ചാണ്ടി കുട്ടനാട് വഴി കുവൈറ്റിലേക്ക്... ഫോണ് കെണി കേസില് എ.കെ ശശീന്ദ്രന് കുറ്റവിമുക്തനാക്കപ്പെട്ടാല് പിന്നെല്ലാം ശുഭം
തോമസ് ചാണ്ടിക്കെതിരെ എഫ്.ഐ.ആര് എടുത്ത് കേസെടുക്കാന് വിജിലന്സ് കോടതി ഉത്തരവിട്ടതോടെ മന്ത്രിക്കസേരയിലേക്കുള്ള തോമസ് ചാണ്ടിയുടെ വഴി അടയുന്നു. അതേസമയം, മന്ത്രിപദത്തിലേക്ക് മടങ്ങിയെത്താന് കാത്തിരിപ്പ് തുടരുന്ന എ.കെ ശശീന്ദ്രന് ആശ്വാസമാണ്. ഹൈക്കോടതിയുടെ പരിഗണനയിലുള്ള ഫോണ് കെണി കേസില് എ.കെ ശശീന്ദ്രന് കുറ്റവിമുക്തനാക്കപ്പെട്ടാല് മന്ത്രിയാകുന്ന സാഹചര്യമാണ് നിലവിലുള്ളത്. തോമസ് ചാണ്ടിയുടെയും ശശീന്ദ്രന്റെയും കാര്യത്തില്, ആദ്യം കുറ്റവിമുക്തനാകുന്നയാള് മന്ത്രിയാകുമെന്ന ധാരണയാണ് എന്.സി.പിയിലുള്ളത്. ഇതിനിടെ, മന്ത്രിപദം മോഹിച്ച് എം.എല്.എമാരായ കെ.ബി ഗണേഷ്കുമാര്, കോവൂര് കുഞ്ഞുമോന്, എന്. വിജയന്പിള്ള എന്നിവര് നടത്തിയ ലയനനീക്കം വിജയിക്കാനുള്ള സാധ്യത കുറവാണ്.
ആലപ്പുഴ ലേക്പാലസ് റിസോര്ട്ടുമായി ബന്ധപ്പെട്ട നിയമലംഘനങ്ങളുടെ പേരില് തോമസ് ചാണ്ടിയുടെ മേലുള്ള നിയമക്കുരുക്ക് മുറുകുകയാണ്. റിസോര്ട്ടിലേക്ക് നിലം നികത്തി റോഡ് നിര്മിച്ചെന്ന പരാതിയില് എഫ്.ഐ.ആര് റജിസ്റ്റര് ചെയ്യാനാണ് കോട്ടയം വിജിലന്സ് കോടതി ഉത്തരവിട്ടിരിക്കുന്നത്. ഇതോടെ മന്ത്രിസഭയിലേക്ക് മടങ്ങിവരാമെന്ന തോമസ് ചാണ്ടിയുടെ പ്രതീക്ഷ ഏതാണ്ട് അവസാനിച്ചു. ആലപ്പുഴ വലിയകുളം സീറോജെട്ടി ഭാഗത്താണ് നിലംനികത്തി റോഡ് നിര്മിച്ചതെന്ന് പരാതിയുള്ളത്. ഇതേ തുടര്ന്ന് രണ്ടാഴ്ചക്കുള്ളില് കേസ് അന്വേഷണം പൂര്ത്തിയാക്കി റിപ്പോര്ട്ട് സമര്പ്പിക്കാനാണ് കോടതി നിര്ദേശം.
എന്.സി.പിയുടെ മന്ത്രിസ്ഥാനം ലക്ഷ്യമാക്കി മൂന്ന് എം.എല്.എമാര് പിന്വാതില് നീക്കം നടത്തുന്നുവെന്ന വാര്ത്ത പുറത്തുവന്നത് കഴിഞ്ഞദിവസമാണ്. നിയമക്കുരുക്ക് മുറുകി ശശീന്ദ്രനോ തോമസ്ചാണ്ടിക്കോ മന്ത്രായാകാന് കഴിയാത്ത സാഹചര്യം വന്നാല് എന്.സി.പിയില് എത്തി മന്ത്രിയാകാനായിരുന്നു മൂന്നു പേരുടെയും നീക്കം. ദൂതന്മാര് മുഖേന രഹസ്യമായിട്ടായിരുന്നു മൂന്ന് ഇടതുസാമാജികരുടെയും നീക്കം. നേതൃതലത്തില് ചര്ച്ച നടന്നുവെങ്കിലും എ.കെ ശശീന്ദ്രന് പക്ഷം വാളെടുത്തതോടെ പാര്ട്ടി സംസ്ഥാന അധ്യക്ഷന് ടി.പി പീതാംബരന് മാസ്റ്റര് വെട്ടിലായി.
എന്.സി.പിയുമായി ലയിച്ച് മന്ത്രിയാകാമെന്ന ഗണേഷ്കുമാറിന്റെ നീക്കം എളുപ്പത്തില് ഫലം കാണാന് സാധ്യതയില്ല. കേരള കോണ്ഗ്രസ് ബി ഉള്പ്പെടെയുള്ളവര് താല്പര്യം അറിയിച്ചിരുന്നുവെന്ന് സംസ്ഥാന അധ്യക്ഷന് ടി.പി പീതാംബരന് അറിയിച്ചിരുന്നു. പക്ഷേ ലയനം ഇപ്പോള് അജണ്ടയിലില്ലെന്നും സംഘടനാ തെരഞ്ഞെടുപ്പിനു ശേഷമെ ഇക്കാര്യത്തില് എന്തെങ്കിലും തീരുമാനമുണ്ടാകൂവെന്നും പീതാംബരന് വ്യക്തമാക്കി. എന്നാല് പാര്ട്ടിയോട് ആലോചിക്കാതെ പീതാംബരന് ചര്ച്ച നടത്തിയത് ശരിയായില്ലെന്ന് കഴിഞ്ഞ ദിവസം ചേര്ന്ന നേതൃയോഗത്തില് വിമര്ശനം ഉയര്ന്നു. കേരള കോണ്ഗ്രസ് ബിയുമായി യാതൊരു സഹകരണവും വേണ്ടെന്നായിരുന്നു യോഗത്തിലെ പൊതുവികാരം.
വിജിലന്സ് അന്വേഷണം നടക്കുന്നതോടെ തോമസ് ചാണ്ടിക്ക് ഉടനൊന്നും തിരിച്ചുവരവ് സാധ്യമാകില്ല. എന്നാല് ഫോണ്കെണി കേസില് പരാതിക്കാരി പിന്വാങ്ങിയ സാഹചര്യത്തില് കുറ്റവിമുക്തനാക്കപ്പെടുമെന്നാണ് എ.കെ ശശീന്ദ്രന്റെ പ്രതീക്ഷ. അങ്ങനെയെങ്കില് എത്രയും വേഗം മന്ത്രിക്കസേരയില് തിരികെയെത്താമെന്നും ശശീന്ദ്രന് കണക്കുകൂട്ടുന്നു.
https://www.facebook.com/Malayalivartha
