കാവ്യക്കൊപ്പം ദിലീപ് ഈ ഓണം ഉണ്ണാന്‍ ആകുമോ എന്ന ആശങ്കയിലാണ് ദിലീപിന്റെ കുടുംബവും ദിലീപിന്റെ ആരാധകരും. നടിയെ ആക്രമിച്ച കേസില്‍ അറസ്റ്റിലായ ദിലീപിന്റെ ജാമ്യാപേക്ഷ ഹൈക്കോടതി ചൊവ്വാഴ്ച്ചത്തേയ്ക്ക് മാറ്റി. പ്രോസിക്യൂഷന്റെ അസൗകര്യം കണക്കിലെടുത്തായിരുന്നു ഈ നടപടി. ഇത് മൂന്നാം തവണയാണ് ദിലീപിന്റെ ജാമ്യാപേക്ഷ മാറ്റിവെയ്ക്കുന്നത്. മുമ്പ് അങ്കമാലി മജിസ്‌ട്രേറ്റ് കോടതിയും ഹൈക്കോടതിയും ദിലീപിന്റെ ജാമ്യാപേക്ഷ കടുത്ത പരാമര്‍ശങ്ങളോടെ തള്ളിയിരുന്നു.
സിനിമയില്‍ നിന്നും ദിലീപിനെ പുറത്താകാകന്‍ ഈ മേഖലയിലെ ചിലര്‍ നടത്തിയ ഗൂഢാലോചനയാണ് ദിലീപിനെതിരായ കേസെന്ന വാദമാണ് ദിലീപിന്റെ അഭിഭാഷകന്‍ മുന്നോട്ടുവെയ്ക്കുക. സിനിമയിലെ ശക്തരായ ഒരുവിഭാഗം പൊലീസിന്റെയും രാഷ്ട്രീയ നേതാക്കളുടെയും സഹായത്തോടെ തന്നെ ഇരയാക്കിയെന്നാണ് ദിലീപിന്റെ ജാമ്യാപേക്ഷയില്‍ പറയുന്നത്.
എന്നാല്‍ അന്വേഷണം അവസാന ഘട്ടത്തിലാണെന്നും ദിലീപിന് ജാമ്യം നല്‍കരുതെന്നുമാകും പ്രോസിക്യൂഷന്‍ വാദം. കേസിലെ നിര്‍ണ്ണായക തെളിവായ മൊബൈല്‍ ഫോണ്‍ നശിപ്പിച്ചുവെന്ന വാദം വിശ്വസിക്കാനാകില്ലെന്നും ഫോണ്‍ കണ്ടെടുക്കണമെന്നും പ്രോസിക്യൂഷന്‍ കോടതിയെ അറിയിക്കും.
എഡിജിപി ബി.സന്ധ്യയ്‌ക്കെതിരെയും ഗുരുതരമായ ആരോപണങ്ങള്‍ ദിലീപിന്റെ ജാമ്യാപേക്ഷയിലുണ്ട്. അന്വേഷണ ഉദ്യോഗസ്ഥനായ ഐജി ദിനേന്ദ്ര കശ്യപിനെ അറിയിക്കാതെയാണ് എഡിജിപി ബി.സന്ധ്യ ചോദ്യം ചെയ്തതെന്ന ഗുരുതര ആരോപണമാണ് എഡിജിപിക്കെതിരെ ദിലീപ് ഉയര്‍ത്തിയിരിക്കുന്നത്. ചില വ്യക്തികള്‍ തമ്മിലുള്ള ബന്ധത്തെ പറ്റി ചോദ്യം ചെയ്തപ്പോള്‍ ചോദ്യം ചെയ്യല്‍ പകര്‍ത്തിയ ക്യാമറ എഡിജിപി ഓഫ് ചെയ്‌തെന്നും ദിലീപ് ആരോപിക്കുന്നു.