തോമസ് ചാണ്ടിയുടെ കണ്ടകശനി മാറുന്നില്ല; തിരിച്ചു വരാനുള്ള തോമസ് ചാണ്ടിയുടെ മോഹത്തിനേറ്റ കടുത്ത പ്രഹരമാണ് വിജിലന്സ് കേസ്
തോമസ് ചാണ്ടി മന്ത്രി പദം രാജി വയ്ക്കുന്ന സമയത്ത് പത്രക്കാരോടു നടത്തിയ ഒരു വെല്ലുവിളിയായിരുന്നു അഗ്നി ശുദ്ധി വരുത്തി താന് തിരിച്ചു വരുമെന്നത്. എന്നാല് തോമസ് ചാണ്ടി രാജി വച്ചതോടെ കളികളും മാറി. എ. കെ ശശീന്ദ്രനെതിരായ കേസ് പിന്വലിപ്പിച്ച് അദ്ദേഹത്തെ മന്ത്രിയാക്കാനുള്ള ശ്രമം ഒരുവശത്ത് നടന്നു. എന്നാല് സര്ക്കാരിന്റെ പ്രതിച്ഛായ തകര്ക്കുമെന്നതിനാല് എ.കെ ശശീന്ദ്രനെ മന്ത്രിയാക്കാന് മുഖ്യമന്ത്രിക്ക് താത്പര്യമില്ലായിരുന്നു. അതേസമയം ഗണേഷ് കുമാറിനെ എന്സിപിയിലെത്തിച്ച് മന്ത്രിയാക്കാനുള്ള ശ്രമവും നടന്നു വരികയാണ്. ഇതിനെ തോമസ് ചാണ്ടി ശക്തമായി എതിര്ത്തു കൊണ്ടിരിക്കുന്ന സമയത്താണ് വിജിലന്സ് കേസ് വന്ന് മന്ത്രി മോഹം അടയുന്നത്. എന്നാല് ഗണേഷ് കുമാറിന്റെ സാധ്യത വാനോളം ഉയരുകയാണ്.
ലേക് പാലസിലെ റിസോര്ട്ടിനു മുന്നിലൂടെയുള്ള വലിയകുളം സീറോ ജെട്ടി റോഡ് നിര്മാണത്തിലെ ക്രമക്കേടുകളുടെ പേരില് മുന്മന്ത്രി തോമസ് ചാണ്ടിക്കെതിരേ കേസെടുക്കണമെന്നു വിജിലന്സ് റിപ്പോര്ട്ട് വന്നത് കഴിഞ്ഞ ദിവസമാണ്. അധികാര ദുര്വിനിയോഗം നടന്നെന്നാണു കണ്ടെത്തലിനെ തുടര്ന്നാണ് വിജിലന്സ് ഈ ഒരു നിലപാട് സ്വീകരിച്ചത്.
സംസ്ഥാന പോലീസ് മേധാവി ലോക്നാഥ് ബെഹ്റയ്ക്കു കൈമാറിയ അന്വേഷണ റിപ്പോര്ട്ട് ഇന്നു കോട്ടയം വിജിലന്സ് കോടതിയില് സമര്പ്പിക്കും. നടപ്പാത വീതി കൂട്ടി മണ്ണിട്ടു നികത്തി, റോഡ് നിര്മാണത്തിനു വേണ്ടി നീര്ച്ചാലുകളുടെ ഗതി മാറ്റി, നെല്വയല്തണ്ണീര്ത്തട സംരക്ഷണ നിയമം ലംഘിച്ചു തുടങ്ങിയ വിവിധ ആരോപണങ്ങളാണ് കോട്ടയം വിജിലന്സ് എസ്.പിയുടെ നേതൃത്വത്തില് അന്വേഷിച്ചത്. റിപ്പോര്ട്ട് സമര്പ്പിക്കാനായി കോടതി അനുവദിച്ച സമയപരിധി ഇന്ന് അവസാനിക്കുകയാണ്.
തോമസ് ചാണ്ടിയുടെ ഉടമസ്ഥതയിലുള്ള ലേക് പാലസ് റിസോര്ട്ടിലേക്കു റോഡ് നിര്മിച്ചതുമായി ബന്ധപ്പെട്ട് അഴിമതിയും അധികാര ദുര്വിനിയോഗവും നടത്തിയെന്നാരോപിച്ച് ആലപ്പുഴ സ്വദേശി സുഭാഷ് എം. തീക്കാടന് നല്കിയ പരാതിയിലാണു കോട്ടയം വിജിലന്സ് കോടതി നവംബര് നാലിനു ദ്രുതപരിശോധനയ്ക്ക് ഉത്തരവിട്ടത്.
തോമസ് ചാണ്ടിക്കെതിരെയുള്ള എല്ലാ പരാതികളും അന്വേഷിച്ച് റിപ്പോര്ട്ട് സമര്പ്പിക്കാന് വിജിലന്സിനു സര്ക്കാരും നിര്ദേശം നല്കിയിരുന്നു. ദേവസ്വം ഭൂമി കൈയേറിയത് ഉള്പ്പെടെയുള്ള ആരോപണങ്ങള് പരിശോധിക്കാന് കൂടുതല് സമയം ആവശ്യമാണെന്നാണ് വിജിലന്സിന്റെ നിലപാട്.
ഭൂമി കൈയേറ്റക്കാര്യത്തില് റവന്യു വകുപ്പിന്റെ പരിശോധനയ്ക്കു ശേഷമേ വിജിലന്സിനു പരിശോധിക്കാന് കഴിയൂ. അതിനാലാണ് വിജിലന്സിനു നേരിട്ട് പരിശോധിക്കാന് കഴിയുന്ന സീറോ ജെട്ടി റോഡ് നിര്മാണത്തിലെ ക്രമക്കേടുകള് ആദ്യം അന്വേഷിച്ചത്.
https://www.facebook.com/Malayalivartha
