മന്ത്രി തോമസ് ചാണ്ടിയെ കൊന്നുകളയുമെന്നു പറഞ്ഞ് മന്ത്രിസഭാ യോഗത്തിന് പോയ റവന്യുമന്ത്രി ചന്ദ്രശേഖരന്‍, മുഖ്യമന്ത്രിയെ കണ്ടപ്പോള്‍ സായിപ്പിനെ കണ്ടപ്പോള്‍ കവാത്ത് മറന്നതു പോലെയായി. കളക്ടറുടെ റിപ്പോര്‍ട്ടില്‍ കൂടുതല്‍ പരിശോധന വേണമെന്ന് റവന്യു അഡീഷണല്‍ ചീഫ് സെക്രട്ടറി പി.എച്ച്.കുര്യന്‍ അറിയിച്ചിട്ടുണ്ടെന്ന് മുഖ്യമന്ത്രി പറഞ്ഞതോടെയാണ് ചന്ദ്രശേഖരന്‍ മന്ത്രി പത്തി മടക്കിയത്. റവന്യുമന്ത്രി ചന്ദ്രശേഖരന്‍ പുറത്തു പറഞ്ഞതു പോലെയല്ല കാര്യങ്ങള്‍. മന്ത്രി തോമസ് ചാണ്ടി ഗുരുതര ക്രമക്കേടുകള്‍ നടത്തിയിട്ടുണ്ടെന്ന് തന്നെയാണ് റവന്യുമന്ത്രി കരുതുന്നത്. എന്നാല്‍ അങ്ങനെയൊക്കെ കരുതാന്‍ വരട്ടെ എന്നാണ് മുഖ്യമന്ത്രിയുടെ നിലപാട്. 

റവന്യൂ അഡീഷണല്‍ ചീഫ് സെക്രട്ടറിയുമായി സി പി എം സംസ്ഥാന സെക്രട്ടറിയും മുഖ്യമന്ത്രിയും സംസാരിച്ചിട്ടുണ്ടെന്നാണ് വിവരം. ജില്ലാ കളക്ടര്‍ റ്റി.വി. അനുപുമ സര്‍ക്കാരിനെ പ്രതിസന്ധിയിലാക്കി എന്ന നിഗമനമാണ് ഉന്നത സര്‍ക്കാര്‍ വൃത്തങ്ങള്‍ക്കുള്ളത്. ഇത്തരം റിപ്പോര്‍ട്ടുകള്‍ തയാറാകുമ്പോള്‍ അശ്യമായ കൂടിയാലോചനകള്‍ നടത്തണമായിരുന്നു. അനുപമയുടെ റിപ്പോര്‍ട്ടുമായി കോടതിയില്‍ പോയാല്‍ തനിക്ക് നീതി കിട്ടുമെന്ന് മന്ത്രി ചാണ്ടി വിശ്വസിക്കുന്നു. ഇക്കാര്യം അദ്ദേഹം മുഖ്യമന്ത്രിയുടെ ശ്രദ്ധയില്‍ കൊണ്ടു വന്നിട്ടുണ്ട്.

