ജനജാഗ്രതാ യാത്രക്ക് സ്വര്‍ണ കടത്തുകേസിലെ പ്രതിയുടെ വാഹനം ഉപയോഗിച്ചതിനെ തുടര്‍ന്ന് സി.പി.എം വലിയ രാഷ്ട്രീയ പ്രതിസന്ധിയിലേക്ക്. മന്ത്രി തോമസ് ചാണ്ടി മാര്‍ത്താണ്ഡം കായല്‍ കയ്യേറിയെന്ന് കളക്ടര്‍ റിപ്പോര്‍ട്ട് ചെയ്തതിനെ തുടര്‍ന്ന് നിയമനടപടി വൈകിപ്പിക്കുന്നത് വിവാദമായതിന് പിന്നാലെയാണ് പുതിയ പ്രശ്‌നം ഉണ്ടായത്. അതേസമയം തനിക്ക് സ്വര്‍ണ കടത്ത് കേസിലെ പ്രതി കാരാട്ട് ഫൈസലിന്റെ കാര്‍ പാര്‍ട്ടിപ്രവര്‍ത്തകര്‍ സംഘടിപ്പിച്ചത് സംബന്ധിച്ച് അന്വേഷിക്കുമെന്ന് സംസ്ഥാന സെക്രട്ടറിയും ജാഥാ നായകനുമായ കോടിയേരി ബാലകൃഷ്ണന്‍ മാധ്യമങ്ങളോട് പ്രതികരിച്ചു. കാരാട്ട് ഫൈസലിന്റെ വാഹനം മുമ്പും പാര്‍ട്ടി പരിപാടികള്‍ക്ക് ഉപയോഗിച്ചിട്ടുണ്ടെന്നും കൊടുവളളിയില്‍ പാര്‍ട്ടിക്ക് സ്വന്തമായി വാഹനമില്ലെന്നും കോടിയേരി പറഞ്ഞു. 

അതേസമയം കള്ളക്കടത്തുകാരെയും കയ്യേറ്റക്കാരെയും സംരക്ഷിക്കുന്ന നിലപാടാണ് സി.പി.എമ്മും സര്‍്ക്കാരും സ്വീകരിക്കുന്നതെന്ന് യു.ഡി.എഫും ബി.ജെ.പിയും ആരോപിക്കുന്നു. കോടിയേരി നയിക്കുന്ന ജനജാഗ്രത യാത്ര കഴിഞ്ഞ ദിവസം കൊടുവള്ളിയിലെത്തിയപ്പോഴാണ്, ഏറെ കോളിളക്കം സൃഷ്ടിച്ച കരിപ്പൂര്‍ സ്വര്‍ണ കള്ളക്കടത്തു കേസില്‍ റവന്യു ഇന്റലിജന്‍സ് വിഭാഗം അറസ്റ്റ് ചെയ്ത പ്രതി കാരാട്ട് ഫൈസലിന്റെ ആഡംബര കാറില്‍ അദ്ദേഹത്തെ സ്വീകരിച്ച് ആനയിച്ചത്. കോഴിക്കോട് ജില്ലയിലെ ആദ്യത്തെ സ്വീകരണ പരിപാടിയായിരുന്നു കൊടുവള്ളിയിലേത്. കൊടുവള്ളി എം.എല്‍.എ കാരാട്ട് റസാഖുമൊത്താണ് കോടിയേരിയെ ഈ വാഹനത്തില്‍ ആനയിച്ചത്. കള്ളക്കടത്തുകാരെയും 

2014 മാര്‍ച്ചിലാണ് കരിപ്പൂര്‍ സ്വര്‍ണക്കടത്തുമായി ബന്ധപ്പെട്ട് ഇടതു പഞ്ചായത്തംഗമായ ഫൈസലിനെ ഡി.ആര്‍.ഐ അറസ്റ്റ് ചെയ്തത്. കേസില്‍ ഏഴാം പ്രതിയായി ചേര്‍ക്കപ്പെട്ട ഫൈസലിന് സ്വര്‍ണക്കടത്തുമായി ബന്ധമുണ്ടെന്ന് ഡി.ആര്‍.ഐ ഉദ്യോഗസ്ഥര്‍ വെളിപ്പെടുത്തിയിരുന്നു. എയര്‍ ഹോസ്റ്റസുമാരുടെ സഹായത്തോടെ വിദേശത്ത് നിന്നും നികുതി വെട്ടിച്ച് കോടിക്കണക്കിന് രൂപയുടെ സ്വര്‍ണം കടത്തിയെന്ന കേസാണ് ഫൈസലിനെതിരെയുള്ളത്. സി.പി.എം സംസ്ഥാന നേതൃത്വവുമായി ബന്ധപ്പെട്ടുകൊണ്ട് ഏറെ വിവാദങ്ങള്‍ ഉയര്‍ന്നു വന്നിരുന്നു. ഇന്നലെ സംസ്ഥാന സെക്രട്ടറി തന്നെ അത് തെളിയിച്ചതോടെ സി.പി.എം പ്രതിക്കൂട്ടിലായിരിക്കുകയാണ്.