വീട്ടില്‍ വഴക്കുണ്ടാക്കിയതിന്റെ പേരില്‍ കസ്റ്റഡിയിലെടുത്ത യുവാവിനു നേരേ പോലീസിന്റെ മൂന്നാംമുറ പ്രയോഗം. പിതാവിന്റെ വാക്കാലുള്ള പരാതിയില്‍ കഴിഞ്ഞ തിങ്കളാഴ്ച ഉച്ചകഴിഞ്ഞാണ് ആലപ്പുഴ നോര്‍ത്ത് പോലീസ് ഫൈസലിനെ കസ്റ്റഡയിലെടുത്തത്. എസ്.ഐയുടെ നേതൃത്വത്തിലായിരുന്നു മര്‍ദനം. ഹെല്‍മെറ്റ് ധരിപ്പിച്ചശേഷം കൈകള്‍ പിന്നില്‍ക്കെട്ടി ദേഹത്ത് ഇടിക്കുകയും കാലുകളില്‍ ചൂരലും തടിയും ഉള്‍പ്പടെയുള്ളവ കൊണ്ട് തല്ലിച്ചതയ്ക്കുകയുമായിരുന്നു. ഒടുവില്‍ സി.ഐയും എത്തി ഉപദ്രവിച്ചു.

കോടതിയില്‍ ഹാജരാക്കുന്നതു വരെ മര്‍ദനം തുടര്‍ന്നതായി യുവാവ് മൊഴി നല്‍കി. ശരീരമാസകലം മുറിവേറ്റ പാടുകളുണ്ട്. പെറ്റിക്കേസ് ചുമത്തി ചൊവ്വാഴ്ച ഉച്ചയ്ക്ക് ആലപ്പുഴ ജൂഡീഷ്യല്‍ ഫസ്റ്റ് ക്‌ളാസ് മജിസ്‌ട്രേറ്റ് കോടതിയില്‍ ഹാജരാക്കിയപ്പോഴാണ് പീഡനവിവരങ്ങള്‍ പുറത്തുവന്നത്. പോലീസ് ഉപദ്രവിച്ചെന്ന് പരാതിപ്പെട്ടതോടെ മജിസ്‌ട്രേറ്റ് സഞ്ജയ്കുമാര്‍ ഫൈസലിനെ തന്റെ ചേംബറില്‍ കൊണ്ടു പോയി ദേഹപരിശോധന നടത്തിയപ്പോള്‍ ഇരുകാലുകളിലും മുറിവേറ്റതിന്റെ പാടുകള്‍ കണ്ടു.

കോടതിയില്‍ ഹാജരാക്കിയപ്പോള്‍ മര്‍ദനവിവരം ബോധ്യമായ മജിസ്‌ട്രേറ്റ് യുവാവിനെ തന്റെ ചേംബറില്‍ കൊണ്ടുപോയി ദേഹപരിശോധന നടത്തി. തുടര്‍ന്നു വിദഗ്ധ ചികിത്സയ്ക്കായി ആശുപത്രിയില്‍ പ്രവേശിപ്പിച്ചു. ആലപ്പുഴ സിവ്യൂ വാര്‍ഡ് പുത്തന്‍പറമ്പില്‍ മുഹമ്മദ് കബീറിന്റെ മകന്‍ മുഹമ്മദ് ഫൈസലാ (41)ണ് പകലും രാത്രിയും നീണ്ട മര്‍ദനത്തിനിരയായത്.

എസ്.ഐയും കണ്ടാലറിയാവുന്ന നാലു പോലീസുകാരും ചേര്‍ന്നാണ് മര്‍ദിച്ചതെന്ന് യുവാവ് വെളിപ്പെടുത്തി. വിദഗ്ധ ചികിത്സ നിര്‍ദേശിച്ചുകൊണ്ടുള്ള മജിസ്‌ട്രേറ്റിന്റെ കത്ത് മുദ്രവച്ചകവറില്‍ ആലപ്പുഴ ജനറല്‍ ആശുപത്രി മെഡിക്കല്‍ ഓഫീസര്‍ക്ക് കൊടുത്തയച്ചു. അടിയന്തരമായി മെഡിക്കല്‍ റിപ്പോര്‍ട്ട് നല്‍കാനും നിര്‍ദേശിച്ചിട്ടുണ്ട്.

ഇതേത്തുടര്‍ന്ന് ചൊവ്വാഴ്ച്ച വൈകിട്ട് തന്നെ ഫൈസലിനെ ആശുപത്രിയില്‍ പ്രവേശിപ്പിച്ചു. സ്‌കാനിങ് ഉള്‍പ്പടെയുള്ള പരിശോധനകള്‍ പൂര്‍ത്തിയാക്കിയ ശേഷം ഇന്നു മെഡിക്കല്‍ റിപ്പോര്‍ട്ട് നല്‍കുമെന്ന് ജനറല്‍ ആശുപത്രി സൂപ്രണ്ട് ഡോ.എസ്. ശ്രീദേവി പറഞ്ഞു.

അതേസമയം, ആശുപത്രിയില്‍ സൗകര്യമില്ലാത്തതിനാല്‍ സ്വകാര്യ സ്‌കാനിങ് സെന്ററുകളെ ആശ്രയിക്കേണ്ട സ്ഥിതിയാണുള്ളത്. ഇതിന് പണമില്ലെന്നു കുടുംബാംഗങ്ങള്‍ പറയുന്നു. ഭാര്യയും മൂന്നു കുട്ടികളും അടങ്ങുന്നതാണ് ഫൈസലിന്റെ കുടുംബം.