ചെട്ടികുളങ്ങര ക്ഷേത്രത്തില് അബ്രാഹ്മണന് നിയമനം നല്കാന് ദേവസ്വംബോര്ഡ് തീരുമാനം എടുത്തതോടെ സംഘ്പരിവാര് വീണ്ടും വെട്ടില്
ചെട്ടികുളങ്ങര ക്ഷേത്രത്തില് ഈഴവനായ കീഴ്ശാന്തിക്ക് നിയമനം നല്കാന് ദേവസ്വംബോര്ഡ് തീരുമാനം എടുത്തതോടെ സംഘ്പരിവാര് വീണ്ടും വെട്ടിലായി. അബ്രാഹ്മാണനെന്ന കാരണത്താല് നിയമനം നിഷേധിച്ച കായംകുളം ചേരാവള്ളി പാലാഴിയില് സുധികുമാറിനെയാണ് (36) കടുത്ത സമ്മര്ദങ്ങള്ക്കൊടുവില് തിരുവിതാംകൂര് ദേവസ്വം ബോര്ഡ് പുനര്നിയമിച്ചത്. സംഘ്പരിവാര് സംഘടനയോട് വിധേയത്വമുള്ള ക്ഷേത്ര ഭരണസമിതിയുടെ എതിര്പ്പിനെ തുടര്ന്ന് സുധികുമാറിന്റെ നിയമനം തടഞ്ഞത് വിവാദമായിരുന്നു.
അബ്രാഹ്മണന് പൂജ ചെയ്താല് ദൈവകോപമുണ്ടാകുമെന്ന ക്ഷേത്രം തന്ത്രിയുടെ കത്തിന്റെ അടിസ്ഥാനത്തിലാണ് ദേവസ്വം കമീഷണര് നിയമനം തടഞ്ഞത്. ക്ഷേത്ര ഭരണസമിതിയുടെ താല്പര്യപ്രകാരമായിരുന്നു തന്ത്രി കത്ത് നല്കിയത്. പൊതുസ്ഥലംമാറ്റത്തിന്റെ ഭാഗമായാണ് കായംകുളം പുതിയിടം ക്ഷേത്രത്തിലെ കീഴ്ശാന്തി സുധികുമാറിനെ ചെട്ടികുളങ്ങരക്ക് മാറ്റിയത്. ഇതിനുശേഷം ചുമതല ഏറ്റെടുക്കരുതെന്ന് വാക്കാല് നിര്ദേശം നല്കുകയായിരുന്നു. പുതിയ കാലത്തെ അയിത്തത്തിനെതിരെ എസ്.എന്.ഡി.പിയും സി.പി.എംസി.പി.ഐ സംഘടനകളും രംഗത്തുവന്നതോടെ സംഭവം വന്വിവാദമായി.
അഡ്വ. യു. പ്രതിഭാഹരി എം.എല്.എ നിയമസഭയില് വിഷയം ഉന്നയിച്ചതോടെ മന്ത്രിയും ഇടപ്പെട്ടു. ദേവസ്വം ബോര്ഡ് തീരുമാനം ഒരുനിലക്കും അംഗീകരിക്കില്ലെന്നും ഈഴവനായ കാരണത്താല് നിയമനം നിഷേധിച്ചത് അംഗീകരിക്കില്ലെന്നും മന്ത്രി നിയമസഭയില് മറുപടി നല്കി.
ദേവസ്വം ബോര്ഡിനും ഈ സന്ദേശം നല്കിയതോടെയാണ് ഗത്യന്തരമില്ലാതെ നിയമനത്തിന് തയാറായത്. അതേസമയം, ആചാര കാരണങ്ങള് ചൂണ്ടിക്കാട്ടി കോടതിയെ സമീപിച്ച് നിയമനം തടസ്സപ്പെടുത്താനുള്ള നീക്കം അണിയറയില് സജീവമാണ്.
https://www.facebook.com/Malayalivartha
