ഡീലര്മാരാണ് രജിസ്ട്രേഷന് നടപടിക്രമങ്ങള് പൂര്ത്തീകരിച്ച് കാര് എത്തിച്ചതെന്ന് ഫഹദ്; ടാക്സ് നിയമങ്ങളെ കുറിച്ച് തനിക്ക് വ്യക്തമായ അറിവില്ലായിരുന്നെന്നും താരം
ആഢംബരവാഹനത്തിന്റെ നികുതിവെട്ടിച്ച കേസില് കാര് ഡീലര്മാരെയും ഫഹദ് ഫാസില് കുടുക്കി. ക്രിസ്തുമസിന് താരത്തെ ക്രൈംബ്രാഞ്ച് ചോദ്യം ചെയ്തപ്പോഴാണ് പോണ്ടിച്ചേരിയില് വാഹനം രജിസ്റ്റര് ചെയ്തതില് ഡീലര്മാര്ക്കുള്ള പങ്ക് താരം വെളിപ്പെടുത്തിയത്. ഇതോടെ അവരെയും കേസില് പ്രതി ചേര്ക്കാന് ക്രൈംബ്രാഞ്ച് തീരുമാനിച്ചു. ബാംഗ്ലൂരുവിലും ഡല്ഹിയിലുമുള്ള ഡീലര്മാരെ താമസിക്കാതെ ചോദ്യം ചെയ്യും. ഇവരുടെ വിവരങ്ങള് അന്വേഷണസംഘം ശേഖരിച്ചിട്ടുണ്ട്.
ഡീലര്മാരാണ് രജിസ്ട്രേഷന് നടപടിക്രമങ്ങള് പൂര്ത്തീകരിച്ച് കാര് എത്തിച്ചത്. ടാക്സ് നിയമങ്ങളെ കുറിച്ച് തനിക്ക് വ്യക്തമായ അറിവില്ലായിരുന്നെന്നും ഫഹദ് അന്വേഷണ സംഘത്തിന് മൊഴി നല്കി. പിഴയടയ്ക്കാന് തയ്യാറാണെന്നും മന:പൂര്വം നിയമലംഘനം നടത്തിയിട്ടില്ലെന്നും താരം വ്യക്തമാക്കി. തുടര്ന്ന് അറസ്റ്റ് രേഖപ്പെടുത്തി. രണ്ട് പേരുടെ ജാമ്യത്തിലും 50000 രൂപ കെട്ടിവച്ചുമാണ് പിന്നീട് വിട്ടയച്ചത്. ക്രിസ്മസ് ദിവസം രാവിലെ 10 മുതല് ഉച്ചയ്ക്ക് ഒരു മണിവരെയാണ് പൊലീസ് ആസ്ഥാനത്ത് ഫഹദിനെ ചോദ്യം ചെയ്തത്.
കേസില് ആദ്യം ഫഹദ് 17 ലക്ഷം പിഴയടച്ചിരുന്നു. എന്നാല് ക്രൈംബ്രാഞ്ച് നിയമനടപടികളുമായി മുന്നോട്ട് പോവുകയായിരുന്നു. ഇതോടെ മുന്കൂര് ജാമ്യംതേടി ഫഹദ് ആലപ്പുഴ കോടതിയിലെത്തി. ഉപാധികളോടെ ജാമ്യം ലഭിച്ചു. അന്വേഷണസംഘത്തിന് മുന്നില് ഹാജരാകാനും നിര്ദ്ദേശിച്ചു. പോണ്ടിച്ചേരിയിലെ വ്യാജ വിലാസത്തില് 70 ലക്ഷം വിലയുള്ള ബെന്സ് രജിസ്റ്റര് ചെയ്ത് നികുതി വെട്ടിച്ചെന്നാണ് കേസ്. സമാനമായ കേസില് സുരേഷ് ഗോപി എം.പിക്ക് ഹൈക്കോടതി മുന്കൂര് ജാമ്യം അനുവദിച്ചിരുന്നു.
ഇതേ കേസില് നടി അമലാപോള് മുന്കൂര് ജാമ്യത്തിനായി ഹൈക്കോടതിയെ സമീപിച്ചിരിക്കുകയാണ്. ക്രിസ്മസ് അവധിക്ക് ശേഷം ജാമ്യാപേക്ഷ പരിഗണിക്കും. അമല പോണ്ടിച്ചേരിയില് വീടുണ്ടെന്ന് കാട്ടിയാണ് കാര് രജിസ്റ്റര് ചെയ്തത്. തമിഴ്നാട്ടിലും ബാംഗ്ലൂരിലും വാഹനം ഓടുന്നെന്നാണ് താരം പറയുന്നത്. കൊച്ചി ഇടപ്പള്ളിയിലെ വീട്ടില് വാഹനം കണ്ടെത്തിയിരുന്നു. ജാമ്യം കിട്ടിയാലും ഇല്ലെങ്കിലും ക്രൈംബ്രാഞ്ചിന് മുന്നില് താരം ഹാജരാകേണ്ടിവരും.
https://www.facebook.com/Malayalivartha
