ദൈവം എന്നോടൊപ്പമുണ്ടെന്നതിന്റെ അടയാളമായിരുന്നു അത്
ഭീകരര് തട്ടികൊണ്ടു പോയ ഫാ: ടോം ഉഴുന്നാലില് രക്ഷപ്പെട്ടത് ദൈവത്തിന്റെ അത്ഭുത പ്രവര്ത്തിയെന്ന് ഫാദര്. തടവറയിലെ തന്റെ അനുഭവങ്ങള് പ്രമുഖ മാധ്യമവുമായി പങ്കുവച്ചു. 557 ദിവസമായിരുന്നു ഫാ: തടവറയില് കഴിഞ്ഞത്. എന്നാല് ഭീകരര് തട്ടികൊണ്ടു പോയപ്പോള് അവര് തന്നെ വധിക്കില്ല എന്നു മനസിലായി എന്നു ഫാ: പറയുന്നു. അതു തിരിച്ചറിഞ്ഞ നിമിഷത്തെക്കുറിച്ച് ഫാ: പറയുന്നത് ഇങ്ങനെ. കഴിഞ്ഞ വര്ഷം മാര്ച്ച് നാലിനാണ് തീവ്രവാദികള് യെമനിലെ ഏഡനില് പ്രവര്ത്തിക്കുന്ന മദര് തെരേസ വൃദ്ധസദനം ആക്രമിച്ചത്. തുടരെ വെടിവച്ചു കൊണ്ട് അവര് ഉള്ളിലേക്ക് കയറുകയായിരുന്നു. ആദ്യം കാവല് നിന്ന സെക്യൂരിറ്റിയെ വധിച്ചാണ് ക്യാമ്പില് കടന്നത്. പിന്നെ കണ്മുന്നില് കണ്ട ഓരോരുത്തരേയും അവരുടെ നാട് അന്വേഷിച്ച ശേഷം വെടിവച്ചു കൊലപ്പെടുത്തി. എന്റെ അടുത്തുവന്ന് ഏതു നാട്ടുകാരനാണെന്ന് ചോദിച്ചു
ഐ ആം ഫ്രം ഇന്ത്യ എന്നു പറഞ്ഞപ്പോള് എന്നെ സെക്യൂരിറ്റിയുടെ മുറിയിലേക്ക് മാറ്റി നിര്ത്തി. ഒപ്പമുണ്ടായിരുന്നവര്ക്ക് എന്തുപറ്റിയെന്ന ആശങ്കയായിരുന്നു എനിക്ക്. കണ്മുന്നില് രണ്ടു സിസ്റ്റര്മാരെ വെടിവച്ചു കൊലപ്പെടുത്തി. നിസഹായനായി നില്ക്കാനേ എനിക്കു കഴിഞ്ഞുള്ളൂ. അല്പം സമയം കഴിഞ്ഞപ്പോള് ആയുധധാരികള് വീണ്ടുമെത്തി. അവര് എന്നെ കാറിന്റെ ഡിക്കിയിലേക്ക് തള്ളി. പിന്നാലെ എന്തോ വന്നു എന്റെ കാല്ചുവട്ടിലേക്ക് വീണു. വൃദ്ധസദനത്തിലെ അള്ത്താരയിലെ സക്രാരി (തിരുവോസ്തി സൂക്ഷിക്കുന്ന പേടകം) ആയിരുന്നു അത്. കൈയില് കിട്ടിയതെല്ലാം കൊള്ളയടിക്കുന്ന കൂട്ടത്തില് ലഭിച്ചതാകാം.
കൈകള് ബന്ധിച്ചിട്ടില്ലാതിരുന്നതിനാല് സക്രാരി മൂടിയിരുന്ന വെല്വെറ്റ് തുണിയുടെ അടിയിലൂടെ കൈകള്കൊണ്ടു പരതി. അതില് തലേദിവസം കൂദാശ ചെയ്ത നാലോ അഞ്ചോ തിരുവോസ്തികള് ഉണ്ടായിരുന്നു. അതില് കൈവച്ചു ഞാന് പ്രാര്ഥിച്ചു. അപ്പോള് ഞാന് എന്നോടുതന്നെ പറഞ്ഞു: ദൈവം അറിയാതെ എനിക്ക് ഒന്നും സംഭവിക്കില്ല. ദൈവം എന്നോടൊപ്പമുണ്ടെന്നതിന്റെ അടയാളമായാണ് ആ തിരുവോസ്തികള് എനിക്ക് അനുഭവപ്പെട്ടത്. എനിക്കുറപ്പായിരുന്നു അവര് എന്നെ വധിക്കില്ലെന്ന്. കാരണം എനിക്ക് ദൈവത്തിന്റെ കാവലുണ്ടായിരുന്നല്ലോ?
https://www.facebook.com/Malayalivartha
