വനിതാ കമ്മീഷന്‍ തനിക്കെതിരെ നടപടികളുമായി മുന്നോട്ടു പോവുകയാണെങ്കില്‍ പി.സി.ജോര്‍ജ് ചില നിര്‍ണായക വെളിപ്പെടുത്തലുകള്‍ നടത്തുമെന്ന് സൂചന. പി.സി.ജോര്‍ജിനെ വിസ്തരിച്ചാല്‍ കളി കാര്യമാകുമെന്നാണ് റിപ്പോര്‍ട്ടുകള്‍. നടിയെ ആക്രമിച്ച സംഭവത്തില്‍ നിര്‍ണായക ഒരു തെളിവ് പി സി ജോര്‍ജ് പുറത്തുവിടുമെന്നാണ് കേള്‍ക്കുന്നത്. അത് പുറത്തു വന്നാല്‍ പലരും കളങ്കിതരാകുമെന്നാണ് ജോര്‍ജിന്റെ നിലപാട്.
പി സി ജോര്‍ജ് രണ്ടും കല്‍പ്പിച്ചാണ് മുന്നോട്ടു പോകുന്നത്. ദിലീപ് വിഷയം ഉണ്ടായപ്പോള്‍ ജോര്‍ജിന് സംഭവവുമായി ബന്ധപ്പെട്ടുള്ള രേഖകളെല്ലാം ലഭിച്ചിരുന്നു. അത് എവിടെ നിന്നും ലഭിച്ചു എന്ന കാര്യം പകല്‍ പോലെ വ്യക്തമാണ്. ഇതില്‍ പ്രധാനം ഒരു മെഡിക്കല്‍ റിപ്പോര്‍ട്ടാണ്. അത് പരസ്യമായാല്‍ കേസിന്റെ ഗതി മാറിമറിയും

.മെഡിക്കല്‍ റിപ്പോര്‍ട്ട് ചില മലയാളം ചാനലുകള്‍ക്ക് നേരത്തെ ലഭിച്ചിരുന്നു. അതില്‍ ഒരു ചാനല്‍ കിട്ടിയ പാടെ സംപ്രേക്ഷണവും ചെയ്തു. അടുത്ത കാലത്ത് വിവാദത്തിലായ ചാനലാണ് വാര്‍ത്ത സംപ്രേക്ഷണം ചെയ്തത്. വാര്‍ത്ത വന്നയുടനെ മുഖ്യമന്ത്രിയുടെ ഓഫീസ് ഇടപെടുകയും സംഗതി മുക്കുകയും ചെയ്തു. മെഡിക്കല്‍ റിപ്പോര്‍ട്ട് പലരുടെയും കൈയിലുണ്ട്. പി സി ജോര്‍ജിന്റെ ധൈര്യവും അതുതന്നെയാണ്. റിപ്പോര്‍ട്ട് പുറത്തു വരാനാണ് തത്പരകക്ഷികള്‍ ആഗ്രഹിക്കുന്നത്. അങ്ങനെ സംഭവിക്കുകയാണെങ്കില്‍ അത് കേസിന്റെ വഴി തിരിക്കുമെന്ന് മാത്രമല്ല പലരെയും ബുദ്ധിമുട്ടിലാക്കുകയും ചെയ്യും.

ദിലീപ് ശുഭാപ്തി വിശ്വാസത്തിലാകുന്നതും റിപ്പോര്‍ട്ടിന്റെ പിന്‍ബലത്തിലാണ്. പി സി ജോര്‍ജിന്റെ നാക്കിന് ലൈസന്‍സില്ല. അദ്ദേഹം നിരുപദ്രവകരം എന്ന മട്ടില്‍ പറയുന്ന കാര്യങ്ങള്‍ക്ക് ബോംബിന്റെ ശക്തി കാണും. ഭരണഘടനാ പിന്‍ബലമുള്ള സ്ഥാപനങ്ങള്‍ അത്തരം വിഷയങ്ങളില്‍ പ്രതികരിക്കാതിരിക്കുന്നതാണ് ഉത്തമം. ഇല്ലെങ്കില്‍ എല്ലാവരും ഒരുമിച്ച് നാറും.