പ്രധാനമായും തോമസ് ചാണ്ടിയുടെ കൈയേറ്റം നടന്നത് ഈ സര്‍ക്കാരിന്റെ കാലത്തല്ല. കഴിഞ്ഞ പല സര്‍ക്കാരുകളും അദ്ദേഹത്തിന് ഒത്താശ ചെയ്തു കൊടുത്തിട്ടുണ്ട്. അന്നൊന്നും ഉണ്ടാകാത്ത പുകിലാണ് ഇപ്പോള്‍ ഉണ്ടായിരിക്കുന്നത്. അത് മികച്ച രീതിയില്‍ പ്രവര്‍ത്തിക്കുന്ന സര്‍ക്കാരിനെ അട്ടിമറിക്കാന്‍ ഉദ്ദേശിച്ചുള്ളതാണ്. മുഖ്യമന്ത്രിയെ സംബന്ധിച്ചടത്തോളം തോമസ് ചാണ്ടി രാജിവയ്ക്കുന്നതിനോട് യോജിക്കുന്നില്ല. കഴിഞ്ഞ സര്‍ക്കാരിന്റെ കാലത്ത് ഇത്തരത്തില്‍ ധാരാളം ആരോപണങ്ങള്‍ ഉയര്‍ന്നിട്ടും പല മന്ത്രിമാരും രാജി വച്ചിട്ടില്ല. ഇ.പി ജയരാജന്റെ കേസില്‍ ആരോപണം തെളിഞ്ഞിരുന്നു. എന്നാല്‍ തോമസ് ചാണ്ടിയുടെ കേസ് അങ്ങനെയല്ല. ബി ജെ പി യുടെ പാര്‍ലമെന്റ് അംഗം രാജീവ് ചന്ദ്രശേഖര്‍ ചെയര്‍മാനായ ചാനലിന് ദുഷ്ടലാക്കുണ്ടാക്കുമെന്ന് പിണറായി കരുതുന്നു. അതിനാല്‍ അദേഹം രാജിക്ക് സമ്മര്‍ദ്ദം ചെലുത്തില്ല.

മന്ത്രി ചന്ദ്രശേഖരന്‍ മുഖ്യമന്ത്രി പറയുന്നതു മാത്രം അനുസരിക്കുന്ന ആളാണ്. അദ്ദേഹം തന്‍ പ്രമാണിത്തം കാണിക്കുമെങ്കിലും ലോ അക്കാദമി വിഷയത്തില്‍ ഉള്‍പ്പെടെ സി പി എം നിലപാടിനോട് യോജിച്ചാണ് നിന്നിട്ടുള്ളത്. പത്രങ്ങളില്‍ വാര്‍ത്ത വരാന്‍ ഇടയ്ക്ക് വിപ്ലവങ്ങള്‍ പറയാറുണ്ടെന്നു മാത്രം. എന്നാല്‍ മുഖ്യമന്ത്രിയെ കാണുമ്പോള്‍ പറഞ്ഞതെല്ലാം മറക്കും. അതേ സമയം തനിക്ക് അവധി വേണമെന്ന കാര്യം മന്ത്രി ചാണ്ടി മുഖ്യമന്ത്രിയെ വീണ്ടും അറിയിച്ചതായി സൂചനയുണ്ട്. മന്ത്രി എ.കെ.ബാലനോ കടകംപള്ളിക്കോ വകുപ്പിന്റെ ചുമതല നല്‍കി ചാണ്ടിയെ അവധിക്കയക്കാന്‍ മുഖ്യമന്ത്രി ആലോചിക്കുന്നുണ്ട്. തിരികെ വരുമ്പോള്‍ വിവാദം തണുക്കുമെന്നും മുഖ്യമന്ത്രി കരുതുന്നു. തത്കാലം ഇത്തരത്തില്‍ മുഖ്യമന്ത്രി തല ഊരിയേക്കും. തോമസ് ചാണ്ടിയെ അഴിമതിക്കാരനാണെന്ന് പറഞ്ഞ് പുറത്തു കളയാന്‍ സര്‍ക്കാരോ പാര്‍ട്ടിയോ ആലോചിക്കുന്നേയില്ല. അതിനാല്‍ ചാണ്ടി വിവാദം ഇനി മന്ത്രിസഭ ചര്‍ച്ച ചെയ്യില്ല. പകരം മുഖ്യമന്ത്രി തീരുമാനം എടുക്കും. അതിനിടയില്‍ കോടതി ഇടപെടല്‍ ഉണ്ടായാല്‍ ചിലപ്പോള്‍ ചാണ്ടിക്ക് സെക്രട്ടേറിയറ്റ് വിടേണ്ടി വരും.