തോമസ് ചാണ്ടിക്കെതിരെ ഗുരുതര ആരോപണങ്ങള്; കളക്ടറുടെ റിപ്പോര്ട്ടില് നിയമോപദേശം തേടും
കായല് കയ്യേറ്റ വിവാദത്തില് പെട്ട മന്ത്രി തോമസ് ചാണ്ടിക്കെതിരെ കുരുക്കുമുറുകുന്നു. തോമസ് ചാണ്ടിക്കെതിരെ നിയമപരമായ നടപടിയെടുക്കണമെന്ന് റവന്യു വകുപ്പ് ആവശ്യപ്പെട്ടു. ഇത് സംബന്ധിച്ച് തോമസ് ചാണ്ടിക്ക് ആലപ്പുഴ ജില്ലാ കളക്ടര് ടി വി അനുപമ നോട്ടീസ് നല്കി. നെല്വയല് നീര്ത്തട സംരക്ഷണ നിയമം ലംഘിച്ചതിനാണ് നോട്ടീസ്. ഗുരുതരമായ പരാമര്ശങ്ങളാണ് കളക്ടറുടെ റിപ്പോര്ട്ടിലുള്ളത്. ഭൂസംരക്ഷണ നിയമത്തിന്റെ ലംഘനം ക്രിമിനല് കുറ്റമെന്ന് റിപ്പോര്ട്ടില് പറയുന്നു. അതേസമയം കളക്ടറുടെ അന്വേഷണ റിപ്പോര്ട്ടില് വിശദമായ നിയമോപദേശ തേടാന് റവന്യു വകുപ്പ് തീരുമാനിച്ചു.
നികത്തിയ സ്ഥലങ്ങള് പൂര്വസ്ഥിതിയിലാക്കണമെന്നും ഇതിന് ഒത്താശ ചെയ്ത റവന്യു, ജലവിഭവ, കൃഷി വകുപ്പ് ഉദ്യോഗസ്ഥര്ക്കെതിരെ നടപടി സ്വീകരിക്കണമെന്നും റിപ്പോര്ട്ട് ശുപാര്ശ ചെയ്യുന്നു. ശനിയാഴ്ച വൈകിട്ടാണ് കലക്ടര്, റവന്യു വകുപ്പ് അഡീഷനല് ചീഫ് സെക്രട്ടറി പി.എച്ച്.കുര്യന് അന്തിമറിപ്പോര്ട്ട് എത്തിച്ചത്. ലേക്ക് പാലസ് റിസോര്ട്ടിലേക്കുള്ള റോഡ് നിര്മാണം, റിസോര്ട്ടിന്റെ പാര്ക്കിങ് ഗ്രൗണ്ട് നിര്മാണം, മാര്ത്താണ്ഡം കായല് നികത്തല്, കായല് ബോയ കെട്ടി തിരിക്കല് എന്നിവ സംബന്ധിച്ചു നടത്തിയ അന്വേഷണത്തിലാണു നിയമലംഘനങ്ങള് കണ്ടെത്തിയത്. അടുത്ത മാസം അവധിയില് പ്രവേശിച്ച് കാര്യങ്ങള് തണുപ്പിക്കാമെന്ന ചാണ്ടിയുടെ നീക്കത്തെ വെട്ടിലാക്കുന്നതാണ് കളക്ടറുടെ റിപ്പോര്ട്ട്.
റിപ്പോര്ട്ടിലെ പരാമര്ശങ്ങള്....
മന്ത്രി തോമസ് ചാണ്ടിയുടെ ഉടമസ്ഥതയിലുള്ള വാട്ടര് വേള്ഡ് ടൂറിസം കമ്പനി, മാര്ത്താണ്ഡം കായലില് സര്ക്കാര് പുറമ്പോക്കു കയ്യേറി നിലം നികത്തി. ഇവിടെ അഞ്ച് സെന്റ് വീതമുള്ള 64 പ്ലോട്ടുകള് മണ്ണിട്ടു നികത്തിയപ്പോള് ഇടയിലുള്ള ഒന്നര മീറ്റര് സര്ക്കാര് റോഡും നികത്തി. വെള്ളക്കെട്ടു മാറുന്നതോടെ ഭൂമി അളന്നുതിരിച്ച് മണ്ണു നീക്കം ചെയ്യും.
ലേക്ക് പാലസിനു സൗകര്യപ്പെടുന്ന വലിയകുളംസീറോ ജെട്ടി റോഡ് നിര്മാണത്തില് നെല്വയല് തണ്ണീര്ത്തട നിയമം ലംഘിച്ചു. ആലപ്പുഴ നഗരസഭ ഏറ്റെടുത്ത റോഡ് എംപി, സര്ക്കാര് ഫണ്ട് ഉപയോഗിച്ചാണു നിര്മിച്ചതെങ്കിലും സംസ്ഥാന തണ്ണീര്ത്തട നിരീക്ഷണ സമിതിയുടെ അനുമതി കൂടാതെയാണു നികത്തിയത്. പൊതു റോഡാണെങ്കിലും നിയമം ലംഘിച്ചതില് റവന്യു ഉദ്യോഗസ്ഥര്ക്കു വീഴ്ചയുണ്ട്.
