ഭാഗവതിന്റെ ദേശീയപതാക ഉയര്ത്തല്: പൊലീസിന്റെ ഇടപെടല് തടഞ്ഞ് ബിജെപിയുടെ ഗൂഢപദ്ധതി പൊളിച്ചത് മുഖ്യമന്ത്രിയുടെ ഓഫിസ്
തന്ത്രം പൊളിച്ചു. കേസ് പിന്നാലെ വരും. ആര്എസ്എസ് തലവന് മോഹന് ഭഗവത് സ്വാതന്ത്ര്യ ദിനത്തില് നിയമവിരുദ്ധമായി ദേശീയ പതാക ഉയര്ത്തിയ സംഭവത്തില് പൊലീസ് ഇടപെടല് വേണ്ടെന്നു നിര്ദേശിച്ചത് ബിജെപിയുടെ ഗൂഢപദ്ധതി പൊളിച്ചത് മുഖ്യമന്ത്രിയുടെ ഓഫിസ്. മോഹന് ഭാഗവതിനെതിനെ തടയുന്ന സംഭവം രാഷ്ട്രീയമായി ഉപയോഗിച്ച് സംസ്ഥാന സര്ക്കാരിനും സിപിഎമ്മിനുമെതിരെ തിരിച്ചു വിടാന് സാധ്യതയുണ്ടെന്ന വിലയിരുത്തലിനെ തുടര്ന്നാണ് നടപടി.
മോഹന് ഭാഗവത്തിന്റെ സന്ദര്ശനം പ്രമാണിച്ച് ആര്എസ്എസ് പ്രവര്ത്തകരുടെ വലിയ സാന്നിധ്യം 14നു തന്നെ നഗരത്തിലുണ്ടായിരുന്നു. ഈ അവസ്ഥയില് പൊലീസ് ഇടപെടല് സംഘര്ഷത്തിനിടയാക്കുമെന്നു സര്ക്കാരിനു റിപ്പോര്ട്ടും ലഭിച്ചിരുന്നു. ഇതോടെയാണു പൊലീസ് ഇടപെടല് വേണ്ടെന്നു നിര്ദേശിച്ചത്.
ദേശീയപതാക ഉയര്ത്തുന്നതു പൊലീസിനെ ഉപയോഗിച്ചു വിലക്കി എന്ന പ്രചാരണം സംസ്ഥാന സര്ക്കാരിനെയും സിപിഎം നേതൃത്വത്തെയും ദേശീയതലത്തില് പ്രതിക്കൂട്ടിലാക്കാനുള്ള സാധ്യതയും മുഖ്യമന്ത്രിയുടെ ഓഫിസ് കണക്കിലെടുത്തു.
സംഭവത്തില് തുടര്നടപടിക്കായി നിയമോപദേശം തേടിയതായി മുഖ്യമന്ത്രി പിണറായി വിജയന് ഇന്നലെ നിയമസഭയില് അറിയിച്ചിരുന്നു. ദേശീയ പതാക ഉയര്ത്തുന്നതുമായി ബന്ധപ്പെട്ട ചട്ടങ്ങള് ലംഘിക്കപ്പെച്ചതായാണ് റിപ്പോര്ട്ടെന്നു മുഖ്യമന്ത്രി പറഞ്ഞു. കലക്ടറും വിദ്യാഭ്യാസവകുപ്പും ഇക്കാര്യം പരിശോധിച്ചു. ദേശീയഗാനത്തിനു പകരം വന്ദേമാതരമാണ് ആലപിച്ചത്. പിന്നീട് ആരോ പറഞ്ഞപ്പോള് ദേശീയഗാനവും ആലപിച്ചു. കുഴപ്പം ചൂണ്ടിക്കാട്ടിയതിനെത്തുടര്ന്നു സ്കൂള് പ്രിന്സിപ്പല് രണ്ടാമതും പതാക ഉയര്ത്തി. ഈ സമയത്തു ദേശീയഗാനം ആലപിച്ചുമില്ല. നിയമോപദേശത്തിന്റെ അടിസ്ഥാനത്തില് നടപടികളെടുക്കും.
പ്രശ്നത്തില് ശക്തമായ നടപടിയെടുക്കണമെന്നും കേസ് റജിസ്റ്റര് ചെയ്യണമെന്നും രമേശ് ചെന്നിത്തല നിയമസഭയില് ആവശ്യപ്പെട്ടിരുന്നു. ദേശീയ പതാക ഉയര്ത്തേണ്ടതു ജനപ്രതിനിധിയോ സ്കൂളിലെ പ്രധാന അധ്യാപകനോ ആയിരിക്കണമെന്ന് പൊതുവിദ്യാഭ്യാസ വകുപ്പു സര്ക്കുലര് ഇറക്കിയിരുന്നു. ഇതു ലംഘിക്കപ്പെട്ടാല് നടപടികളിലേക്കു നീങ്ങാമെന്നു മുഖ്യമന്ത്രിയുടെ ഓഫിസും നിര്ദേശം നല്കിയിരുന്നു. ഇതനുസരിച്ചാണു ആര്എസ്എസ് മുഖ്യന് പതാക ഉയര്ത്തുമെന്ന വാര്ത്ത പരന്നതിന് പിന്നാലെ 14നു രാത്രി പാലക്കാട് കലക്ടറുടെ നിര്ദേശ പ്രകാരം തഹസില്ദാര് മൂത്താന്തറ കര്ണകിയമ്മന് സ്കൂള് അധികൃതര്ക്കു നോട്ടീസ് നല്കിയിരുന്നു.
സംഭവത്തില് ജില്ലാ അധികൃതരുടെ റിപ്പോര്ട്ട് പൊതുവിദ്യാഭ്യാസ വകുപ്പ് പരിശോധിച്ചു വരികയാണ്. എന്ത് നടപടിയെടുക്കണം എന്ന് തീരുമാനിച്ചിട്ടില്ല. ആരും തങ്ങളോട് വിശദീകരണം ആരായുകയോ തങ്ങള് നല്കുകയോ ചെയ്തിട്ടില്ലെന്നാണ് സ്കൂള് അധികൃതരുടെ പ്രതികരണം.
https://www.facebook.com/Malayalivartha
