുന്നത്.