ആ നീക്കം ദീലീപിനു തന്നെ പാരയാകുമോ? ദിലീപ് ഇനി ജയിലറയ്ക്കുള്ളില് തന്നെയോ?
കൊച്ചിയില് നടിയെ ആക്രമിച്ച ഗൂഢാലോചനകേസില് അഞ്ചാം തവണയും നടന് ദിലീപ് ജാമ്യം തേടി കോടതിയെ സമീപിച്ചത് ദിലീപിന് പാരയാകുമെന്നാണ് നിയമവൃത്തങ്ങള് പറയുന്നത്. തുടര്ച്ചയായ ജാമ്യഹര്ജികള് ദിലീപിന് തന്നെ തിരിച്ചടിയാകുമോ എന്നാണ് നിയമവൃത്തങ്ങളിലെ ചര്ച്ച. കേസുകളില് ആരോപണവിധേയനായ ആള്ക്ക് എത്ര തവണ വേണമെങ്കിലും ജാമ്യഹര്ജി സമര്പ്പിക്കുന്നതിന് തടസമില്ല. ഈ സാധ്യത തന്നെയാണ് ദിലീപ് ഉപയോഗിച്ചിരിക്കുന്നത്.
എന്നാല് പുതിയ ജാമ്യഹര്ജി സമര്പ്പിക്കണമെങ്കില് സാഹചര്യത്തില് എന്തെങ്കിലും മാറ്റമുണ്ടാകണം. ഏറ്റവും ഒടുവില് അങ്കമാലി മജിസ്ട്രേറ്റ് കോടതി ജാമ്യാപേക്ഷ തള്ളിയതിന് പിറ്റേന്ന് തന്നെ ദിലീപ് ജാമ്യാപേക്ഷയുമായി വീണ്ടും ഹൈക്കോടതിയെ സമീപിച്ചിരിക്കുകാണ്. കേസില് ഇന്ന് പ്രതിഭാഗം വാദം കേട്ട കോടതി പ്രോസിക്യൂഷന്റെ നിലപാട് കേള്ക്കുന്നതിനായി നാളത്തേക്ക് മാറ്റിയിരിക്കുകയാണ്. ഒരിക്കല് ജാമ്യാപേക്ഷ തള്ളിയാല് വീണ്ടും ജാമ്യത്തിന് അപേക്ഷിക്കണമെങ്കില് പുതിയ ഒരു പ്രതി കൂടി അറസ്റ്റിലാകുകയോ സുപ്രധാനമായ തെളിവ് എന്തെങ്കിലും കണ്ടെടുക്കുകയോ ചെയ്യണം. അതുമല്ലെങ്കില് മറ്റെന്തെങ്കിലും മാറ്റമുണ്ടാകണം.
മാറ്റമുണ്ടാകാത്ത സാഹചര്യത്തില് പ്രതിയുടെ ജാമ്യഹര്ജി തള്ളിപ്പോകാന് തന്നെയാണ് സാധ്യതയെന്ന് മുതിര്ന്ന അഭിഭാഷകര് ചൂണ്ടിക്കാട്ടുന്നു. സാഹചര്യത്തില് മാറ്റമുണ്ടാകാതെ എന്തിന് വീണ്ടും ജാമ്യഹര്ജിയുമായി കോടതിയില് എത്തിയെന്ന് കോടതി തന്നെ ദിലീപിനോട് ചോദിക്കുകയും ചെയ്തിരുന്നു. പ്രതി സമ്പത്തും സ്വാധീനവുമുള്ളയാളാണെന്നും അതിനാല് ജാമ്യം നിഷേധിക്കണമെന്നുമാണ് തുടക്കം മുതലുള്ള പ്രോസിക്യൂഷന് വാദങ്ങളിലൊന്ന്.
തുടര്ച്ചയായ ജാമ്യഹര്ജികള് പ്രോസിക്യൂഷന്റെ ഈ വാദം ശരിവയ്ക്കുന്നതാകുമെന്നും നിയമവൃത്തങ്ങള് ചൂണ്ടിക്കാട്ടുന്നു. ഇത് ഫലത്തില് ദിലീപിന് തന്നെ തിരിച്ചടിയാകുകയും ചെയ്യും. ആരോപണവിധേയര് സമ്പന്നരും സ്വാധീനമുള്ളവരും ആകുമ്പോള് സാക്ഷികളെ സ്വാധീനിക്കാതിരിക്കാന് ജാമ്യം നിഷേധിക്കുകയാണ് കോടതി ചെയ്യുന്നത്. നടിയെ ആക്രമിച്ച കേസും ഇത്തരത്തിലുള്ളതാണ്. ദിലീപിന്റെ സ്വാധീനശേഷി വീണ്ടും പ്രോസിക്യൂഷന് കോടതിയില് ഉന്നയിക്കും. ഇത് നടന് തന്നെ തിരിച്ചടിയാകും.
ഇനി ദിലീപിന് കോടതി ജാമ്യം അനുവദിച്ചാല് തന്നെ വിചാരണ രണ്ട് മുതല് മൂന്ന് വര്ഷം വരെ നീളും. ഇക്കാലയളവില് സാക്ഷികള് സ്വാധീനിക്കപ്പെടാനും കൂറുമാറാനും സാധ്യതയുണ്ട്. സാക്ഷികളില് ഭൂരിപക്ഷവും സിനിമാ മേഖലയില് നിന്നുള്ളവരായതിനാല് ദിലീപിന് ഇവരെ സ്വാധീനിക്കാന് കഴിയും. പ്രോസിക്യൂഷന് ഇക്കാര്യവും കോടതിയില് ചൂണ്ടിക്കാട്ടും.
https://www.facebook.com/Malayalivartha
