സുപ്രീംകോടതി ആവശ്യപ്പെട്ടാല്‍ ജിഷ്ണു പ്രണോയ് കേസില്‍ അന്വേഷണം ഏറ്റെടുക്കാന്‍ തയ്യാറാണെന്ന് സി.ബി.ഐ. അതേസമയം, സങ്കീര്‍ണതകളൊന്നുമില്ലാത്ത കേസ് സി.ബി.ഐ അന്വേഷിക്കണമെന്ന് ആവശ്യപ്പെട്ടത് കേരളസര്‍ക്കാറിന്റെ കഴിവുകേടാണെന്ന് അന്വേഷണഏജന്‍സി സുപ്രീംകോടതിയില്‍ പറഞ്ഞു. പാമ്പാടി നെഹ്‌റു കോളജ് വിദ്യാര്‍ഥി ജിഷ്ണു പ്രണോയ് കാമ്പസില്‍ ആത്മഹത്യ ചെയ്ത കേസ് സി.ബി.െഎക്ക് വിടണമെന്ന കേരളത്തിന്റെ ആവശ്യം പരിഗണിക്കുമെന്ന് സുപ്രീംകോടതി വ്യക്തമാക്കി. കേസില്‍ നെഹ്‌റു ഗ്രൂപ് ചെയര്‍മാന്‍ കൃഷ്ണപ്രസാദ് പ്രധാന പ്രതിയാണ്.

കേസ് സി.ബി.ഐ സ്വയം ഏറ്റെടുക്കുകയല്ലാതെ അതിനായി വിധി പുറപ്പെടുവിക്കുന്നത് അനുചിതമാണെന്ന് ജസ്റ്റിസ് എന്‍.വി. രമണ അധ്യക്ഷനായ ബെഞ്ച് ചൂണ്ടിക്കാട്ടി. എന്നാല്‍, കേരളത്തിനുവേണ്ടി അഡ്വ. ഹരേന്‍ പി. റാവലും ജിഷ്ണുവിന്റെ അമ്മ മഹിജക്ക് വേണ്ടി അഡ്വ. ജയ്‌മോന്‍ ആന്‍ഡ്രൂസും നടത്തിയ വാദത്തെതുടര്‍ന്ന് കോടതി നിലപാട് മാറ്റുകയായിരുന്നു. സി.ബി.ഐ അനുകൂലിക്കാതിരുന്നിട്ടും ചില കേസുകള്‍ സുപ്രീംകോടതി സി.ബി.ഐക്ക് വിട്ട മുന്‍ ഉദാഹരണങ്ങള്‍ ഹരേന്‍ പി. റാവല്‍ സമര്‍പ്പിച്ചു. സത്യം പുറത്തുവരാന്‍ അത് കൂടിയേ തീരൂ എന്നും റാവല്‍ പറഞ്ഞു.

കേരള പൊലീസിന്റെ ഭാഗത്ത് നിന്ന് നീതി ലഭിക്കില്ലെന്നും അതിനാല്‍ കേസ് സി.ബി.ഐക്ക് വിടണമെന്നും ജയ്‌മോന്‍ ആന്‍ഡ്രൂസ് വാദിച്ചു. മഹിജ ഉപവാസ സമരത്തിനിറങ്ങിയപ്പോഴാണ് സര്‍ക്കാറിന്റെ ഭാഗത്തുനിന്ന് നടപടിയുണ്ടായത്. മഹിജയെ പൊലീസ് വലിച്ചിഴച്ചുകൊണ്ടുപോയ കാര്യവും അഭിഭാഷകന്‍ ഓര്‍മിപ്പിച്ചു. ജോലിഭാരം കൂടുതലായതിനാല്‍ കേസ് ഏറ്റെടുക്കാനാവില്ലെന്നാണ് സി.ബി.ഐ അഭിഭാഷകന്‍ ആദ്യം വാദിച്ചത്.

സംസ്ഥാന പോലീസ് മേധാവി തന്നെ സി.ബി.ഐ അന്വേഷണം ആവശ്യപ്പെട്ട സ്ഥിതിക്ക് മറ്റെന്താണ് പറയാനുള്ളതെന്ന് ജസ്റ്റിസ് രമണ ചോദിച്ചപ്പോള്‍ കോടതി പറയുകയാണെങ്കില്‍ അന്വേഷണം ഏറ്റെടുക്കാമെന്ന് വ്യക്തമാക്കുകയായിരുന്നു. തുടര്‍ന്ന് സി.ബി.ഐ അന്വേഷണ ആവശ്യം പരിഗണിക്കാമെന്ന് പറഞ്ഞ് കേസ് വെള്ളിയാഴ്ച വാദം തുടരാനായി മാറ്റി.