മന്ത്രി തോമസ് ചാണ്ടി മാര്‍ത്താണ്ഡം കായല്‍ കയ്യേറിയയെന്ന ആലപ്പുഴ ജില്ലാ കളക്‌റുടെ റിപ്പോര്‍ട്ടില്‍ നടപടി സ്വീകരിക്കുന്നതിനായി മുഖ്യമന്ത്രി അഡ്വക്കേറ്റ് ജനറലിന്റെ നിയമോപദേശം തേടി. റിപ്പോര്‍ട്ടിന്‍മേലുള്ള നടപടി വൈകിപ്പിക്കുന്നതിനുള്ള നീക്കം സര്‍ക്കാര്‍ നടത്തുന്നെന്ന ആരോപണം ശരിവയ്ക്കുന്നു. എല്‍.ഡി.എഫിന്റെ ജനജാഗ്രത യാത്ര നടക്കുന്നതിനിടയ്ക്ക് മന്ത്രിക്കെതിരെ നടപടിയെടുത്താല്‍ അത് സര്‍ക്കാരിനും മുന്നണിക്കും ക്ഷീണമാകും. സോളാര്‍ പുനരന്വേഷണത്തില്‍ യു.ഡി.എഫിനെ പ്രതിരോധത്തിലാക്കിയ സര്‍ക്കാരിനെതിരെ തിരിച്ചടിക്കാന്‍ വഴിയൊരുക്കണ്ട എന്ന രീഷ്ട്രീയ തീരുമാനമാണ് എല്‍.ഡി.എഫ് എടുത്തിട്ടുള്ളത്. കളക്ടറുടെ റിപ്പോര്‍ട്ടിന്‍മേല്‍ നിയമോപദേശം തേടണമെന്ന് റവന്യൂ സെക്രട്ടറി പി.എച്ച് കുര്യന്‍ നിര്‍ദ്ദേശിച്ചിരുന്നു. എന്നാലത് രാഷട്രീയ തീരുമാനത്തിന്റെ ഭാഗമാണെന്ന് വ്യക്തമാണ്. 

അതേസമയം മന്ത്രിസഭയില്‍ നിന്ന് മൂന്നാമതൊരാള്‍ കൂടി രാജിവച്ചാല്‍ മുഖ്യമന്ത്രി എന്ന നിലയില്‍ പിണറായി വിജയന് അത് വലിയ ക്ഷീണമാകുമെന്ന വിലയിരുത്തലുമുണ്ട്. ഇ.പി ജയരാജനെ രാജിവയിപ്പിക്കേണ്ട സാഹചര്യം ഇല്ലാതിരുന്നിട്ടും അത് സംഭവിച്ചു. പിന്നീട് എ.കെ ശശീന്ദ്രന്‍ പെണ്‍കെണിയില്‍ പെട്ട് സ്വയം രാജിവെച്ചു. ജയരാജന്‍ തെറ്റുകാരനല്ലെന്ന് വിജിലന്‍സ് കണ്ടെത്തുകയും ഹൈക്കോടതി അത് ശരിവയ്ക്കുകയും ചെയ്തു. ശശീന്ദ്രനെ കുടുക്കിയതാണെന്ന് പിന്നീട് വ്യക്തമായി. അതിനാല്‍ രണ്ട് രാജികളും പലതരം തന്ത്രങ്ങളുടെ ഭാഗമായിരുന്നു. എന്നാല്‍ തോമസ് ചാണ്ടിക്കെതിരെ വ്യക്തമായ തെളിവുകളുണ്ട്. പക്ഷെ, അദ്ദേഹത്തെ നിലനിര്‍ത്തേണ്ടത് സി.പി.എമ്മിന്റെയും മുന്നണിയുടെയും ആവശ്യമാണ്. 

തോമസ് ചാണ്ടിക്കെതിരെ നടപടി വേണമെന്ന് സി.പി.ഐ ആവശ്യപ്പെട്ടിട്ടുണ്ട്. എന്നാല്‍ അദ്ദേഹത്തെ മന്ത്രിസഭയില്‍ നിന്ന് പുറത്താക്കിയാല്‍ രണ്ട് എം.എല്‍.എമാരുള്ള എന്‍.സി.പിക്ക് മന്ത്രിമാരില്ലാത്ത സാഹചര്യമുണ്ടാകും. എ.കെ ശസീന്ദ്രനെ വീണ്ടും മന്ത്രിസഭയിലെടുത്താല്‍ അതും വലിയ വിമര്‍ശനമാകും. മാത്രമല്ല എന്‍.സി.പി ദേശീയ നേതൃത്വം എന്‍.ഡി.എയുമായി അടുക്കാനുള്ള നീക്കങ്ങള്‍ നടക്കുന്നുണ്ട്. ഇപ്പോഴത്തെ രാഷ്ട്രീയ സാഹചര്യത്തില്‍ അങ്ങനെയുണ്ടായാല്‍ അത് എല്‍.ഡി.എഫിനും സര്‍ക്കാരിനും ക്ഷീണമാകും. സി.പി.എമ്മിന്റെ രാഷ്ട്രീയ അതിക്രമങ്ങള്‍ക്കും വികസന മുരടിപ്പിനുമെതിരെ സമരങ്ങളും യാത്രകളും നടത്തുന്ന ബി.ജെ.പിക്ക് വലിയ നേട്ടവുമാകും.

ഇതെല്ലാം കണക്കിലെടുത്ത് രാജി നീട്ടിക്കൊണ്ട് പോകാനാണ് സര്‍ക്കാര്‍ ശ്രമിക്കുന്നത്. കലക്ടറുടെ റിപ്പോര്‍ട്ട് റദ്ദാക്കണമെന്ന് ആവശ്യപ്പെട്ട് തോമസ് ചാണ്ടി ഹൈക്കോടതിയെ സമീപിക്കുമെന്ന് അറിയുന്നു. കളക്ടര്‍ തന്റെ ഭാഗം കേട്ടില്ലെന്നാണ് തോമസ് ചാണ്ടിയുടെ വാദം. കോടതിയില്‍ നിന്ന് അനുകൂല തീരുമാനം ഉണ്ടായാല്‍ അത് വലിയ രാഷ്ട്രീയ വിജയമായിരിക്കും. ഇതെല്ലാം കണക്കിലെടുത്താണ് നടപടി വൈകിപ്പിക്കാന്‍ ബുധനാഴ്ചത്തെ മന്ത്രിസഭാ യോഗം തീരുമാനിച്ചത്. മന്ത്രിസഭാ യോഗത്തിന് മുമ്പ് മുഖ്യമന്ത്രിയുമായി തോമസ് ചാണ്ടി കൂടിക്കാഴ്ച നടത്തിയിരുന്നു.