കള്ളക്കടത്തുകാരും കയ്യേറ്റക്കാരും സി.പി.എം മച്ചാന്‍മാരാകുന്നെന്ന് അടുത്തകാലത്ത് നടന്ന ചില സംഭവങ്ങള്‍ വ്യക്തമാക്കുന്നു. കള്ളക്കടത്ത് കേസിലെ പ്രതി കാരാട്ട് ഫൈസലിന്റെ വാഹനത്തില്‍ താന്‍ സഞ്ചരിച്ചെന്നും മുന്‍പും പാര്‍ട്ടി അദ്ദേഹത്തിന്റെ വാഹനം ഉപയോഗിച്ചിട്ടുണ്ടെന്നും സംസ്ഥാന സെക്രട്ടറി കോടിയേരി ബാലകൃഷ്ണന്‍ വ്യക്തമാക്കിയതോടെയാണ് കാര്യങ്ങള്‍ക്ക് കൂടുതല്‍ വ്യക്തതവരുന്നത്. സി.പി.എം പഞ്ചായത്തംഗമായിരുന്ന ഫൈസലിനെ 2014ലാണ് സ്വര്‍ണക്കടത്ത് കേസില്‍ ഡി.ആര്‍.ഡി.ഐ അറസ്റ്റ് ചെയ്തത്. അന്ന് ഇന്നത്തെ കൊടുവളളി എം.എല്‍.എ കാരാട്ട് റസാഖ് ഫൈസലിന് പിന്തുണയുമായി രംഗത്തെത്തിയിരുന്നു.

മന്ത്രി തോമസ് ചാണ്ടിയുടെ ഉടമസ്ഥതയിലുള്ള വാട്ടര്‍വേള്‍സ് ടൂറിസം കമ്പനി ആലപ്പുഴ മാര്‍ത്താണ്ഡം കായല്‍ കയ്യേറിയത് വിവാദമായി , കോടതി കയറുകയാണ്. ഇതിന് പുറമേ മാത്തൂര്‍ ദേവസ്വം ഭൂമി മന്ത്രി കയ്യേറിയെന്ന കേസും കോടതിയുടെ പരിഗണനയിലാണ്. എന്നാല്‍ മന്ത്രിക്കെതിരെ നടപടിയെടുക്കാതെ ഒളിച്ചോടുകയാണ് സി.പി.എം ചെയ്യുന്നത്. തോമസ് ചാണ്ടിക്കെതിരായ സംഭവങ്ങളില്‍ മാധ്യമങ്ങളോട് പ്രതികരിക്കരുതെന്നും വാര്‍ത്തകള്‍ ചോര്‍ത്തി നല്‍കരുതെന്നും മന്ത്രിസഭാ അംഗങ്ങള്‍ക്ക് ഉള്‍പ്പെടെ മുഖ്യമന്ത്രി കര്‍ശന നിര്‍ദ്ദേശം നല്‍കിയിരിക്കുകയാണ്. അതിനിടെയാണ് എല്‍.ഡി.എഫിന്റെ നേതൃത്വത്തില്‍ നടത്തുന്ന ജനജാഗ്രത യാത്രയില്‍ കള്ളക്കടത്തുകാരുടെയും മറ്റും സഹായം സ്വീകരിക്കുന്നത്. 

മൂന്നാറില്‍ മന്ത്രി എം.എം മണിയുടെയും എം.എല്‍.എ രാജേന്ദ്രന്റെയും സഹായത്തോടെയാണ് പലരും സര്‍്ക്കാര്‍ ഭൂമി കയ്യേറുന്നതെന്ന് മാധ്യമ റിപ്പോര്‍ട്ടുകള്‍ വന്നിരുന്നു. കയ്യേറ്റങ്ങള്‍ക്കെതിരെ ശക്തമായ നിലപാടെടുക്കുകയും ഒഴിപ്പിക്കല്‍ നടപടി സ്വീകരിക്കുകയും ചെയ്ത ദേവികുളം സബ്കളക്ടറായിരുന്ന ശ്രീരാം വെങ്കിട്ടറാമിന്റെ കസേര മുഖ്യമന്ത്രി തെറിപ്പിച്ചു. ശ്രീറാമിനെതിരെ മോശം പരാമര്‍ശങ്ങളുമായി മന്ത്രി എം.എം മണി രംഗത്തെത്തിയിരുന്നു. എസ്. രാജേന്ദ്രന്‍ എം.എല്‍.എ കെ.എസ്.ഇ.ബിയുടെ ഭൂമി കയ്യേറിയാണ് വീട് വച്ചതെന്ന് കഴിഞ്ഞ യു.ഡി.എഫ് സര്‍്ക്കാരിന്റെ കാലത്ത് കണ്ടെത്തിയിരുന്നെന്നും എം.എല്‍.എയായത് കൊണ്ട് നടപടി സ്വീകരിച്ചില്ലെന്നും റവന്യൂമന്ത്രിയായിരുന്ന തിരുവഞ്ചൂര്‍ രാധാകൃഷ്ണന്‍ വ്യക്തമാക്കിയിരുന്നു.

മൂന്നാറില്‍ വ്യാപകമായി ഭൂമി കയ്യേറുന്ന സ്പിരിറ്റ് ഇന്‍ ജീസസ് എന്ന സംഘടനയെയും അവര്‍ക്ക് നേതൃത്വം നല്‍കുന്ന തൃശൂര്‍ സ്വദേശിയേയും സംരക്ഷിക്കുന്ന നിലപാടാണ് മന്ത്രി എം.എം മണി സ്വീകരിച്ചത്. സര്‍ക്കാര്‍ തിരിച്ച് പിടിച്ച കയ്യേറ്റഭൂമിയില്‍ സ്പിരിറ്റ് ഇന്‍ ജീസസ് പ്രവര്‍ത്തകര്‍ സ്ഥാപിച്ച കുരിശ് നീക്കം ചെയ്തതിന്റെ പേരിലാണ് സബ് കളക്ടറെ പുകച്ച് പുറത്ത് ചാടിച്ചത്. അതിനെ പ്രധാനപ്പെട്ട ക്രിസ്തീയ സഭകള്‍ പോലും സ്വാഗതം ചെയ്തിരുന്നു. എന്നാല്‍ കുരിശ് പൊളിച്ചത് മതവികാരം വൃണപ്പെടുത്തിയെന്നും വിശ്വാസികളെ സര്‍്ക്കാരിനെതിരെ തിരിക്കാനുള്ള നീക്കമാണ് നടന്നതെന്നും മുഖ്യമന്ത്രി പിണറായി വിജയന്‍ അന്ന് പറഞ്ഞിരുന്നു. അത് എസ്. രാജേന്ദ്രന്‍ ഉള്‍പ്പെടെയുള്ളവര്‍ നടത്തിയ കയ്യേറ്റര്‍ സംരക്ഷിക്കുന്നതിന്റെ ഭാഗമായിരുന്നു. തോമസ് ചാണ്ടിയുടെ കാര്യത്തിലും ആ നിലപാട് തന്നെയാണ് സ്വീകരിക്കുന്നത്.