ലേക്ക് പാലസ് റിസോര്ട്ട് പാര്ക്കിങ് ഗ്രൗണ്ടായി ഉപയോഗിക്കുന്ന കരുവേലി പാടശേഖരത്തിന്റെ പുറംബണ്ട് നിര്മാണത്തിലും നെല്വയല് തണ്ണീര്ത്തട നിയമം ലംഘിച്ച് നികത്തല് നടന്നു. അധികൃതര് നിര്ദേശിച്ചതിലും വിസ്തൃതിയില് പാര്ക്കിങ് ഗ്രൗണ്ട് നിര്മിക്കുകയും നെല്വയല് നികത്തുകയും ചെയ്തു. ഇവ കണ്ടെത്താന് കേരള സ്റ്റേറ്റ് റിമോട്ട് സെന്സിങ് ആന്ഡ് എന്വയോണ്മെന്റ് സെന്ററിന്റെ സഹായം തേടണം. മന്ത്രിയുടെ സഹോദരി ലീലാമ്മ ഈശോയുടെ പേരിലാണ് ഈ സ്ഥലം. ഇവര്ക്കെതിരെ നടപടി എടുത്ത്, നിലം പൂര്വസ്ഥിതിയിലാക്കണം. ബണ്ട് നിര്മാണത്തിനായി നീര്ച്ചാലിന്റെ ഗതി മാറ്റുകയും ചെയ്തു.
റോഡ് നിര്മാണത്തിന്റെയും ബണ്ട് നിര്മാണത്തിന്റെയും ഭാഗമായി മൂന്നിടത്തു നിലം നികത്തി. സാധനങ്ങള് എത്തിക്കുന്ന ലോറി തിരിക്കാന് സ്ഥലത്തിനെന്ന പേരിലാണു നിലം നികത്തിയതെന്നു വിശദീകരണം. റോഡ് നിര്മാണം കഴിഞ്ഞാല് പൂര്വസ്ഥിതിയിലാക്കണമെന്നു മുന് കലക്ടര് എന്.പത്മകുമാര് നല്കിയ നിര്ദേശം ഇതുവരെ പാലിക്കാത്തതു തെറ്റ്.
ലേക്ക് പാലസിന്റെ മുന്നില് കായല് കയ്യേറി ബോയ സ്ഥാപിച്ചതു തെറ്റ്. ജലവിഭവ വകുപ്പിന്റെ എന്ഒസിയുടെ അടിസ്ഥാനത്തില് ആര്ഡിഒ ഉത്തരവു നല്കിയത് അന്വേഷിക്കണം. ദേശീയ ജലപാതയുടെ ഭാഗമായതിനാല് ജല അതോറിറ്റിയുടെ അഭിപ്രായം തേടിയശേഷം നീക്കം ചെയ്യണം.
ലേക്ക് പാലസ് റിസോര്ട്ടുമായി ബന്ധപ്പെട്ട കയ്യേറ്റവും മറ്റും അന്വേഷിക്കാന് നിര്ദേശിച്ചകൂട്ടത്തില് ഇക്കാര്യത്തില് ഉദ്യോഗസ്ഥരുടെ ഭാഗത്തുനിന്ന് വീഴ്ച ഉണ്ടോയെന്നും പരിശോധിക്കാന് റവന്യൂമന്ത്രി ഇ. ചന്ദ്രശേഖരന് നിര്ദേശിച്ചിരുന്നു. റവന്യൂ ഉദ്യോഗസ്ഥരുടെ ഭാഗത്താണ് ഗൗരവമായ വീഴ്ച ഉണ്ടായത്. ഇവരെ അന്വേഷണവിധേയമായി സസ്പെന്ഡ് ചെയ്യാനാണ് സാധ്യത. വീഴ്ചവരുത്തിയ ഉദ്യോഗസ്ഥര്ക്കെതിരേ നടപടി സ്വീകരിക്കുന്നത് മന്ത്രി തോമസ് ചാണ്ടിയുടെ നിലപാട് കൂടുതല് ദുര്ബലമാക്കും. മന്ത്രി ഡയറക്ടറായ കമ്പനി തണ്ണീര്ത്തടനിയമവും ഭൂസംരക്ഷണ നിയമവും ലംഘിച്ചെന്നാണ് കളക്ടറുടെ റിപ്പോര്ട്ട്.
https://www.facebook.com/Malayalivartha
