ജിഷ വധക്കേസില്‍ അമീറുല്‍ ഇസ്‌ലാമിനെ കുറ്റക്കാരനായി കണ്ടെത്തിയപ്പോള്‍ ആശ്വാസമായത് പൊലീസ് ആദ്യം കണ്ടെത്തിയ '29 പ്രതികള്‍ക്കാണ്്. കൊല നടന്ന് മൂന്നാം ദിവസം മുതല്‍ സമ്മര്‍ദത്തിലായ പൊലീസ് സംശയിച്ച് കസ്റ്റഡിയിലെടുത്ത 29 പേരാണ് ഇവര്‍. ജിഷയുടെ അയല്‍വാസികള്‍ മുതല്‍, സിനിമ മോഹവുമായി നടന്ന ചെറുപ്പക്കാരനും കണ്ണൂര്‍ സ്വദേശിയും ഇടുക്കി സ്വദേശിയും ഇതില്‍ ഉള്‍പ്പെടുന്നുണ്ട്. 30 പേരെ കസ്റ്റഡിയിലെടുത്തെങ്കിലും ഏറെ സംശയിക്കപ്പെട്ട ജിഷയുടെ അയല്‍വാസി സാബു വിധി വരും മുമ്പെ തൂങ്ങിമരിച്ചിരുന്നു. പല്ലിന് വിടവുള്ളയാളുടെ മഞ്ഞ ഷര്‍ട്ടിട്ട രേഖാചിത്രം പൊലീസ് പുറത്തുവിട്ടതോടെയാണ് പല്ലിന് വിടവുള്ളവര്‍ക്ക് പൊല്ലാപ്പായത്. ഒരു വിദ്യാര്‍ഥി യൂണിയന്‍ നേതാവിനെ രേഖാചിത്രത്തിനോട് സാദൃശ്യമുള്ളതിനാല്‍ മണിക്കൂറുകള്‍ ചോദ്യം ചെയ്തപ്പോള്‍ പല്ലിന് വിടവുള്ള സാബുവിനെ പൊലീസ് കസ്റ്റഡിയിലെടുത്തു.

തെരഞ്ഞെടുപ്പിനുമുമ്പ് പ്രതിയെ പിടിക്കുക എന്ന രാഷ്ട്രീയ നേട്ടത്തിന് കേസിനെ ഉപയോഗപ്പെടുത്തേണ്ടി വന്നപ്പോള്‍ കളമശ്ശേരി എ.ആര്‍ ക്യാമ്പിലെ രണ്ട് പൊലീസുകാര്‍ക്കും 'പ്രതി'വേഷം കെട്ടേണ്ടി വന്നു. പല സ്ഥലങ്ങളില്‍ പല കേസുകളുമായി അറസ്റ്റ് ചെയ്ത പലരെയും പല്ലിന് വിടവുള്ളതിനാല്‍ ജിഷ കേസിലും ചോദ്യം ചെയ്തു.

രേഖാ ചിത്രവുമായി സാമ്യമുള്ളതിനാല്‍ കളമശ്ശേരി സ്വദേശിക്ക് പറഞ്ഞുവെച്ച സിനിമ റോള്‍പോലും കൈയില്‍നിന്ന് പോകുമെന്ന അവസ്ഥ വന്നു. ജിഷയുടെ കൂടെ കോളജിലുണ്ടായിരുന്ന വിദ്യാര്‍ഥിക്കും ചോദ്യം ചെയ്യലിന് വിധേയനാവേണ്ടി വന്നു. പൊലീസ് ആരെയെങ്കിലും കസ്റ്റഡിയിലെടുത്താല്‍ പ്രതിയെന്ന രീതിയില്‍ സാമൂഹികമാധ്യമങ്ങളില്‍ വട്ടോളിപ്പടി വൈദ്യശാലപ്പടിയിലെ പലരുടെയും ചിത്രങ്ങള്‍ പ്രചരിക്കുന്ന അവസ്ഥ വരെ ഉണ്ടായി. അതേസമയം ഇപ്പോള്‍ ഏക പ്രതിയായ അമിറുളിന് വധശിക്ഷ വിധിച്ചതു കേട്ടതു മുതല്‍ ഇവര്‍ ആശ്വാസത്തിലാണ് .