സോളാറും ഓഖി ദുരന്തത്തിലെ വീഴ്ചയും സോളാറില് ഹൈക്കോടതിയില് നിന്ന് സര്ക്കാരിന് കിട്ടിയ തിരിച്ചടിയും നിയമസഭയെ പ്രക്ഷുബ്ദമാക്കും
നിയമസഭാ സമ്മേളനം ജനുവരി 22 മുതല് വിളിച്ച് ചേര്ക്കാന് മന്ത്രിസഭാ യോഗം ഗവര്ണറോട് ശുപാര്ശ ചെയ്തു. സോളാര് കേസിന്റെ പുനരന്വേഷണം ഉള്പ്പെടെ വഴിമുട്ടിയ സാഹചര്യത്തില് സമ്മേളനം പ്രക്ഷുബ്ദമാകും. യു.ഡി.എഫിനെ അപമാനിക്കാന് കമ്മിഷന് റിപ്പോര്ട്ട് സര്ക്കാര് ഉപയോഗിച്ചെന്നാണ് കോണ്ഗ്രസ് നേതാക്കളുടെ ആരോപണം. ഓഖി ദുരന്തം കൈകാര്യം ചെയ്തതില് സര്ക്കാരിന്റെ ഭാഗത്തുണ്ടായ വീഴ്ചയും പ്രതിപക്ഷം ആയുധമാക്കും. സോളാര് കമ്മിഷന് റിപ്പോര്ട്ട് സഭയില് വയ്ക്കും മുമ്പ് അതിലെ പ്രധാനഭാഗങ്ങള് അടര്ത്തിയെടുത്ത് മുന്മുഖ്യമന്ത്രി ഉമ്മന്ചാണ്ടിയേയും മറ്റും അപകീര്ത്തിപ്പെടുത്താനാണ് മുഖ്യമന്ത്രി പിണറായി വിജയന് ശ്രമിച്ചതെന്ന് യു.ഡി.എഫ് ആരോപിക്കുന്നു.
ഉമ്മന്ചാണ്ടിയെ വ്യക്തിഹത്യ നടത്താന് സര്ക്കാര് ശ്രമിച്ചെന്നും വ്യക്തിയുടെ അവകാശങ്ങള് സംരക്ഷിക്കാന് സര്ക്കാരിന് ബാധ്യതയുണ്ടെന്നും ഒരു മാസത്തേക്ക് റിപ്പോര്ട്ടിലെ കാര്യങ്ങള് പൊതു ചര്ച്ചയ്ക്ക് എടുക്കരുതെന്നും വിചാരണ വേളയില് പറയേണ്ട കാര്യങ്ങള് സര്ക്കാര് പുറത്ത് വിട്ടത് ശരിയല്ലെന്നും ഹൈക്കോടതി വ്യക്തമാക്കിയത് കോണ്ഗ്രസ് ആയുധമാക്കും. ഇതോടെ ആരോപണ, പ്രത്യാരോപണങ്ങളുമായി സമ്മേളനത്തിന് ചൂടേറുമെന്ന് ഉറപ്പാണ്. കേരളാ കോണ്ഗ്രസിന്റെ മുന്നണിപ്രവേശനം, ജെ.ഡി.യുവിന്റെ എല്.ഡി.എഫ് പ്രവേശനം എല്ലാം ചര്ച്ചയാകും.
മറ്റ് മന്ത്രിസഭാ തീരുമാനങ്ങള് ഇവ: സംസ്ഥാനത്തെ മദ്രസാ അധ്യാപകര്ക്ക് പെന്ഷനും മറ്റ് ആനുകൂല്യങ്ങളും ലഭ്യമാക്കുന്നതിന് കേരള മദ്രസാ അധ്യാപക ക്ഷേമനിധി ബോര്ഡ് രൂപീകരിക്കാന് മന്ത്രിസഭ തീരൂമാനിച്ചു. ഇത് സംബന്ധിച്ച ബില്ലിന്റെ കരട് അംഗീകരിച്ചു. കേരള മെട്രോപൊളിറ്റന് ട്രാന്സ്പോര്ട്ട് അതോറിറ്റി ബില്ലിന്റെ കരട് മന്ത്രിസഭ അംഗീകരിച്ചു. സംസ്ഥാനത്ത് കൊച്ചി ഉള്പ്പടെയുളള അര്ബന് മൊബിലിറ്റി പ്രദേശങ്ങളിലെ ഗതാഗതത്തിന്റെ ആസൂത്രണം, മേല്നോട്ടം, ഏകോപനം, വികസനം, നിയന്ത്രണം എന്നിവയ്ക്കും അനുബന്ധ സേവനങ്ങള്ക്കും വേണ്ടി മെട്രോപൊളിറ്റന് ട്രാന്സ്പോര്ട്ട് അതോറിറ്റികള് രൂപീകരിക്കുന്നതിനാണ് പുതിയ നിയമ നിര്മ്മാണം.
കേന്ദ്ര സര്ക്കാരിന്റെ 2017ലെ മെട്രോ റെയില് പോളിസിയില് മെട്രോ പദ്ധതികള് നടപ്പാക്കുന്ന നഗരങ്ങളില് യൂണിഫൈഡ് മെട്രോപൊളിറ്റന് ട്രാന്സ്പോര്ട്ട് അതോറിറ്റി (യു.എം.ടി.എ) രൂപീകരിക്കണമെന്ന് നിഷ്കര്ഷിക്കുന്നുണ്ട്. അത് കണക്കിലെടുത്താണ് ബില് കൊണ്ടുവരുന്നത്.
മലപ്പുറം സ്പെഷ്യല് ബ്രാഞ്ചില് ഒരു സീനിയര് സിവില് പോലീസ് ഉദ്യോഗസ്ഥന്റെയും രണ്ട് സിവില് പോലീസ് ഉദ്യോഗസ്ഥരുടെയും തസ്തികകള് സൃഷ്ടിക്കാന് തീരുമാനിച്ചു.
തിരുവനന്തപുരം ഐ.പി.എം.എസ് ഏവിയേഷന് ഇന്സ്റ്റിറ്റിയൂട്ട് വിദ്യാര്ത്ഥി തുണ്ടുതടത്തില് വീട്ടില് ആതിരയുടെ ചികിത്സയ്ക്ക് നാലു ലക്ഷം രൂപ പട്ടികജാതിപട്ടികവര്ഗ വികസന വകുപ്പ് മന്ത്രിയുടെ ദുരിതാശ്വാസ നിധിയില് നിന്ന് അനുവദിക്കാന് തീരുമാനിച്ചു. കോഴിക്കോട് വിമാനത്താവളത്തില് ഇന്റേണ്ഷിപ്പ് ചെയ്യുന്നതിനിടയില് താമസിച്ചിരുന്ന ലോഡ്ജിന്റെ മുകളില് നിന്ന് ചാടിയാണ് ആതിരയ്ക്ക് പരിക്കേറ്റത്. ജാതീയമായ അധിക്ഷേപങ്ങളെ തുടര്ന്നാണ് പെണ്കുട്ടി കെട്ടിടത്തിനു മുകളിള്നിന്ന് ചാടിയത്. ആതിരയുടെ ചികിത്സയ്ക്ക് നേരത്തെ സര്ക്കാര് ഒരു ലക്ഷം രൂപ അനുവദിച്ചിരുന്നു. അതിനു പുറമെയാണ് നാല് ലക്ഷം രൂപ അനുവദിക്കുന്നത്.
https://www.facebook.com/Malayalivartha
