തോമസ് ചാണ്ടി തണ്ണീര്ത്തട സംരക്ഷണനിയമം ലംഘിച്ചു, ഗൂഢാലോചന നടത്തി; ഇതിന് സഹായിച്ച ഉദ്യോഗസ്ഥര്ക്കെതിരെ നടപടി വേണം, റോഡ് നിര്മിക്കാന് ഫണ്ട് അനുവദിച്ച പി.ജെ കുര്യന്റെയും കെ.ഇ ഇസ്മയിലിന്റെയും പങ്ക് അന്വേഷിക്കണം
തണ്ണീര്ത്തട നിയമലംഘനം നടത്തിയതിന് മുന് ഗതാഗതമന്ത്രി തോമസ് ചാണ്ടിക്കെതിരെ എഫ്.ഐ.ആര് ഇട്ട് വിജിലന്സ് കേസെടുത്ത് അന്വേഷിക്കമെന്ന് കോട്ടയം വിജിലന്സ് കോടതിയുടെ ഉത്തരവ്. തോമസ് ചാണ്ടിയുടെ ഉടമസ്ഥതയിലുള്ള ആലപ്പുഴ ലേക് പാലസ് റിസോര്ട്ടിന് മുന്നിലൂടെ വലിയകുളം മുതല് സീറോ ജെട്ടി വരെയുള്ള റോഡ് നിര്മാണത്തില് ക്രമക്കേടുണ്ടെന്നും അതിനാല് തോമസ് ചാണ്ടിക്കും അദ്ദേഹത്തെ സഹായിച്ച ഉദ്യോഗസ്ഥര്ക്കുമെതിരെ കേസെടുത്ത് അന്വേഷണം നടത്തണമെന്നും ജനതാദള് (യു) നേതാവ് സുഭാഷ് നല്കിയ പരാതി അംഗീകരിച്ചാണ് കോടതിയുടെ നടപടി. മന്ത്രിയായിരിക്കെ തോമസ് ചാണ്ടിയെ സംരക്ഷിക്കാന് പരമാവധി നടപടിക്രമങ്ങള് നീട്ടിക്കൊണ്ടുപോയ വിജിലന്സിന്റെ മലക്കംമറിച്ചില് പരാതിക്കാരനെ പോലും ഞെട്ടിച്ചു.
തണ്ണീര്ത്തട സംരക്ഷണനിയമ ലംഘനത്തിന് പുറമേ ഗൂഢാലോചനയും ചാണ്ടിക്കെതിരെ ചുമത്തിയിട്ടുണ്ട്. എഫ്.ഐ.ആര് രജിസ്റ്റര് ചെയ്ത ശേഷം അത് 18ന് ഹാജരാക്കാനും കോടതി നിര്ദ്ദേശിച്ചു. അന്ന് കേസ് വീണ്ടും പരിഗണിക്കും. തോമസ് ചാണ്ടിക്കെതിരെ നേരത്തെ വിജിലന്സ് ത്വരിതാന്വേഷണം നടത്തിയിരുന്നു. ആരോപണത്തില് കഴമ്പുണ്ടെന്ന് കണ്ടതിനെ തുടര്ന്നാണ് കേസെടുക്കാമെന്ന് കോടതിക്ക് വിജിലന്സ് റിപ്പോര്ട്ട് നല്കിയത്. ലേക് പാലസിലേക്കുള്ള റോഡ് നിര്മിക്കാന് ഫണ്ട് അനുവദിച്ച രാജ്യസഭാ ഉപാധ്യക്ഷന് പി.ജെ കുര്യന്, മുന് എം.പി കെ.ഇ ഇസ്മയില് എന്നിവരുടെ പങ്കിനെക്കുറിച്ചും അന്വേഷിക്കണമെന്നും വിജിലന്സ് എസ്.പി എം. ജോണ്സണ് ജോസഫ്, ഡയറക്ടര് ലോക്നാഥ് ബഹ്റ എന്നിവര് റിപ്പോര്ട്ടില് ആവശ്യപ്പെടുന്നു.
നെല്വയല് തണ്ണീര്ത്തട നിയമം പാസായതോടെ സര്ക്കാരിന്റെ അനുമതിയില്ലാതെ 2008 മുതല് പാടം നികത്താന് കഴിയില്ല. ഈ നിയമംലംഘിച്ച് സ്വകാര്യഭൂമി നികത്തിയാണ് ലേക്പാലസിലേക്ക് റോഡ് നിര്മിച്ചതെന്ന് വിജിലന്സ് റിപ്പോര്ട്ടില് പറയുന്നു. സ്വകാര്യഭൂമിയാണ് നികത്തിയതെങ്കിലും ജനപ്രതിനിധികളും സര്ക്കാര് ജീവനക്കാരും ഉള്പ്പെട്ടതിനാല് അഴിമതിനിരോധന നിയമത്തിന്റെ പരിധിയില് വരുമെന്നും വിജിലന്സ് വ്യക്തമാക്കുന്നു. രണ്ട് എം.പിമാര്ക്ക് പുറമേ ഹാര്ബര് എഞ്ചിനിയറിംഗ് വകുപ്പും റോഡ് നിര്മിക്കാന് പണം നല്കി. ടാറിംഗിനായി 28 ലക്ഷം രൂപയാണ് ചെലവഴിച്ചത്. ജനങ്ങള്ക്ക് ആവശ്യമുള്ള ഭാഗത്തെ റോഡുകള് ഒഴിവാക്കുകയും ചെയ്തു. നികുതിപ്പണം വഴിവിട്ട് ചെലവഴിക്കാന് ആലപ്പഴ കളക്ടര്മാരായിരുന്ന പത്മകുമാറും സൗരഭ് ജയിനും കൂട്ടുനിന്നെന്നും ഇവരുടെയും റവന്യൂ ഉദ്യോഗസ്ഥരുടെയും പരിശോധനയ്ക്ക് ശേഷമാണ് എം.പി ഫണ്ട് അനുവദിച്ചെന്നും വിജിലന്സ് കണ്ടെത്തി. അതിനാല് ഇവരുടെയെല്ലാം മൊഴി എടുക്കണമെന്നും സീറോജെട്ടി റോഡ് നിര്മിച്ച പ്രദേശത്തെ കുറിച്ച് വ്യക്തത വരുത്തണമെന്നും വിജിലന്സ് റിപ്പോര്ട്ടില് പറയുന്നു. തോമസ് ചാണ്ടിക്കെതിരെ കേസ് എടുക്കണമെന്ന് നേരത്തെ ത്വരതാന്വേഷണ റിപ്പോര്ട്ടില് വിജിലന്സ് ശുപാര്ശ ചെയ്തിരുന്നു. വിജിലന്സ് മേധാവികൂടിയായ ലോക്നാഥ് ബെഹ്റ ത്വരിതാന്വേഷണ റിപ്പോര്ട്ട് പരിശോധിച്ചശേഷമാണ് കോടതിയില് സമര്പ്പിക്കാന് അനുവാദം നല്കിയത്.
https://www.facebook.com/Malayalivartha
