അധ്യാപകര് വഴക്ക് പറയുമ്പോള് താങ്ങാനാവാതെ വിദ്യാര്ത്ഥികള് ആത്മഹത്യ ചെയ്യുന്നതെന്ത്?
അധ്യാപകരുടെ പീഡനത്തെ തുടര്ന്ന് വിദ്യാര്ത്ഥികള് ആത്മഹത്യ ചെയ്യുന്ന സംഭവങ്ങള് അടുത്ത കാലത്താണ് കേള്ക്കാന് തുടങ്ങിയത്. ഏറ്റവും അവസാനം കൊല്ലം കോട്ടമുക്ക് ആല്ത്തറമൂട് ട്രിനിറ്റി ലൈസിയം ഇംഗ്ലീഷ് മീഡിയം ഐ.സി.എസ് സ്കൂളിലെ പത്താംക്ലാസ് വിദ്യാര്ത്ഥിനി ഗൗരി നേഹ സ്കൂള് കെട്ടിടത്തിന് മുകളില് നിന്ന് ചാടി മരിച്ചത്. അധ്യാപകരോ, മാതാപിതാക്കളോ വഴക്ക് പറയുന്നത് പോലും സഹിക്കാനാവാതെ നമ്മുടെ കുട്ടികള് മാറിയതെങ്ങനെ... അധ്യാപികയും ചില്ഡ്രന്സ് സൈക്കോളജിസ്റ്റുമായ ഡോ.എ നിര്മല പറയുന്നു.
കുട്ടികളെ വഴക്ക് പറഞ്ഞ് വളര്ത്തണം
കുട്ടികളെ ചെറുപ്പത്തിലേ വഴക്ക് പറഞ്ഞ് വളര്ത്തണം. വഴക്ക് കേള്ക്കാതെ വളരുന്ന കുട്ടികള്ക്ക് പിന്നീട് ചെറിയ കാര്യങ്ങള് പോലും സഹിക്കാനാവില്ല. ചെറിയ തോല്വികള് പോലും അവരെ തളര്ത്തും. നമ്മള് വീണിട്ടാണ് നടക്കാന് പഠിക്കുന്നത്. വേദനിച്ചെങ്കിലേ നന്നാവൂ. എല്ലാ മഹാന്മാരുടെയും ജീവിതം നോക്കിയാല് അത് കാണാം. വേദന എന്നാല് പീഡനം എന്നതിന് അര്ത്ഥമില്ല. കുട്ടികള് തെറ്റ് കാണിച്ചാല് ശിക്ഷിക്കണം. അന്ധകാരം അകറ്റുന്നവരാണ് ഗുരുക്കന്മാര്. അതുകൊണ്ട് ഗുരുക്കന്മാര് ഉപയോഗിക്കുന്ന ഭാഷയ്ക്ക് സംസ്കാരം വേണം.
എല്ലാവരുടെയും മുന്നില് വെച്ച് വഴക്ക് പറയരുത്
കുട്ടികളെ വഴക്ക്പറയുമ്പോള് എല്ലാവരുടെയും മുന്നില് വെച്ച് പറയരുത്. മാറ്റി നിര്ത്തി പറയണം. കൗമാരക്കാര് എല്ലാം വികാരമായാണ് നേരിടുന്നത്. അവര്ക്ക് റീസണിംഗ് പവര് ഇല്ല. പണ്ടൊക്കെ അധ്യാപകര് കുട്ടികളെ എന്തെങ്കിലും വഴക്ക് പറയുകയോ, അടിക്കുകയോ ചെയ്താല് എന്തെങ്കിലും കാര്യമുണ്ടെന്നായിരുന്നു മാതാപിതാക്കള് പ്രതികരിച്ചിരുന്നത്. എന്നാലിന്നത്തെ സ്ഥിതി അങ്ങനെയല്ല. പല വീടുകളിലും ഒറ്റ മകനോ, മകളോ ആയിരിക്കും. അതിനെ പുന്നാരിച്ചായിരിക്കും വളര്ത്തുന്നത്. കുട്ടിയെ അധ്യാപകര് വഴക്ക് പറഞ്ഞെന്ന് കേള്ക്കുമ്പോള് മാതാപിതാക്കള്ക്ക് ദേഷ്യം വരുന്ന സ്ഥിതിയാണുള്ളത്.
കുട്ടികളുടെ മുന്നില് വെച്ച് അധ്യാപകരെ വഴക്ക് പറയരുത്
കുട്ടികളുടെ മുന്നില് വെച്ച് മാതാപിതാക്കള് അധ്യാപകരെ വഴക്ക് പറയുകയോ, ദേഷ്യപ്പെടുകയോ ചെയ്യരുത്. ദൗര്ഭാഗ്യവശാല് അങ്ങനെ ചില സംഭവങ്ങള് പലയിടത്തും നടന്നിട്ടുണ്ട്. കുട്ടികളോട് സംസ്ക്കാരശൂന്യമായി സംസാരിക്കുന്ന അധ്യാപകരോട് കുട്ടികളുടെ സാനിധ്യത്തിലല്ലാതെ സംസാരിക്കുന്നതാണ് ഉത്തമം. പിന്നെ ഇന്നത്തെ ഭൂരിപക്ഷം മാതാപിതാക്കള്ക്കും മക്കളെ പേടിയാണ്. മക്കള് മൊബൈല് വാങ്ങണമെന്ന് പറഞ്ഞാല് ഉടന് നല്കും. ഇത്തരം ശീലങ്ങള് നല്ലതല്ല. മാതാപിതാക്കള് പറഞ്ഞാല് മക്കള് അനുസരിക്കണം.
https://www.facebook.com/Malayalivartha
