പൊന്നോമനകളെ അതിരാവിലെ മുത്തം നല്‍കി സ്‌നേഹത്തോടെ സ്‌കൂള്‍ ബസിന്റെ പടി കയറ്റി വിടുമ്പോള്‍
വീട്ടുകാരറിയുന്നില്ല തങ്ങളുടെ മക്കളുടെ ജീവന്‍ ബസ് ഡ്രൈവര്‍മാരുടെ കയ്യിലെന്ന്. കഴിഞ്ഞ ദിവസം പോലീസ് നടത്തിയ മിന്നല്‍ പരിശോധനയില്‍ ഞെട്ടിക്കുന്ന വിവരങ്ങളാണ് പുറത്തായത്. ഇതോടെ ഒരുകാര്യം വ്യക്തമാവുകയാണ് ബസ്സുകള്‍ കൈകാര്യം ചെയ്യുന്നത് മദ്യപാനികളും ആഭാസന്മാരുമൊക്കയാണ്. കൂടാതെ സ്‌കൂള്‍ സ്‌പെഷ്യല്‍ ഓപ്പറേറ്റര്‍മാരാകട്ടെ പലരും ഗുണ്ടകളുമാണ്.

കഴിഞ്ഞദിവസം സ്‌കൂള്‍ വാഹനങ്ങളില്‍ പൊലീസ് നടത്തിയ മിന്നല്‍ പരിശോധനയില്‍ മദ്യപിച്ച് വാഹനം ഓടിച്ച 92 ഡ്രൈവര്‍മാര്‍ പിടിയിലായി. 'ഓപറേഷന്‍ ലിറ്റില്‍ സ്റ്റാര്‍' എന്ന പേരില്‍ കൊച്ചി റേഞ്ചിന് കീഴിലെ ജില്ലകളില്‍ ചൊവ്വാഴ്ച രാവിലെ ആറരമുതല്‍ ഒമ്പതര വരെയായിരുന്നു മിന്നല്‍ പരിശോധന നടത്തിയത്.

സ്‌കൂള്‍ വാഹനങ്ങളില്‍ കുട്ടികളെ കയറ്റുന്നതിന് പരിമിതികളുണ്ടെങ്കിലും മിക്കവാറും വാഹനങ്ങളില്‍ അതില്‍ കൂടുതല്‍ കുട്ടികളെ കൊണ്ടുപോകാറാണ് പതിവ്. ഇതിനൊരു പരിഹാരമെന്നോണമാണ് മിന്നല്‍ പരിശോധന നടത്തിയത്. അങ്ങനെ നടത്തിയ പരിശോധനയില്‍ അനുവദനീയമായതിലും കൂടുതല്‍ കുട്ടികളെ കയറ്റിയ 179 വാഹനങ്ങള്‍ കസ്റ്റഡിയിലെടുത്തു. സ്‌കൂള്‍ ബസുകള്‍ക്കുപുറമെ, സ്‌കൂളുകള്‍ക്കുവേണ്ടി ഓടുന്ന സ്വകാര്യ വാഹനങ്ങളും പരിശോധിക്കാനായിരുന്നു കൊച്ചി റേഞ്ച് ഐ.ജി പി. വിജയന്റെ നിര്‍ദേശം. കോട്ടയം, ഇടുക്കി, ആലപ്പുഴ, എറണാകുളം ജില്ലകള്‍ ഉള്‍ക്കൊള്ളുന്ന കൊച്ചി റേഞ്ചില്‍ 6,708 വാഹനങ്ങളാണ് പരിശോധിച്ചത്.

ഇതില്‍ 92 വാഹനങ്ങളുടെ ഡ്രൈവര്‍മാര്‍ മദ്യപിച്ചിരുന്നു. ഇവര്‍ക്കെതിരെ മോട്ടോര്‍ വാഹന നിയമപ്രകാരവും ജുവനൈല്‍ ജസ്റ്റിസ് ആക്ടിലെ വകുപ്പുകളും ചേര്‍ത്ത് കേസെടുക്കും. ഇവരുടെ ലൈസന്‍സ് റദ്ദാക്കുന്നതിന് പുറമെ 10 വര്‍ഷം സ്‌കൂള്‍ വാഹനങ്ങള്‍ ഓടിക്കുന്നതില്‍നിന്ന് വിലക്കാന്‍ ശിപാര്‍ശ ചെയ്യുമെന്നും ഐ.ജി പറഞ്ഞു. സ്‌കൂളുകളുടെ ഉടമസ്ഥതയിലുള്ള വാഹനമാണെങ്കില്‍ അവര്‍ക്കെതിരെയും നടപടിയെടുക്കുന്ന കാര്യം പരിഗണനയിലാണ്.
നിലവാരമില്ലാത്ത ടയറുമായി സഞ്ചരിച്ച 58 വാഹനങ്ങളും ബോഡി ഫിറ്റ്‌നസ് ഇല്ലാത്ത 26 വാഹനങ്ങളും കസ്റ്റഡിയില്‍ എടുത്തിട്ടുണ്ട്. അപകടസാധ്യതയുള്ള മറ്റ് 515 കുറ്റകൃത്യങ്ങളും കണ്ടെത്തി.

പരിശോധനക്ക് ആലപ്പുഴ ജില്ല പൊലീസ് മേധാവി എസ്. സുരേന്ദ്രന്‍, ഇടുക്കി ജില്ല പൊലീസ് മേധാവി കെ.ബി. വേണുഗോപാല്‍, കോട്ടയം ജില്ല പൊലീസ് മേധാവി മുഹമ്മദ് റഫീഖ്, എറണാകുളം റൂറല്‍ ജില്ല പൊലീസ് മേധാവി എ.വി. ജോര്‍ജ്, കൊച്ചി സിറ്റി പൊലീസ് മേധാവി എം.പി. ദിനേശ്, ഡെപ്യൂട്ടി കമീഷണര്‍ ഓഫ് പൊലീസ് ലോ ആന്‍ഡ് ട്രാഫിക് ആര്‍. കറുപ്പസ്വാമി, എ.സി.പി കാര്‍ത്തികേയന്‍ ഗോകുലചന്ദ്ര എന്നിവര്‍ നേതൃത്വം നല്‍കി.