ബ്രിഡ്ജ് കോഴ്സ് വിഷയത്തില് ഐ.എം.എയ്ക്കൊപ്പമാണ് ആയുഷ് ഡോക്ടര്മാര്, ഇത് മനസിലാക്കാതെ സോഷ്യല്മീഡിയയിലൂടെ ആയൂര്വേദത്തെയും ഹോമിയോപതിയെയും വിമര്ശിക്കുന്നത് ശരിയല്ലെന്നും ഡോ.ബിജു
ദേശീയ മെഡിക്കല് കമ്മിഷന് ബില് രാജ്യവ്യാപകമായി പ്രതിഷേധവും ചര്ച്ചയുമാകുമ്പോള് ഹോമിയോ ഡോക്ടറും ചലച്ചിത്ര സംവിധായകനുമായ ഡോ.ബിജു ആയൂഷ് ഡോക്ടര്മാരുടെ നിലപാടും ഒപ്പം അലോപ്പതിക്കാര്ക്കെതിരെയുള്ള വിമര്ശനവും വ്യക്തമാക്കുന്നു. ആയുഷ് ഡോക്ടര്മാര് ആരും തന്നെ ബ്രിഡ്ജ് കോഴ്സ് വേണം എന്ന നിലപാടിലല്ലെന്ന് ഡോ.ബിജു പറയുന്നു. ഇതിനെ ശക്തമായി എതിര്ക്കന്നവരാണവര്. അഞ്ചര വര്ഷം കഷ്ടപ്പെട്ട് ആയുഷ് ഡോക്ടര്മാര് പഠിച്ചത് ആയൂര്വേദവും ഹോമിയോപ്പതിയും ചികില്സിക്കാനാണ്. എം ബി ബി എസ് പഠിക്കാന് താല്പര്യമുള്ളവര് ആയുഷ് വൈദ്യശാസ്ത്രം പഠിക്കാന് എത്തേണ്ട കാര്യമില്ല. അത്യാവശ്യം പണമുണ്ടെങ്കില് ആര്ക്കും എം ബി ബി എസ് സീറ്റ് വിലയ്ക്ക് വാങ്ങാന് കിട്ടുന്ന നാടാണ് ഇന്ത്യ. അതുകൊണ്ട് ആ ബിരുദം ആണ് ലോകത്തെ ഏറ്റവും മഹത്തായ കാര്യമാണെന്ന് ധരിക്കേണ്ട.
ആയുഷ് ഡോക്ടര്മാരുടെ അടുത്ത് എത്തുന്നത് ആ വിഭാഗത്തിലെ ചികിത്സ ആവശ്യമുള്ളവരാണ്. അല്ലാതെ അലോപ്പതി ചികിത്സയ്ക്കായല്ല ആളുകള് ആയുഷ് ഡോക്ടര്മാരെ സമീപിക്കുന്നത്. അതേപോലെ അലോപ്പതി ഡോക്ടര്മാരുടെ അടുത്ത് രോഗികള് എത്തുന്നത് അലോപ്പതി ചികിത്സയ്ക്കാണ് ആയൂഷ് ചികിത്സയ്ക്കല്ല. ഓരോ വൈദ്യ ശാസ്ത്രത്തിനും അതിന്റെതായ നേട്ടങ്ങളും കോട്ടങ്ങളുമുണ്ട്. ഒരു വൈദ്യശാസ്ത്രവും പൂര്ണ്ണമല്ല. ഓരോ വൈദ്യശാസ്ത്രവും അതിന്റെ തനതായ സവിശേഷതകള് നിലനിര്ത്തി പരസ്പര പൂരകങ്ങളായി ജനങ്ങള്ക്ക് ഉപകാരപ്പെടുകയാണ് വേണ്ടത്. ബ്രിഡ്ജ് കോഴ്സ് ആയുഷ് വൈദ്യ ശാസ്ത്രങ്ങള്ക്ക് ഏറെ ദോഷമാണ് ചെയ്യുക. ഈ വൈദ്യശാസ്ത്രങ്ങളെ അപ്രസക്തമാക്കാന് മാത്രമേ ഈ കോഴ്സ് ഉപകരിക്കൂ.
സര്ക്കാരിന്റെ മറ്റൊരു നിര്ദ്ദേശമായ അലോപ്പതി ഡോക്ടര്മാര്ക്ക് ബ്രിഡ്ജ് കോഴ്സിലൂടെ ആയുഷ് വൈദ്യശാസ്ത്രം ചികില്സിക്കാമെന്ന ആലോചനയും എതിര്ക്കപ്പെടേണ്ടതാണ്. ഓരോ വൈദ്യ ശാസ്ത്രങ്ങളെയും അതിന്റെ തനതായ സവിശേഷതകളോടെ നിലനിര്ത്താനും ഉപയോഗപ്രദമാക്കാനുമാണ് കേന്ദ്ര സര്ക്കാര് ശ്രമിക്കേണ്ടത്. അല്ലാതെ സങ്കര വൈദ്യത്തെ പ്രോത്സാഹിപ്പിക്കുകയല്ല ചെയ്യേണ്ടത്. ഇന്ത്യയില് ഇപ്പോഴും നിരവധി ഗ്രാമങ്ങളില് പ്രാഥമിക ആരോഗ്യ സംവിധാനങ്ങളില്ല. ഒരു പി എച്ച് സി പോലും 50 കിലോമീറ്റര് ചുറ്റളവില് ഇല്ലാത്ത ഗ്രാമങ്ങളുണ്ട്. എല്ലാ ജനങ്ങള്ക്കും ഏതെങ്കിലും വിഭാഗത്തില് ഒരു പ്രാഥമിക ആരോഗ്യ സ്ഥാപനങ്ങള് എങ്കിലും ലഭ്യമാക്കുവാനാണ് സര്ക്കാര് ശ്രമിക്കേണ്ടത്.
അതുകൊണ്ട് ആയുഷ് ഡോക്ടര്മാര്ക്ക് ബ്രിഡ്ജ് കളിച്ചു അലോപ്പതി ഡോക്ടര്മാരാകാനാണ് ഈ സര്ക്കാര് നീക്കമെന്ന് കരുതി ഹോമിയോപ്പതിയെയും ആയൂര്വേദത്തെയും കളിയാക്കാനായി പോസ്റ്റുമായി കുറച്ച് ആളുകള് സോഷ്യല് മീഡിയയില് ഇറങ്ങിയിട്ടുണ്ട്. ആയുഷ് ഡോക്ടര്മാര്ക്ക് അലോപ്പതി ചെയ്യണമെന്ന് യാതൊരു താല്പര്യവുമില്ല. അലോപ്പതി വേണ്ടെന്ന് വെച്ചിട്ടാണ് അവര് ആയുഷ് പഠിക്കാന് ഇറങ്ങിയത് . അവരുടെ അടുത്തെത്തുന്ന രോഗികളും ആയുഷ് ചികിത്സയ്ക്കാണ് എത്തുന്നത്. ഈ ബ്രിഡ്ജ് കോഴ്സ് വേണ്ട എന്ന് വാദിക്കുന്നതും ഇതിനെ ശക്തമായി എതിര്ക്കുന്നതും ആയുഷ് ഡോക്ടര്മാരാണ്. ഈ വിഷയത്തില് ഐ എം എ യോടൊപ്പമാണ് ആയുഷ് ഡോക്ടര്മാരും.
https://www.facebook.com/Malayalivartha
