കയറിക്കിടക്കാന്‍ ഭൂമിയില്ലാത്ത രണ്ട് ലക്ഷം പേര്‍ മൂന്ന് സെന്റ് ഭൂമിക്കായി സര്‍ക്കരിന് അപേക്ഷനല്‍കി കാത്തിരിക്കുമ്പോള്‍ സി.പി.എം എം.എല്‍.എ പി.വി അന്‍വര്‍ 188 ഏക്കര്‍ ഭൂമി അനധികൃതമായി കൈവശം വച്ചിരിക്കുന്നെന്ന് രേഖകള്‍. തെരഞ്ഞെടുപ്പ് കമ്മീഷന് എം.എല്‍.എ നല്‍കിയ സത്യവാങ്മൂലത്തിലാണ് ഇക്കാര്യം വ്യക്തമാക്കുന്നത്. ചതുരശ്ര അടിയുടെ (സ്‌ക്വയര്‍ഫീറ്റ്) അടിസ്ഥാനത്തിലാണ് ഭൂമിയുടെ അളവ് സത്യവാങ്മൂലത്തില്‍ നല്‍കിയിരിക്കുന്നത്.അതിനാല്‍ അധികൃതര്‍ ഇക്കാര്യം ശ്രദ്ധിച്ചിരുന്നില്ല. സംസ്ഥാനത്ത് ഇ.എം.എസ് മുഖ്യമന്ത്രിയായിരിക്കെ നടപ്പാക്കിയ ഭൂപരിഷ്‌കരണ നിയമപ്രകാരം ഒരാള്‍ക്ക് 15 ഏക്കറില്‍ കൂടുതല്‍ ഭൂമി കൈവശം വയ്ക്കാനാവില്ല. 

203 ഏക്കര്‍ കാര്‍ഷികേതര ഭൂമി തനിക്കുണ്ടെന്ന് എം.എല്‍.എ വ്യക്തമാക്കുന്നു. അനധികൃതമായി വാട്ടര്‍ തീം പാര്‍ക്ക് നടത്തുന്നത് മാധ്യമങ്ങള്‍ പുറത്ത് കൊണ്ടുവന്നതോടെയാണ് പി.വി അന്‍വര്‍ എന്ന മുതലാളി എം.എല്‍.എ കേരള രാഷ്ട്രീയത്തില്‍ ശ്രദ്ധേയനായത്. ഭൂ പരിഷ്‌കരണ നിയമപ്രകാരം അധികം വച്ചിരിക്കുന്ന 188 ഏക്കര്‍ ഭൂമി സര്‍ക്കാരിന് തിരിച്ച് പിടിക്കാം. കളക്ടര്‍ക്ക് ഇതിന് അധികാരമുണ്ട്. കോഴിക്കോട്, മലപ്പുറം ജില്ലകളിലാണ് ഭൂമി കൈവശം വച്ചിരിക്കുന്നത്. കോഴിക്കോട് ജില്ലയില്‍ മാത്രം 20,000 പേരാണ് ഭൂരഹിതരായുള്ളത്. സംസ്ഥാനത്തെ ഭൂ രഹിതര്‍ക്ക് ഭൂമി നല്‍കുമെന്ന് വാഗ്ദാനം നല്‍കിയാണ് പിണറായി വിജയന്‍ സര്‍്ക്കാര്‍ അധികാരത്തിലേറിയത്. 

നിയമപ്രകാരമുള്ള 203 ഏക്കറിന് പുറമേ ബിനാമി പേരിലും പി.വി അന്‍വര്‍ ഭൂമി വാങ്ങിക്കൂട്ടിയിട്ടുണ്ടെന്നും ഇതെല്ലാം പാവങ്ങളെ ഭീഷണിപ്പെടുത്തി കുറഞ്ഞവിലയ്ക്ക് സ്വന്തമാക്കിയതാണെന്നും പ്രദേശവാസിയായ മുരുകേശ് നരേന്ദ്രന്‍ ആരോപിച്ചു. പിണറായി വിജയന്‍ ഭൂമാഫിയക്കാരായ മുതലാളിമാരെ സംരക്ഷിക്കുകയാണെന്ന് മുതിര്‍ന്ന കോണ്‍ഗ്രസ് നേതാവ് വി.എം സുധീരന്‍ ആരോപിച്ചു. തോമസ് ചാണ്ടിക്കും പി.വി അന്‍വറിനും എതിരെ നിയമനടപടി സ്വീകരിക്കാത്തത് ഇതിന്റെ ഭാഗമായാണെന്നും അദ്ദേഹം ചൂണ്ടിക്കാട്ടി.