കുടിയിറക്കപ്പെട്ട വൃദ്ധദമ്പതികള്ക്ക് താങ്ങായി പിണറായി സര്ക്കാര്; വൃദ്ധദമ്പതികള്ക്ക് പുനരധിവാസം ഉറപ്പാക്കുമെന്ന് കടകംപള്ളി സുരേന്ദ്രന്
തൃപ്പൂണിത്തുറയില് ജപ്തി നടപടിയ്ക്കിരയായി കുടിയിറക്കപ്പെട്ട വൃദ്ധദമ്പതികള്ക്ക് താങ്ങായി പിണറായി സര്ക്കാര്. സ്ഥിരമായ പുനരധിവാസത്തിന് സര്ക്കാര് നടപടി സ്വീകരിക്കുമെന്ന് മന്ത്രി കടകംപള്ളി സുരേന്ദ്രന് പറഞ്ഞു. കോടതിക്ക് പുറത്ത് എന്ത് ചെയ്യാന് സാധിക്കുമെന്ന് പരിശോധിക്കുമെന്നും കടകംപള്ളി വ്യക്തമാക്കി. മുഖ്യമന്ത്രി പിണറായിയുടെ ഇടപെടലിനെ തുടര്ന്ന് ഇന്നലെ തന്നെ വൃദ്ധദമ്പതികളെ വീട്ടില് തിരിച്ചെത്തിച്ചിരുന്നു. സംഭവം വാര്ത്തയായതോടെ ദമ്പതികളെ വീട്ടില് തിരിച്ചെത്തിക്കുന്നതിന് സാധ്യമായ എല്ലാ നടപടികളും കൈക്കൊള്ളുമെന്ന് മുഖ്യമന്ത്രി പിണറായി വ്യക്തമാക്കിയിരുന്നു. തുടര്ന്ന് ഇവരെ വീട്ടില് തിരിച്ചെത്തിക്കാന് ജില്ലാ കലക്ടര്ക്ക് നിര്ദ്ദേശം നല്കുകയായിരുന്നു.
ജപ്തി നടപടിയിലൂടെ വീട് ഏറ്റെടുത്തവരുമായി ചര്ച്ച നടത്താനും പ്രശ്നപരിഹാരത്തിന് മൂന്ന് മാസത്തെ സാവകാശം തേടാനും മുഖ്യമന്ത്രി ബന്ധപ്പെട്ടവര്ക്ക് നിര്ദ്ദേശം നല്കി. ഉണ്ടാകാന് പാടില്ലാത്ത സംഭവമാണ് തൃപ്പൂണിത്തുറിയില് ഉണ്ടായതെന്നും ഇത്തരം സംഭവങ്ങള് ആവര്ത്തിക്കാതിരിക്കാന് നടപടിയെടുക്കുമെന്നും മുഖ്യമന്ത്രി വ്യക്തമാക്കി.
ഏഴ് വര്ഷം മുമ്പാണ് തൃപ്പൂണിത്തുറ ഹൗസിങ് കോപ്പറേറ്റീവ് സൊസൈറ്റിയില് നിന്നും ഇവര് ഒന്നര ലക്ഷം രൂപ വായ്പയെടുത്തത്. അസുഖബാധിതരായതിനേത്തുടര്ന്ന് തിരിച്ചടവ് മുടങ്ങി. പലിശയടക്കം 2,70,000 രൂപയാണ് തിരിച്ചടയ്ക്കേണ്ടത്. തുടര്ന്ന് കുറച്ച് ദിവസങ്ങള്ക്ക് മുമ്പ് ബാങ്ക് ജപ്തി നടപടികള് ആരംഭിക്കുകയായിരുന്നു.
https://www.facebook.com/Malayalivartha
