കടലില് പോകുന്നവര്ക്ക് വഴികാട്ടിയായി ഇന്നു മുതല് ഐഎസ്ആര്ഒയുടെ ഉപഗ്രഹമായ നാവിക് രംഗത്ത്
കടലില് പോകുന്ന മത്സ്യത്തൊഴിലാളികളെ നിരീക്ഷിക്കാനായി ഇന്നുമുതല് ഐ.എസ്.ആര്.ഒയുടെ ഗതിനിര്ണയ ഉപഗ്രഹ ശൃംഖലയായ നാവിക് ' കൂടെയുണ്ടാകും. ഇതിനായി അഹമ്മദാബാദിലെ സ്പേസ് ആപ്ലിക്കേഷന് സെന്റര് നിര്മ്മിച്ച ഉപകരണം (നാവിക് ആപ്ലിക്കേഷന് ഡിവൈസ് ) ബോട്ടുകളില് ഘടിപ്പിക്കും. വിഴിഞ്ഞം, നീണ്ടകര, വൈപ്പിന് എന്നിവിടങ്ങളില് നിന്ന് ഉപകരണങ്ങള് ഘടിപ്പിച്ച രണ്ട് വീതം ബോട്ടുകള് ഇന്ന് രാവിലെ 8ന് ഉള്ക്കടലിലേക്ക് തിരിക്കും. ഐ.എസ്.ആര്.ഒ ശാസ്ത്രജ്ഞരും ഉണ്ടാവും. ഐ.എസ്.ആര്.ഒ വികസിപ്പിച്ച ആപ്ലിക്കേഷന് മത്സ്യത്തൊഴിലാളികളുടെ മൊബൈല് ഫോണില് ഇന്സ്റ്റാള് ചെയ്തു.
ഇന്നു രാവിലെ മുതല് നാവിക് ഉപഗ്രഹത്തില് നിന്ന് പരീക്ഷണ സന്ദേശങ്ങള് അയച്ചുതുടങ്ങും. ബോട്ടുകളിലെ ഉപകരണം ഇവ പിടിച്ചെടുത്ത് മത്സ്യത്തൊഴിലാളികളുടെ മൊബൈലിലേക്ക് അയയ്ക്കും. മൊബൈലില് സന്ദേശം വായിക്കാം. ഫിഷറീസ് ഡയറക്ടറുടെ ഓഫീസിലെ നാവിക് ഡിവൈസിലും ഈ സന്ദേശങ്ങള് ലഭിക്കും. 200 നോട്ടിക്കല് മൈല് ദൂരെ ശനിയാഴ്ച വൈകിട്ടു വരെ പരീക്ഷണം തുടരും.
ആദ്യഘട്ടത്തില് ബോട്ടുകളിലേക്ക് സന്ദേശമയയ്ക്കാനേ കഴിയൂ. ബോട്ടുകളില് നിന്ന് സന്ദേശങ്ങള് അയയ്ക്കാനാവില്ല. ഇതിന് കാല്ലക്ഷത്തിലേറെ വിലയുള്ള ട്രാന്സ്മിറ്റര് ഘടിപ്പിക്കണം. നാവിക് ഉപകരണത്തിന് ഏകദേശം 10,000 രൂപയേയുള്ളൂ. 250 ഉപകരണങ്ങള് ഐ.എസ്.ആര്.ഒ സൗജന്യമായി നല്കും.
ഐഎസ്ആര്.ഒ സയന്റിഫിക് സെക്രട്ടറിക്കൊപ്പം സാറ്റലൈറ്റ് കമ്മ്യൂണിക്കേഷന് ആപ്ലിക്കേഷനിലെ സീനിയര് സയന്റിസ്റ്റ് ഹനുമന്ത് രായപ്പ, അഹമ്മദാബാദ് സ്പേസ് ആപ്ലിക്കേഷന് സെന്ററിലെ ശാസ്ത്രജ്ഞന് ജോഷി എന്നിവരാണ് കടലിലെ പരീക്ഷണത്തിനെത്തിയത്. ഡല്ഹിയിലെ മാപ് മൈ ഇന്ത്യ'യാണ് സോഫ്ട് വെയര് വികസിപ്പിച്ചത്.
https://www.facebook.com/Malayalivartha
