എസ്.എസ്.എല്‍.സി. പരീക്ഷ മാര്‍ച്ച് ഏഴ് മുതല്‍ 26 വരെ നടത്തും. മാതൃകാപരീക്ഷ ഫെബ്രുവരി 12 മുതല്‍ 21 വരെയായിരിക്കും. ക്രിസ്മസ് പരീക്ഷ ഹൈസ്‌കൂളില്‍ ഡിസംബര്‍ 13 മുതല്‍ 21 വരെയും യു.പി.വരെ ഡിസംബര്‍ 14 മുതല്‍ 21 വരെയും നടത്തും. മുസ്ലിം സ്‌കൂളുകളില്‍ ജനുവരി 15 മുതല്‍ 28 വരെയായിരിക്കും

എസ്.എസ്.എല്‍.സി. പരീക്ഷ രാവിലെ നടത്തണമെന്ന് ഗുണമേന്മാ പരിശോധനസമിതി ശുപാര്‍ശ ചെയ്തു. നിലവില്‍ പത്താംക്ലാസ് പരീക്ഷ ഉച്ചകഴിഞ്ഞും ഹയര്‍ സെക്കന്‍ഡറി പരീക്ഷ അതേദിവസം രാവിലെയുമാണ്. എസ്.എസ്.എല്‍.സി. ചോദ്യപേപ്പര്‍ ബാങ്ക് ലോക്കറില്‍ സൂക്ഷിക്കുന്നതിനാലാണിത്. ചോദ്യപേപ്പര്‍ സ്‌കൂളില്‍ സൂക്ഷിച്ച് പരീക്ഷ രാവിലെ നടത്താമെന്നാണ് ശുപാര്‍ശ.

എസ്.എസ്.എല്‍.സി. പരീക്ഷയ്ക്കുള്ള ചോദ്യ ബാങ്കിലേക്ക് ഇത്തവണ കുട്ടികള്‍ക്കും ചോദ്യങ്ങള്‍ നിര്‍ദേശിക്കാമെന്നതാണ് മറ്റൊരു ശുപാര്‍ശ. മുന്‍വര്‍ഷം എസ്.എസ്.എല്‍.സി., പ്ലസ്ടു ചോദ്യങ്ങളില്‍ പിഴവുവന്നത് വിവാദമായിരുന്നു.

ഇത് പരിഹരിക്കാന്‍ ചോദ്യ ബാങ്ക് രൂപവത്കരിക്കാനും അതിലേക്ക് അധ്യാപകര്‍ക്ക് ചോദ്യങ്ങള്‍ നിര്‍ദേശിക്കാനും അവസരം നല്‍കി. ചോദ്യ ബാങ്കില്‍നിന്ന് എസ്.സി.ഇ.ആര്‍.ടി. ശില്പശാല നടത്തി ചോദ്യപേപ്പര്‍ തയ്യാറാക്കും.

ചോദ്യ ബാങ്കിലേക്ക് കുട്ടികള്‍ക്കും ചോദ്യങ്ങള്‍ നിര്‍ദേശിക്കാനാണ് ഇപ്പോള്‍ അവസരം നല്‍കുന്നത്. കുട്ടികള്‍ ചോദ്യമെഴുതി അധ്യാപകരെ ഏല്പിച്ചാല്‍മതി. അധ്യാപകര്‍ അത് ചോദ്യബാങ്കിലേക്ക് അപ്ലോഡ് ചെയ്യും. കുട്ടികളുടെ പേരിലായിരിക്കും ഈ ചോദ്യങ്ങള്‍ രേഖപ്പെടുത്തുക. ഇക്കാര്യത്തില്‍ അന്തിമതീരുമാനം സര്‍ക്കാരിന്റെതായിരിക്കും.

നിര്‍ദേശിക്കപ്പെട്ട ടൈം ടേബിള്‍: മാര്‍ച്ച് ഏഴ് ഒന്നാംഭാഷ പേപ്പര്‍ ഒന്ന് എട്ട് ഒന്നാം ഭാഷ പേപ്പര്‍ രണ്ട് 12 രണ്ടാം ഭാഷ 13 ഹിന്ദി 14 ഫിസിക്‌സ് 19 കണക്ക് 21 കെമിസ്ട്രി 22 ബയോളജി 26 സോഷ്യല്‍ സയന്‍സ് ഐ.ടി. പ്രാക്ടിക്കല്‍ ഫെബ്രുവരി 22 മുതല്‍ മാര്‍ച്ച് രണ്ടുവരെ.