വിദ്യാര്‍ത്ഥിനിയായ ഊഷ്മള്‍ ഉല്ലാസിന്റെ ആത്മഹത്യയ്ക്ക് കാരണം ഫെയ്‌സ്ബുക്ക് പോസ്‌റ്റെന്ന് സൂചന. വിദ്യാര്‍ത്ഥികളുടെ ഫെയ്‌സ്ബുക്ക് ഗ്രൂപ്പില്‍ ഊഷ്മളിന്റെ പേരില്‍ സഹപാഠികളായ ചിലര്‍ അപകീര്‍ത്തികരമായ പോസ്റ്റ് ഇട്ടിരുന്നതായി അന്വേഷണ സംഘത്തിന് സൂചന ലഭിച്ചു. പോസ്റ്റിന്റെ സ്‌ക്രീന്‍ ഷോട്ട് വിദ്യാര്‍ത്ഥികളുടെ വാട്‌സ്ആപ്പ് ഗ്രൂപ്പില്‍ പ്രചരിക്കുകയും ചെയ്തു.

പോസ്റ്റിന്റെ വസ്തുതയെക്കുറിച്ച് ഊഷ്മളിനോട് നിരവധി വിദ്യാര്‍ത്ഥികള്‍ അന്വേഷിച്ചിരുന്നു. ഇതിന്റെ മനോവിഷമത്തിലാണ് ഊഷ്മള്‍ ആത്മഹത്യ ചെയ്തതെന്നാണ് സൂചന. നവംബര്‍ 13ന് അവസാനമായി ഊഷ്മള്‍ പോസ്റ്റ് ചെയ്ത എഫ്.ബി സ്റ്റാറ്റസില്‍ ഇതേക്കുറിച്ച് സൂചനയുണ്ട്. ചില ഫെയ്‌സ്ബുക്ക് കമന്റുകളുടെ സ്‌ക്രീന്‍ ഷോട്ടും ഇതോടൊപ്പം ചേര്‍ത്തിട്ടുണ്ട്. യഥാര്‍ത്ഥ പ്രതിയെ സൈബര്‍ സെല്ലിന്റെ സഹായത്തോടെ ജാമാക്കിയിട്ടുണ്ട് എന്നൊരു കമന്റും ഈ പോസ്റ്റിന് ലഭിച്ചിട്ടുണ്ട്.

മണാശേരി കെ.എം.സി.ടി മെഡിക്കല്‍ കോളജില്‍ നാലാം വര്‍ഷ വിദ്യാര്‍ത്ഥിയായിരുന്ന ഊഷ്മള്‍ കഴിഞ്ഞ ബുധനാഴ്ച വൈകുന്നേരം അഞ്ച് മണിയോടെയാണ് ജീവനൊടുക്കിയത്. കോളജിന്റെ ആറാം നിലയില്‍ നിന്നും ഊഷ്മള്‍ ചാടി മരിക്കുകയായിരുന്നു. സംഭവ ദിവസം അവസാനമായി വന്ന ഫോണ്‍ കോളിന് ശേഷം ഊഷ്മള്‍ ദേഷ്യം പ്രകടിപ്പിച്ചിരുന്നതായി അന്വേഷണത്തില്‍ വ്യക്തമായിട്ടുണ്ട്. അവസാന ഫോണ്‍ കോളിന് ശേഷം ഊഷ്മള്‍ ഫോണ്‍ നിലത്തെറിഞ്ഞ് ഉടച്ചു. അടുത്ത സുഹൃത്താണ് ഈ കോള്‍ വിളിച്ചത്. ഈ ഫോണ്‍ കോളുമായി ബന്ധപ്പെട്ടും പോലീസ് അന്വേഷണം പുരോഗമിക്കുന്നു.

ഊഷ്മളിന്റെ സഹപാഠികളെ പോലീസ് ചോദ്യം ചെയ്തിരുന്നു. എന്നാല്‍ രക്ഷിതാക്കളെ ചോദ്യം ചെയ്യാന്‍ സാധിച്ചിട്ടില്ല. രക്ഷിതാക്കളെ ചോദ്യം ചെയ്യുന്നതിന് മരണാനന്തര ചടങ്ങുകള്‍ കഴിയാന്‍ കാത്തിരിക്കുകയാണ് പോലീസ്. കൊടുവള്ളി സി.ഐ എന്‍. ബിശ്വാസാണ് കേസ് അന്വേഷിക്കുന്നത്.