പാലോട് മാലിന്യ സംസ്‌കരണ പ്ലാന്റിനെതുരെ റവന്യൂ വകുപ്പും രംഗത്ത്. പ്ലാന്റിനായി ഐ.എം.എ വാങ്ങിയ സ്ഥലത്ത് നിര്‍മാണം അനുവദിക്കാന്‍ നിയമ തടസമുണ്ടെന്ന് നെടുമങ്ങാട് തഹസില്‍ദാര്‍ ജില്ലാ കളക്ടര്‍ കെ. വാസുകിക്ക് റിപ്പോര്‍ട്ട് നല്‍കി. പ്‌ളാന്റിനായി കണ്ടെത്തിയ സ്ഥലം കണ്ടല്‍ക്കാടുമുണ്ട്. ഇവിടെ നിര്‍മാണ പ്രവര്‍ത്തനങ്ങള്‍ നടത്തുന്നത് തണ്ണീര്‍ടത്തട നിമയങ്ങളുടെ ലംഘനമാണെന്നും റിപ്പോര്‍ട്ടില്‍ ചൂണ്ടിക്കാട്ടി.

പ്‌ളാന്റിന് അനുമതി നല്‍കിയാല്‍ ഗുരുതരമായ ക്രമസമാധാന പ്രശ്‌നങ്ങളുണ്ടാണ്ടാകുമെന്നും തഹസില്‍ദാര്‍ റിപ്പോര്‍ട്ടില്‍ വ്യക്തമാക്കുന്നുണ്ട്. പ്ലാന്റിനായി ഐ.എം.എ വാങ്ങിയിരിക്കുന്ന ആറേക്കര്‍ എണ്‍പത് സെന്റ് ഭൂമിയില്‍ അഞ്ച് ഏക്കറും റവന്യൂ രേഖകള്‍ പ്രകാരം നിലമാണ്.
നിലമായി രേഖപ്പെടുത്തിയിരിക്കുന്ന ഭൂമിയില്‍ നിയമപ്രകാരം നിര്‍മാണങ്ങള്‍ അനുവദിക്കാനാവില്ല. പ്രദേശത്ത് ജനവാസമില്ലന്ന ഐ.എം.എയുടെ നിലപാടിനെയും റവന്യൂ വകുപ്പ് തള്ളി. പദ്ധതി പ്രദേശത്തിന് 350 മീറ്റര്‍ അകലെ 64 കുടുംബങ്ങളുള്ള പട്ടികവര്‍ഗ കോളനിയും മൂന്ന് കിലോമീറ്ററിനുള്ളില്‍ രണ്ട് പട്ടികജാതി കോളനികളുമുണ്ട്. ഈ സ്ഥലത്തേക്കുള്ള റോഡിനിരുവശവും 40 കുടുംബങ്ങള്‍ താമസിക്കുന്നുണ്ട്.

പ്‌ളാന്റ് സ്ഥാപിക്കണമെങ്കില്‍ ഇവരെ കുടിയിറക്കേണ്ടി വരും. ഇത്രയും തടസങ്ങള്‍ ഇരിക്കെ പ്‌ളാന്റിന് അനുമതി നല്‍കരുതെന്നാണ് റവന്യൂ വകുപ്പിന്റെ റിപ്പോര്‍ട്ട്. നേരത്തെ, വനം വകുപ്പും പ്ലാന്റിനെതിരെ നിലപാടെടുത്തിരുന്നു. അന്തിമ തീരുമാനം പരിസ്ഥിതി വകുപ്പിന്റേതാണെന്നായിരുന്നു വനം മന്ത്രി കെ.രാജു ഇന്നലെ പ്രതികരിച്ചത്.