മഹാത്മാഗാന്ധിയുടെ രക്തസാക്ഷിത്വദിനം ഡിസംബര് 30ന് ആചരിച്ച കോണ്ഗ്രസ് നേതാക്കള്ക്കെതിരെ നടപടി എടുക്കണമെന്ന് പരാതി
പ്രാദേശിക കോണ്ഗ്രസ് നേതാക്കള് മഹാത്മാഗാന്ധിയെ അവഹേളിക്കുകയും പണപ്പിരിവിന് വേണ്ടി അദ്ദേഹത്തിന്റെ രക്തസാക്ഷിത്വദിനം തെറ്റായി ആചരിച്ച നേതാക്കള്ക്കെതിരെ നടപടി എടുക്കണമെന്ന് പരാതി. ജില്ലാ കോണ്ഗ്രസ് കമ്മിറ്റി അംഗം സരോജിനി ഭാസ്ക്കറാണ് ഇത്സംബന്ധിച്ച് ഡി.സി.സിക്ക് പരാതി നല്കിയത്. സംഭവം ശ്രദ്ധയില്പ്പെട്ടിട്ടും ഗുരുതരമായ കൃത്യവിലോപം നടത്തിയ പട്ടം ബ്ളോക്ക് കോണ്ഗ്രസ് കമ്മിറ്റി അംഗങ്ങള്ക്കെതിരെ നടപടിയെടുത്തില്ലെന്ന് പരാതിയില് ആരോപിക്കുന്നു. മഹാത്മാഗാന്ധിയുടെ ജന്മദിനവും ചരമദിനവും എന്നാണെന്ന് തിരിച്ചറിവില്ലാത്തവര്ക്ക് സ്ഥാനമാനങ്ങള് നല്കുന്നതെന്നും പരാതിയില് ചൂണ്ടിക്കാട്ടുന്നു.
ജനുവരി 30ന് നടത്തേണ്ട ഗാന്ധിജിയുടെ ചരമവാര്ഷികദിനം ഡിസംബര് 30നാണ് കോണ്ഗ്രസ് പട്ടം ബ്ലോക്ക് കമ്മിറ്റി പ്രവര്ത്തകര് ആചരിച്ചത്. പേരൂര്ക്കട ജംഗ്ഷനിലായിരുന്നു പരിപാടി സംഘടിപ്പിച്ചത്. ചരമവാര്ഷിക ദിനം ഒരുമാസം മുമ്പ് ആചരിച്ചത് മഹാത്മാവിനെ അപമാനിക്കുന്നതിനു തുല്യമാണെന്നും ഇതൊന്നും അറിയാത്തവര്ക്ക് സ്ഥാനമാനങ്ങള് നല്കുന്നത് ശരിയല്ലെന്നും ഡി.സി.സി മെമ്പര് സരോജിനി ഭാസ്കര് ആരോപിക്കുന്നു. പട്ടം ബ്ളോക്ക് കമ്മിറ്റിക്കെതിരെ നടപടി വേണമെന്നും കോണ്ഗ്രസിനെ ലാഭേച്ഛയോടെ കച്ചവടത്തിന് ഉപയോഗിക്കാത്ത നേതാക്കള് ജീവിച്ചിരിപ്പുണ്ടെന്നും ഗ്രൂപ്പ് രാഷ്ട്രീയത്തിന്റെ പേരില് വൃത്തികേടുകള് ചെയ്യുന്നവരെ സംരക്ഷിക്കരുതെന്നും ഇവര് ആവശ്യപ്പെടുന്നു.
https://www.facebook.com/Malayalivartha
